Tile kelen lajɛnba porogramu, waajulibaara saan 2010 kɔnɔ

1. (a) Barokun minw basiginen be Bibulu kan, u la jumanw walawalala kɔsa tile kelen lajɛnbaw la? (b) Yala tile kelen lajɛnba tɛmɛnenw ka hakilinata jɔnjɔn dɔw be yen minw ye aw dɛmɛ aw ka waajuli baara la wa?

¹ “An ka koo ɲumanw faranfasi,” “An ka lɔ kelen kan i ko sagakulu kelen,” “An ka to ka seereya kɛ tiɲɛn koo la,” ani “An ye bɔgɔn ye, Jehova ye an Dilanbaga ye.” (Fil. 1:9, 10, 27; Yuh. 18:37; Es. 64:7). Nunu ye barokun damanin dɔrɔn ye kalan kɛra o minw ɲɔgɔnna caaman kan tile kelen lajɛnba tɛmɛnenw na. Yala aw kɔrɔtɔnen lo ka kɛ waajulibaara saan 2010 ka tile kelen lajɛnba la wa? A kalan barokun ko: “Wagati tɔɔ man ca,” ka kɛɲɛ ni 1 Kɔrɛntekaw 7:29 (NW ) ka fɔta ye.

2. Aw be se ka lajɛnba dusudiya don aw la cogo di?

² Aw ka tile kelen lajɛnba loon mana fɔ dɔrɔn, a’ y’a daminɛ ka baro kɛ a koo la ni dusudiya ye. Bangebaga dɔw b’u deenw dɛmɛ ka lajɛnba makɔnɔ ni dusudiya ye u kɛtɔ k’a loon sɛbɛ u ka kalandiriye kan. U mako bena kɛ fɛɛn minw na lajɛnba la, u be olu fana tɔgɔw sɛbɛ yen. Ani sisan, u be to ka loonw tɔɔ jati. Aw ka batoli tuma na gwa kɔnɔ suu fɛ, aw be se k’a ɲini ka tile kelen lajɛnba tɛmɛnenw ka hakilinataw lajɛ. Walisa ka aw ni aw ka denbaya dɛmɛ ka “aw ka lamɛnni cogo dɔn,” aw be se k’aw dusukun cogoya labɛn lajɛnba kosɔn aw kɛtɔ ka gafe Tirez profit de l’École du ministère théocratique ɲɛɛ 13-16 lajɛ.—Luka 8:18.

3. Kalan min bena di, cogo di an be se ka nafa sɔrɔ a la bɛrɛbɛrɛ?

³ Aw be kalan min sɔrɔ, a’ y’a sira tagama: An ka teli ka kuma min mɛn lajɛnba banni kɔ o ye nin ye: “Kalan diyara dɛ!” Tiɲɛn tɛ tɛmɛ o kan, sabu Jehova be labɛn nafaman caaman minw kɛ, tile kelen lajɛnba ye u la kelen lo ye (Ntal. 10:22). Walisa kalan ka aw nafa, fɔɔ aw ka miiri a kan ani k’a mara aw dusu la (Luka 8:15). Lajɛnba banni kɔ ani aw segitɔ soo, a’ ye wagati ta ka baro kɛ kalan kan n’aw ka denbaya ye wala n’aw balimaw ye aw ni minw ye mobili ta ɲɔgɔn fɛ. A’ ye baro kɛ ɲɔgɔn fɛ aw ka laɲinitaw ani hakilinataw kan minw bena aw dɛmɛ cidenya baara la. O baro ɲɔgɔnw bena a to kalan ka aw nafa fɔɔ wagati jan lajɛnba tɛmɛnen kɔ.—Yak. 1:25.

4. Mun na lajɛnba nin bena an nafa?

⁴ An mana kado nafaman dɔ sɔrɔ min b’an makoya tigitigi wasa, o b’an kuun kɔrɔta. Jehova be min mara an ye an ka tile kelen lajɛnba nata la, yala an kɔrɔtɔnen tɛ k’o sɔrɔ wa? An lanen b’a la ko o bena an nafa cogo bɛɛ la. An mako be nilifɛn tigitigi min na, an jigi b’a la k’o sɔrɔ an sankolola Faa Jehova fɛ. A bena o di an ma jijali ni fɔrɔmasɔn sababu fɛ walisa an ka to k’a ka cii dafa.—2 Tim. 4:2; Yak. 1:17.