Ɲɔgɔn jijali, bɛɛ fɛ
1 Ciden Pol ye sɛbɛ ci Romɛ ka kafo ma ko: “Ne b’a fɛ kosɛbɛ ka aw ye, walisa ne ka Ni Senu ka nilifɛn dɔ lase aw ma, walisa aw ka sabati, o kɔrɔ, an ka ɲɔgɔn jija dannaya la, aw ka dannaya ni ne ta.” (Rom. 1:11, 12). Bi tile la, kɔrɔsibaga tagamakɛlaw nali fana be kɛ ɲɔgɔn jijali sababu ye an fɛ.
2 Kafo kɔnɔ: Tuma caaman na, u be kɔn ka kafokulu kɔrɔsibaga nali kofɔ an ye kabini kalo saba ɲɔgɔn. O be wagati to an ye an ka kɔn k’an yɛrɛ labɛn ka yɛlɛmani don an ka labɛn na walisa ka nafa bɛrɛbɛrɛ sɔrɔ (Efɛs. 5:15, 16). N’i be taga baara la, n’a sɔrɔ i bena kɔnze ta walisa k’i seen don waajuli baara la o lɔgɔkun nin kɔnɔ. Dɔw b’u yɛrɛ labɛn ka piyɔniye kɔrɔsigi baara kɛ danna lɔgɔkun kalo la. Ni dugu taga b’i seen kɔrɔ, yala i be se ka yɛlɛmani dɔw kɛ walisa i ka kɛ yen o lɔgɔkun kɔnɔ wa?
3 Kafokulu kɔrɔsibaga nali kuun jɔnjɔn dɔ ye k’an jaa gwɛlɛya ani k’an degi waajuli baara la. Yala i be se k’a ɲini ka baara kɛ n’ale ye wala a muso ye, n’a furula wa? A ka di kafokulu kɔrɔsibaga ye ka baara kɛ ni weleweledala sifa caaman ye hali minw tɛ se waajuli la koɲuman. A be gafe yiracogo min kɛ wala a be ladili wɛrɛ minw di ni kanuya ye, bɛɛ be se ka nafa sɔrɔ u la (1 Kɔr. 4:16, 17). I kɛtɔ k’a weele a ka na domuni kɛ i fɛ, o bena sababu wɛrɛ di i ma aw ka ɲɔgɔn jaa gwɛlɛya (Heb. 13:2). Komi a ka kalanw labɛnna ka kɛɲɛ ni kafo ka makow ye, i k’a lamɛn koɲuman.
4 Kafokulu kɔrɔsibaga: Ciden Pol tun tɛ daan na ni balima tɔɔw ye kafo kɔnɔ. Gwɛlɛyaw tun b’a kan ani haminanko tun b’a la. A tun ka di a ye ka jagwɛlɛya sɔrɔ (2 Kɔr. 11:26-28). Tuma min na Romɛ kafodenw y’a mɛn ko Pol kasodenlaman be nana sisan u fɛ, u dɔw ye tagama kɛ ka taga a kunbɛn Apius Fɔrum la: fɔɔ km 74! “Paul ye u ye tuma min na, a ye barika da Ala ye ka a ja gɛlɛya” (Kɛw. 28:15). O cogo kelen na, i be se ka kafokulu kɔrɔsibaga jaa gwɛlɛya. I k’a bonya kosɔbɛ i kɛtɔ k’i seen don danna lɔgɔkun ka koow la ni dusudiya ye (1 Tim. 5:17). A be jijali minw kɛ i kosɔn, i k’a yira ko i b’a waleɲuman lɔn tiɲɛn na. I ka limaniya, n’i ka kanuya ani i ka muɲuli bena ale n’a ka muso dusu diya.—2 Tes. 1:3, 4.
5 Nin “waati gɛlɛnw na”, jɔn mako tɛ jagwɛlɛya la an cɛma? (2 Tim. 3:1). I k’a latigɛ sisan k’i seen don bɛrɛbɛrɛ lɔgɔkun kɛrɛnkɛrɛnnin ka koow la ni kafokulu kɔrɔsibaga ye. An bɛɛ kelen-kelen, kɔrɔsibaga tagamakɛlaw wo, welewele-dalaw wo, an be se k’an seen don ɲɔgɔn jijali la ni ninsɔndiya ye. O cogo la, an fana bena to “ka ɲɔgɔn jija ka dɔ fara ɲɔgɔn barika kan.”—1 Tes. 5:11.
[Study Questions]
1. Kɔrɔsibaga tagamakɛlaw nali be sababu kɛrɛnkɛrɛnnin di an ma ka mun kɛ?
2. Mun na u be kɔn ka kafokulu kɔrɔsibaga nali kofɔ an ye?
3. An yɛrɛ be se ka mun lo kɛ walisa ka jagwɛlɛya sɔrɔ danna lɔgɔkun na?
4. An be se k’an ka kafokulu kɔrɔsibaga jaa gwɛlɛya cogo di?
5. Mun na an bɛɛ mako be jagwɛlɛya la bi?