Weleweledala kuraw degicogo waajuli la
1. Siɲɛ fɔlɔ min na i ye i seen don waajuli la, o ye mun lo kɛ i la?
1 Siɲɛ fɔlɔ min na i ye i seen don soo ni soo waajuli la, yala i hakili b’o la wa? N’a sɔrɔ i jaa siginen tun tɛ. N’i tun be waajuli kɛra n’i ka Bibulu kalanfa wala weleweledala wɛrɛ ye, siga t’a la i ninsɔn tun ka di ka dɛmɛ sɔrɔ u fɛ. Sisan, i kɛra ciden kolɔnbaga ye minkɛ, see be i ye ka weleweledalakuraw degi waajuli la.
2. Weleweledala kuraw mako b’a la ka mun lo lɔn?
2 Weleweledala kuraw mako b’a la k’a lɔn cogo min na baro be daminɛ ni mɔgɔ ye, baara be kɛ ni Bibulu ye, viziti kuraw be kɛ ani cogo min na bibulukalan be daminɛ ani ka kɛ. U ka kan ka waajuli kɛcogo sifaw lɔn fana, i n’a fɔ ka seereya kɛ siradaw la ani jagokɛyɔrɔw la. I ka ɲɛyirali n’i ka ladiliw fɛ, i be se k’u dɛmɛ k’u ka waajuli kɛcogo fisaya o fan fɛ.
3. An be se ka mɔgɔ wɛrɛw dɛmɛ cogo di an ka ɲɛyirali fɛ?
3 U degi i ka ɲɛyirali fɛ: Yesu ye waajuli kɛcogo ɲɛyira a ka kalandenw na (Luka 8:1; 1 Piɛrɛ 2:21). N’i ye labɛn kɛ ka taga waajuli kɛ ni weleweledala kura dɔ ye, i ka yiracogo nɔgɔman dɔ labɛn a be se ka min ladegi. O be se ka kɛ an ka gafew kɔnɔ yiracogo modɛli dɔ ye. A fɔ a ye ko ele lo bena kɔn ka kuma luu daa fɔlɔ wala daa fɔlɔ ni filanan na walisa i be min fɔ a k’o lamɛn. Daaw ni ɲɔgɔn cɛ, i be se k’a ɲininga fɛɛn min y’a to i ka yiracogo ɲɛna. O bena a dɛmɛ a k’a ye ko nafa b’a la ka jɛn ka waajuli kɛ ni mɔgɔ wɛrɛw ye. O la, a ka yiracogo kɔ, i mana ladili o ladili di a ma, a tɛna gwɛlɛya a ma ka sɔn o la.
4. Weleweledala kura ka yiracogo lamɛnni kɔ, an be se k’a dɛmɛ cogo di?
4 Ladiliw di u ma: Yesu ye cikanw di fana a ka kalandenw ma waajuli kɛcogo koo la (Mat. 10:5-14). I be se ka weleweledala kura dɛmɛ o cogo kelen na. Ni kuma sera ale ma, i k’a lamɛn koɲuman. O kɔ, aw mana bɔ o luu kɔnɔ, hali n’i y’a kɔrɔsi ko a ka yiracogo faan dɔw man fisa, i k’i kɔnɔ gwɛ k’a tando kosɔbɛ a ka yiracogo faan tigitigi dɔ kosɔn min ɲɛna. I be se ka kɔnɔni kɛ k’a filɛ n’a y’a ka yiracogo fisaya soda nata la ka sɔrɔ ka ladili di a ma. N’a sɔrɔ a jaa siginen tun tɛ dɔrɔn le. I kana ɲinɛ fana ko weleweledalaw bɛɛ tɛ ni see kelen ye. Ani tuma caaman na, mɔgɔ be se ka koo kelen kɛ ka ɲɛ cogoya caaman na.—1 Kɔr. 12:4-7.
5. An be se ka mun lo fɔ n’an y’a bɔ an yɛrɛ la ka ladiliw di?
5 Tuma dɔw la, weleweledala kura bena ladili ɲini i fɛ. Nka n’a m’o kɛ, i k’a bɔ i yɛrɛ la k’a dɛmɛ. I be se k’o kɛ nɛmɛnɛmɛ cogo di? Weleweledala kolɔnbaga dɔw b’a fɔ dɔrɔn ko “Yala ne be se ka ladili dɔ di i ma wa?” wala, “E be mun miiri i ka yiracogo koo la?” I fana be se k’a fɔ ko “Ne tun ye weleweledala kura ye tuma min na, a tun ka gwɛlɛ ne fɛ ka . . . , nka nin . . . lo ye ne dɛmɛ.” Tuma dɔw la, nafa b’a la aw ka gafe Comment raisonner lajɛ ɲɔgɔn fɛ. Walisa i ka ladiliw kana caya kojugu k’a degun, i k’a ladi a ka yiracogo faan kelen dɔrɔn koo la.
6. “Nɛgɛ bɛ nɛgɛ da diya” cogo di waajuliko ta fan fɛ?
6 “Nɛgɛ bɛ nɛgɛ daa diya”: Timote tun ye kibaro duman waajulikɛla kolɔnbaga ye. Nka, Pol y’a jija ko a ka to k’a sɔbɛ don mɔgɔw kalanni na ani a ka taga ɲɛ fana (1 Tim. 4:13, 15). Hali n’a y’a sɔrɔ ko i ye waajuli kɛli daminɛ kabi saan caaman, i man kan abada k’i ka waajuli kɛcogo fisayali dabila. I be waajuli kɛ ni weleweledala minw ye, i k’a ɲini k’i yɛrɛ degi u fɛ hali n’u tɛ bɛrɛ lɔn waajuli la. Ani, i kana sigasiga ka tɔɔw dɛmɛ ni ɲumanya ye sanko n’u ye weleweledala kuraw ye. O la, u bena kɛ kibaro duman ciden setigiw ye.—Ntal. 27:17.