Tile kelen lajɛnba ka kalan kura

Cidenya baara saan 2009 kɔnɔ, tile kelen lajɛnba barokun ko: “To k’i janto cidenya baara la. . . , a kɛ k’a dafa.” O miiriya basiginen be Kolosekaw 4:17 kan. An kerecɛnw kɔni be o ladili ta sɔbɛ la. An ka laɲinita ye k’an ka cidenya baara dafa ni kantigiya ye i ko Yesu y’a kɛ cogo min na (Yuhana 17:4). Ciden Pol fana kɛra ɲɛyirali ɲuman ye an fɛ o koo la. A tun cɛsirinen be k’a ka boli kɛ k’a ban cidenya baara la.—Kɛwalew 20:24.

Kafokulu kɔrɔsibaga ka kalan bena a yira cogo min na weleweledala sifa caaman be see sɔrɔla gwɛlɛyaw kan u ka cidenya baara la. O kɔ, kalan dɔ bena a yira cogo min na an be se ka mɔgɔw dɛmɛ koɲuman ‘minw labɛnnen be ka sɔn ɲɛnamaya banbali ma.’ O kalan kuun ko: “I ye fɛɛn min dan, i k’o sɛnɛ” (Kɛw. 13:48, Kibaro Diman). Kalankɛla lonan ka kalan fɔlɔ kuun ko: “An b’a yira cogo min na ko an ye Ala ka baarakɛla ɲumanw ye.” O kalan kɔnɔ, a bena baro kɛ 2 Kɔrɛntekaw 6:1-10 ka vɛrisew kelen-kelen bɛɛ kan. Wula fɛ a bena kuma jama fɛ barokun nin kan: “Aw ka cidenya baara jati fɛɛnba ye.” Siga t’a la kalan ninw bena aw jaa gwɛlɛya: “Denmisɛnw fara mɔgɔkɔrɔbaw kan, cidenya baara ka di u ye” ani “Denmisɛnw: U minw be cidenya baara kɛ.” Minw ye u yɛrɛkun di Ala ma ani u b’a fɛ k’o yira batɛmu fɛ kafokulu ka lajɛnba nataw dɔ la, u ka kan ka kɔn k’o fɔ joona diinan mɔgɔkɔrɔw ɲɛbila ye. An ka lajɛnbaw bɛɛ fanba dɔ ye La Tour de Garde kalan ye. I ka na n’i tɔgɔla ta ye, min ka kan ka kalan tile kelen lajɛnba lɔgɔkun kɔnɔ.

An kɛtɔ k’an janto an ka cidenya baara la ani k’a dafa, o b’a to an b’an jija walisa Jehova ye min kalifa an ma, an ɲɛnakow ni baara wɛrɛw kana na o nagasi. O tile kelen lajɛnba ka kalan bena jagwɛlɛya di an ma ka bɔ Bibulu kɔnɔ. O jagwɛlɛya ka kan k’an bɛɛ dɛmɛ an k’a faamu an ka kan ka min kɛ walisa an ka kɛ ni miiriya ɲuman ye ani k’an janto an ka cidenya baara kɛcogo la walisa k’a kɛ k’a dafa.