Waajuli kanpaɲiba min ɲɔgɔn ma deli ka kɛ duniɲa kɔnɔ!
A saan kɛmɛ ni kɔ ye nin ye, Jehova Seerew ye labɛnw kɛ ka kibaro duman jɛnsɛn (1 Kɔr. 9:23). O nana kɛ waajuli kanpaɲiba ye min ɲɔgɔn ma deli ka kɛ duniɲa kɔnɔ. O sen fɛ an be kibaro duman fɔ kaan kɛmɛ-kɛmɛ la, jamana 230 ni kɔ kɔnɔ (Mat. 24:14). Nka mun na o baara ye waajibiko ye do? Ani o be kɛra duniɲa kuru bɛɛ kɔnɔ cogo juman?
Videwo Les Témoins de Jéhovah : organisés pour prêcher la bonne nouvelle b’o ɲiningaliw jaabi: an ka baara min be kɛ duniɲa kɔnɔ, a b’o faan caaman yira k’a pereperelatigɛ. I kɛtɔ k’a filɛ, i ka miiri ɲiningali ninw kan: (1) An ka baara labɛnna cogo di ani jɔn lo b’a ɲɛminɛ? (2) Labɛnw kɛra k’an ka gafew sɛbɛ, k’u bayɛlɛma kaan wɛrɛw la, ka jaaw kɛ u kɔnɔ ani ka kasɛtiw ni videwow dilan. Cogo juman na o labɛnw be kɛ sababu ye ka kibaro duman lase mɔgɔw ma? (3) Baaraba min be kɛ ka an ka gafew dilan ani k’u ci kafow ma, o kuun ye mun ye? (Yuh. 17:3) (4) Sɛbɛ joli lo be dilan saan kelen kɔnɔ? (5) An ka gafew ye nɔɔ juman to mɔgɔw kan? (Heb. 4:12) (6) Minw tɛ mɛnni kɛ wala u tɛ yeli kɛ koɲuman mun lo be kɛra walisa k’u dɛmɛ Alako ta faan fɛ? (7) An ka baara musakaw be sara cogo di? (8) Betɛli ka biro minw be joli koo, waajuli koo ani lajɛnbaw koo ɲɛnabɔ, an be nafa juman sɔrɔ u ka baara la? (9) E min ye Jehova Seere ye, cogo di nin videwo be dɔ fara i ka waleɲumanlɔn kan nin koow la: (a) Jehova ka jɛnkulu be jijali min kɛra ka kibaro duman waaju? (b) Betɛli denbaya kɛmɛ ni kɔ minw be yen duniɲa kɔnɔ? (c) fɔrɔmasɔn min be di kɔrɔsibagaw ni misɔndenw ma? (d) nafa min b’a la ka tile daminɛ ni bibulusen dɔ lajɛli ye loon o loon, ani ka kafo ka lajɛnw labɛn lɔgɔkun o lɔgɔkun? (e) nafa minw b’a la taga an ka lajɛnw na? (f) alijɛnɛ bena na ni koo duman minw ye dugukolo kan? (Es. 11:9) (g) ka an seen don suman tigɛ baara la min be sen kan?—Yuh. 4:35.
Videwo nin filɛnen kɔ, i ka somɔgɔw, lɔnbagaw, viziti kuraw ani Bibulu kalandenw ye kuma diiman juman lo fɔ a koo la? Mun na i t’o videwo yira mɔgɔ wɛrɛ la ani ka kibaro duman fɔ a ye siɲɛ wɛrɛ do?—Mat. 28:19, 20.