“Pɔli . . . ye barika la Ala ye, dɔ farala a ka jagwɛlɛya kan”

Ɔrɔmu kafo balimaw y’a mɛn tuma min na ko ciden Pol be nana, balimacɛ dɔw ye kilomɛtɛrɛ 64 ɲɔgɔn kɛ tagama na walisa ka taga a kunbɛn. U y’u yɛrɛ saraka ni kanuya ye minkɛ, o ye nɔɔ juman lo to ciden Pol kan? “Pɔli y’olu ye tuma min na, a ye barika la Ala ye, dɔ farala a ka jagwɛlɛya kan.” (Kɛw. 28:15). Bɛɛ tun b’a lɔn ko ciden Pol tun be kafow jija n’a tun tagara bɔ u ye. Nka nin seen nin na, u y’ale yɛrɛ lo jija tuma min na a tun ye kasoden ye.—2 Kor. 13:10.

Bi, kafokulu kɔrɔsibagaw be taga bɔ kafow ye walisa ka balimaw jija. I ko Ala sagokɛlaw bɛɛ, tuma dɔw la olu fana be sɛgɛn, u be hami ani u fari be faga. Ni kafokulu kɔrɔsibaga n’a muso nana bɔ aw ka kafo ye siɲɛ wɛrɛ, i be se ka mun lo kɛ walisa u ka jagwɛlɛya sɔrɔ ani aw “ka ɲɔgɔn jija”?—Ɔrɔm. 1:11, 12.

• 

  Taga waajulibaara lajɛnw na. Ni weleweledalaw b’u seko bɛɛ kɛ ka nafa sɔrɔ kosɔbɛ dan na lɔgɔkun ka labɛnw na, o be kafokulu kɔrɔsibaga jija (1 Tes. 1:2, 3; 2:20). A bena na bɔ aw ka kafo ye kalo min na, miiri k’a filɛ n’i be se ka kɛ piyɔniye kɔrɔsigi ye. I be se k’i tɔgɔ di ka waajuli kɛ n’ale ni a muso ye wa? I be se ka taga bibulukalan kɛ n’ale wala n’a muso ye wa? A ka di u ye ka waajuli kɛ ni bɛɛ ye, a mana kɛ minw ye waajuli daminɛ kura ye wala minw tɛ se waajuli la ka ɲɛ.

• 

  U ladon. Yala i be se ka siyɔrɔ wala dumuni di u ma wa? N’i y’o kɛ, o b’a yira kafokulu kɔrɔsibaga n’a muso la ko i b’u kanu. U tɛ fɛnbabaw lo ɲinina.—Luka 10:38-42.

• 

  A ka ladiliw lamɛn ani u sira tagama. An be baara min kɛ Jehova ye, kafokulu kɔrɔsibaga b’an dɛmɛ ni kanuya ye walisa an k’a filɛ an be se k’o fisaya cogo min na. Tuma dɔw la, a be se k’an kolo bɛrɛbɛrɛ (1 Kor. 5:1-5). N’an b’an yɛrɛ majigi ka mɛnni kɛ a fɛ, o b’a ninsɔndiya.—Eburuw 13:17.

• 

  I ka waleɲumanlɔn yira. Kafokulu kɔrɔsibaga n’a muso ka jijaliw b’i nafa cogo min na, o fɔ u ye. Ele yɛrɛ be se k’o fɔ u ye wala i be se ka lɛtɛrɛ sɛbɛ k’o ci u ma.—Kɔlɔs. 3:15.