An bena Hakilijigi lajɛn welelisɛbɛw tilan-tilan duniɲa kuru bɛɛ kɔnɔ!
1. Kanpaɲi kɛrɛnkɛrɛnnin juman bena kɛ duniɲa kuru bɛɛ kɔnɔ ka kɔn Hakilijigi lajɛn ɲɛ?
1 “A’ ye [to ka] nin kɛ walisa ka aw hakili to ne la.” (Luka 22:19). Walisa ka Yesu ka cikan nin sira tagama, Jehova batobagaw ni makodon mɔgɔw bena u lajɛn marisikalo tile 30nan loon, saan 2010 kɔnɔ k’u hakili jigi Yesu ka saya la. Marisi tile 13-30 la, an bena Hakilijigi lajɛn welelisɛbɛ kɛrɛnkɛrɛnnin dɔ tilan-tilan duniɲa kuru bɛɛ kɔnɔ.
2. An be se ka welelisɛbɛ di mɔgɔw ma cogo di?
2 O sɛbɛ dicogo mɔgɔw ma: I be se k’o sɛbɛ sin lamɛnnikɛla ma walisa a ka jaa ye a kan. Ani, i k’a fɔ ko: “Marisi tile 30nan suu fɛ, duniɲa kuru bɛɛ kɔnɔ, mɔgɔ miliyɔn caaman bena u lajɛn walisa k’u hakili jigi Yesu ka saya la. Ne nana e n’i somɔgɔ weele ka na o lajɛn na. Aw ka welelisɛbɛ ye nin ye. I teriw fana be se ka na. O lajɛn bena kɛ yɔrɔ min na ani lɛri min na, o sɛbɛnen filɛ yan.” Ka kɛɲɛ ni koow cogoya ye, i be se k’a latigɛ ka Luka 22:19 kalan Bibulu kɔnɔ walisa k’a yira a tigi la k’o cikan basiginen be o vɛrise lo kan. An k’a to an hakili la ko komi an bena an ka kiinw bɛɛ boli-boli tile 18 dɔrɔn na, a ka ɲi an kana kuma caya.
3. An be se ka welelisɛbɛ di jɔn ni jɔn lo ma?
3 Ni kafo ka kiinw ka ca, diinan mɔgɔkɔrɔw be se k’a latigɛ ko welelisɛbɛw ka to mɔgɔw ye minw tɛ yen u ka soo aw tɛmɛko fɔlɔ la. N’a bɛnnen lo, an ka zurunali fara welelisɛbɛ kan k’u di mɔgɔw ma. An k’an janto ka welelisɛbɛ dɔ di an ka vizitiw ma, Bibulu kalandenw, baarakɛɲɔgɔnw, lakɔli filankuruw, somɔgɔw, sigiɲɔgɔnw ani an lɔnbaga wɛrɛw ma.
4. N’an be Jehova waleɲuman lɔn a ka kanuya kosɔn kunmabɔsara koo la, o bena an lasun ka mun kɛ?
4 An k’an yɛrɛ labɛn k’an seen don o kanpaɲi na bɛrɛbɛrɛ: Krista saya Hakilijigi wagati ye wagati ɲuman an fɛ ka dɔ fara an ka waajulibaara kan. Yala i be se ka porogramu kɛ walisa ka kɛ piyɔniye kɔrɔsigi ye wa? Yala i ka deenw wala i ka Bibulu kalanden dɔw be ɲɛtaga kɛra kosɔbɛ Alako ta fan fɛ wa? N’o lo, i k’a filɛ ni diinan mɔgɔkɔrɔw ye n’u ka koow dafara k’u seen don o kanpaɲi kɛrɛnkɛrɛnnin na i ko weleweledalaw, minw ma batise fɔlɔ. N’an be Jehova waleɲuman lɔn a ka kanuya kosɔn kunmabɔsara koo la, o bena an lasun ka kɛ Hakilijigi lajɛn na ani k’an seko kɛ ka mɔgɔ caaman weele ka fara an kan fana.—Yuh. 3:16.