An k’an hakili jigi kunmabɔsara koo la ni waleɲumanlɔn ye
1 Duniɲa kuru bɛɛ kɔnɔ, kerecɛnw bena Yesu ka cikan bato u kɛtɔ k’u lajɛn walisa k’u hakili jigi Yesu Krista ka saya koo la. O bena kɛ saan 2008, marisikalo tile 22nan na tileben kɔ samedi loon (Luka 22:19; 1 Kɔr. 11:23-26). An b’a fɛ k’an lajɛn k’a yira ko koo minw bɛɛ kɛra a saan 1975 ye nin ye, o waleɲumanlɔnba lo b’an na. A kɛtɔ ka kantigiya dafalen kɛ tɔɔrɔ kɔnɔ fɔɔ ka se saya ma gwengwe yiri kan, Yesu y’a Faa tɔgɔ saniya ani a ye Sitanɛ ka darabɔli kumaw jaabi cogo fisaman na.—Job 1:11; Ntal. 27:11.
2 Yesu ka joli bɔnnen ye layidu kura daga. O ye sira di hadamaden dafabaliw ma u ka kɛ Ala ka deenw ye walisa u ka jigiya sɔrɔ ka taga kuntigiya kɛ ni Krista ye a ka sankolo Masaya la (Jer. 31:31-34; Marka 14:24). Ka fara o kan, Ala y’a yira ka gwɛ ko a be hadamadenw kanu kosɔbɛ a kɛtɔ k’a Deen kanulen di saraka la u kosɔn i n’a fɔ Yesu yɛrɛ y’a ɲɛfɔ Nikodɛmɛ ye cogo min na.—Yuh. 3:16.
3 Mɔgɔ wɛrɛw weele u ka na: An ka Masaya Cidenyabaara, zanwiye ta, tun ye ladili di ko an k’an lɔnbagaw tɔgɔ sɛbɛ lisi kan ani an yɛrɛ k’u bɛɛ kelen-kelen weele u ka na. Yala i y’a daminɛ k’i ka lisi mɔgɔw weele wa? Yala i ye labɛn kɛ walisa k’i seen don bɛrɛbɛrɛ kanpaɲi na, min bena daminɛ marisikalo tile fɔlɔ la, ka mɔgɔw weele ka na Hakilijigi lajɛn na wa? Minw bena na o lajɛn na, u bena kalan lamɛn ka bɔ Bibulu kɔnɔ. O kalan be se k’u ka limaniya sabati kunmabɔsara la, o min be kɛ sababu ye ka ɲɛnamaya banbali sɔrɔ.—Rom. 10:17.
4 See be an minw bɛɛ ye, an ka labɛn kɛ ka kɔn ka na joona walisa ka mɔgɔw bisimila ni dusu diya ye minw sɔnna welelisɛbɛ kɛrɛnkɛrɛnnin ma. Komi mɔgɔw be caya Hakilijigi lajɛn na, a kɔrɔtalen lo an k’an janto kosɔbɛ mɔgɔ kuraw la ani minw be to ka na kafo ka lajɛnw na tuma kelen-kelen.
5 I dusukun cogoya labɛn: Gafenin Examinons les Écri-tures chaque jour—2008 ani Calendrier 2008 kɔnɔ, porogramu kɛrɛnkɛrɛnnin dɔ kɛra Bibulu kalangwɛ kama Hakilijigi lajɛn wagati la. A bena daminɛ marisikalo tile 17nan loon. N’i be miiri koo kɔrɔtalenw na, minw kɛra Yesu ka loon labanw na dugukolo kan, o bena i dɛmɛ k’i dusukun cogoya labɛn Hakilijigi lajɛn kama (Esd. 7:10). I kɛtɔ ka miiri o koow kan delili la, dɔ bena fara i ka waleɲumanlɔn kan ka taga Jehova n’a Dencɛ ta fan fɛ: olu ka kanuya kosɔn kunmabɔsara dira.—Zab. 143:5.
6 Komi Hakilijigi lajɛn be surunyana, an k’an yɛrɛ labɛn koɲuman ani an ka mɔgɔ wɛrɛw dɛmɛ u fana k’u yɛrɛw labɛn o kooba kosɔn. N’an b’an hakilijigi kunmabɔsara koo la ni waleɲumanlɔn ye, jɛnɲɔgɔnya min be an ni Jehova n’a Dencɛ cɛ, o barika bena bonya (2 Kɔr. 5:14, 15). O fana bena an lasun k’u ladegi, an kɛtɔ k’an yɛrɛ saraka tɔɔw kosɔn ni kanuya ye.—1 Yuh. 4:11.
[Study Questions]
1, 2. Mun na an ka kan k’an hakili jigi kunmabɔsara koo la ni waleɲumanlɔn ye?
3. Minw bena na Hakilijigi lajɛn na, u bena nafa sɔrɔ a la cogo di?
4. Mun na an ka kan ka kɔn ka na joona Hakilijigi lajɛn na?
5. I be se k’i dusukun cogoya labɛn cogo di o koo kama?
6. N’an b’an ka waleɲumanlɔn sabati kunmabɔsara koo la, o bena nɔɔ juman to an kan?