Ɲɛtaga kɛ i ka cidenya baara la
1 An sankolola Faa dusu ka di n’a ka baarakɛlaw be ɲɛtaga kɛ Alako ta fan fɛ. O fana kɔrɔ ko ka ɲɛtaga kɛ walisa ka kɛ kibaro duman ciden kolɔnbaga setigi ye. Ciden Pol ye kɔrɔsibaga Timote jija a ka to k’a sɔbɛ don koow la walisa ‘mɔgɔw bɛɛ k’a ye ko a be taga ɲɛ.’ (1 Tim. 4:13-15). An bɛɛ ka k’an kan jija k’an ka cidenya baara kɛcogo fisaya hali minw ye weleweledala kolɔnbagaw ye an cɛma.
2 Laɲinita dɔw latigɛ i yɛrɛ ye: N’an b’a fɛ ka ɲɛtaga sɔrɔ, fɔɔ an ka laɲinita dɔw latigɛ an yɛrɛ ye. An be se ka laɲinita juman latigɛ an yɛrɛ ye do? An be se k’a ɲini ka baara kɛcogo lɔn kosɔbɛ ni an ka hakilimaya npan ye, o min ye Bibulu ye (Efɛs. 6:17). N’a sɔrɔ cidenya baara faan dɔ be yen an ka ɲi ka min kɛcogo fisaya, i n’a fɔ: ka waajuli kɛ siradaw la, telefɔni fɛ (n’a be se ka kɛ) wala jagokɛyɔrɔw la. An fana be se k’an jija ka to k’an ka viziti kuraw kɛ bɛrɛbɛrɛ. Laɲinita ɲumanba wɛrɛ ye k’a ɲini ka bibulukalanw daminɛcogo n’u kɛcogo fisaya.
3 Labɛnw: Kafo ka lajɛnw, sanko Ala ka Mara cidenyabaara lakɔli ani waajuliko lajɛn labɛnna walisa k’an dɛmɛ an ka ɲɛtaga sɔrɔ ka kɛ kibaro duman cidenw ye. An ka la a la ko an bena nafa bɛrɛbɛrɛ sɔrɔ n’an b’an jija ka lajɛnw labɛn, ka taga u la ani ka kalan sira tagama.—2 Kɔr. 9:6.
4 An fana ka kan ka ɲɔgɔn dɛmɛ ka ɲɛtaga sɔrɔ (Ntal. 27:17). An k’an ka baarakɛɲɔgɔn ka gafe yiracogo kɔrɔsi. O bena an dɛmɛ an k’an ta fisaya. Ka fara o kan, an ka kitabukalan kɔrɔsibaga be se ka labɛn kɛ walisa dɔ k’an dɛmɛ. Piyɔniye wala weleweledala kolɔnbaga dɔ k’an dɛmɛ walisa an ka cidenya baara ka den ani an ka ninsɔndiya sɔrɔ o la, o ye duga ye dɛ! Yala weleweledala kura dɔ be yen an ka kitabukalan jɛnkulu kɔnɔ wa? N’a sɔrɔ an be se k’a bɔ an yɛrɛ la k’a tigi weele a ka na baara kɛ n’an ye.
5 Baara kɔrɔtalenba min be kɛra bi, o ye kerecɛnya baara ye. An kɛtɔ ka “tanuli sarakaw bɔ” Jehova ye, an k’an seko bɛɛ lajɛnnen kɛ a ye (Heb. 13:15). N’an b’an jija ka ɲɛtaga kɛ an ka cidenya baara la, an bena kɛ baarakɛlaw ye, ‘maloya sababu tɛ minw na. An bena tiɲɛn kuma faranfasi cogo sɔbɛ la.’—2 Tim. 2:15.