Tile kelen lajɛnba nata ka kalan

Cidenya baara saan 2008 kɔnɔ, tile kelen lajɛnba barokun ye: “An ye bɔgɔn ye, Jehova ye an dilanbaga ye.” O miiriya basiginen be Esayi 64:7 kan. An bena Bibulu ka ladili dɔw sɔrɔ minw bena an dɛmɛ ka Jehova ka hakilitigiya, a ka tilennenya, a ka sebagaya n’a ka kanuya faamu koɲuman ani k’a waleɲuman lɔn ale min ye daga Dilanbagaba ye.

Kafokulu kɔrɔsibaga bena kalan nin di: “An ka baara kɛ i ko baara-ɲuman-kɛminanw cidenya baara la.” A bena a yira ko mɔgɔ hakɛ caaman b’a la ka dugabaw sɔrɔ u kɛtɔ ka tiɲɛn lɔn ani k’a kofɔ mɔgɔ wɛrɛw ye. Kalan wɛrɛ kuun ko: “Miirili bena aw tanga koo ma.” A bena a yira cogo min na n’an be miiri sɔbɛ la Jehova ka sariyakolo tilennenw kan o b’an tanga. Kalankɛla lonan bena kuma jama fɛ barokun ninw kan: “Aw kana aw yɛrɛ kɛɲɛ ni nin duniɲa ka koow ye tugun” ani “An k’an yɛrɛ to daga Dilanbagaba bolo.” Bangebagaw ni denmisɛnw bena jijali sɔrɔ kalan ninw na: “Kamalenw ni sunguruw: nafa be minw na Jehova fɛ” ani “Bangebagaw ka lɔyɔrɔba deenw kalanni n’u kololi la.” An balimaw be koo minw dafara cidenya baara la, an ɲagalilen bena o mɛn ani k’o filɛ ka tɛmɛ ɲɛyiraliw ni lakalitaw fɛ. Minw ye u yɛrɛkun di Ala ma ani u b’a fɛ k’o yira batɛmu fɛ, u ka kan ka kɔn k’o fɔ joona diinan mɔgɔkɔrɔw ɲɛbila ye. I kana ɲinɛ i ka La Tour de Garde kɔ, min ka kan ka kalan tile kelen lajɛnba lɔgɔkun kɔnɔ.

Daga Dilanbagaba mana koo o koo latigɛ a b’o kɛ. Nka an kelen-kelen lo ka kan k’a latigɛ n’an bena sɔn a ka kololi la. I ko bɔgɔngwɛ daga dilanbaga ka uruleman kan, minw be hakili sɔrɔ ka kolo Jehova ka sariyaw ye ani u be sɔn a k’u jogo fisaya olu be se ka labɛn, k’u cogo fisaya, ani ka yɛlɛma ka kɛ minɛ nafamanw ye. N’an be jɛn ka baara kɛ ni Jehova ye, an be nɔɔrɔ la a ka Masabaya kan ani an be duga caaman sɔrɔ o la.