Tɔnbolo biro ka bataki
Masaya weleweledala kanulenw:
An ninsɔn ka di k’a ye ko waajuli baara saan 2007 kɔnɔ, baara be taga ɲɛ jamanaw bɛɛ la, jamana minw be baara kɛra ni An ka Masaya Cidenyabaara sɛbɛ nin ye. Kunkɔrɔta kura caaman sɔrɔla. Ɲɛyirali fɛ, kudayi piyɔniyew cayaliba kɛra nin ye: Kameruni jamana: 2 085. Laginɛ Biso: 20. Sɛnɛgali: 83. Togo: 930. An ka jamanaw caamanba kɔnɔ dɔ farala weleweledalaw hakɛ kan. O be mɔgɔ dusu diya dɛ! Ɲɛyirali fɛ, marisi kalo la, Burkina Faso ta sera mɔgɔ 1 239 ma ani Ganbi ta sera mɔgɔ 190 ma. Betɛli mɔgɔ dɔw ani boon lɔbaga dɔw bilara ka taga waajuli kɛ yɔrɔw la: dɔw kɛra dan na piyɔniyew ye, dɔw, kudayi piyɔniyew. Kɔsa na, u dɔw ye fɔrɔmasɔn kɛ ka seereyasɛbɛ sɔrɔ Cidenyabaara degeli Lakɔli la. Ani, u be nɔɔ ɲuman tora waajuli baara kan.
Masaya Kibarow no 37 min barokun ko “Ngalon diinan laban ka surun!”, o sɛbɛ miliyɔn 3 ɲɔgɔn tilan-tilanna an ka jamana 13 kɔnɔ ani nafa sɔrɔla o la. Ɲɛyirali fɛ, Santarafiriki ka tɔnbolo dama ye deen 92 039 ci ka taga kafow kɔnɔ. Sɛbɛ deen 470 214 jɛnsɛnna Benɛn ka tɔnbolo mara kɔnɔ. Porto Novo dugu kɔnɔ, muso dɔ ye deen kelen sɔrɔ. O sɛbɛ kalannen kɔ, muso y’a faamu ko tiɲɛn lo. A segira a ka dugu kɔnɔ tuma min na, a ye Seerew yɔrɔ ɲini ka taga bɔ soo dɔ kan ka miiri ko lajɛnw kɛyɔrɔ lo. A lɔra yen ka kɔnɔni kɛ, a jigi tun b’a la ko mɔgɔ dɔ bena na. Balimacɛ dɔ tɛmɛtɔ y’a ye, ani a tagara n’a ye Masaya boon yɔrɔ la. Ka ta o loon ma, o muso ma fɔn lajɛn si la. O muso cɛɛ tun ma sɔn o ma fewu. Nka sisan, cɛɛ be jɛn n’a muso ye ka taga lajɛnw na. Muso tun be yen saan 2006 ka tile saba lajɛnba la yɛrɛ.
Nin kanpaɲi ɲɔgɔnw kɛ kuun ye ka mɔgɔ kɔnɔgwɛw dɛmɛ u k’a lɔn Bibulu be kalan min kɛ tiɲɛn-tiɲɛn na (Mat. 28:19, 20). Waajuli kɛtɔ, i hakili to a la ka makodon mɔgɔw bɛɛ kelen-kelen ka ladɛrɛsi ta ani ka segi ka taga bɔ u ye k’a laɲini ka Bibulu kalan daminɛ n’u ye. A ka di an ye ka jɛn n’aw ye ka nin baaraba kɛ ni dusu kelen ye. An be an ka kerecɛnya kanuya foli lase aw ma kosɔbɛ.
A’ balimaw,
Tɔnbolo biro