Loon kɛrɛnkɛrɛnnin bena latigɛ ka bibulukalanw kofɔ mɔgɔw ye

¹ K’a ta zanwiyekalo la, kafo kelen-kelen bɛɛ bena wikɛni dɔ sugandi kalo o kalo, walisa k’u jija sɔbɛ la ka bibulukalanw kofɔ mɔgɔw ye. O wikɛni be se ka kɛ kalo wikɛni fɔlɔ ye. O baara be se ka kɛ samedi wala dimansi loon na, loon min ka fisa kafodenw ma. O loon na hali ni lamɛnnikɛla dɔ ma sɔn bibulukalan ma, weleweledala be se ka gafe Qu’enseigne ? kofɔ wala ka zurunali kuraw to a tigi fɛ. Diinan mɔgɔkɔrɔw ni kɔrɔsigi cidenw bɛɛ ka kan ka labɛn kɛ walisa k’u seen don bɛrɛbɛrɛ o baara la ani ka weleweledalaw dɛmɛ ka bibulukalanw daminɛ.

² Waajuliko ɲɛnabɔbagaw jɛn-kulu bena a latigɛ wikɛni min na loon bena sugandi walisa ka bibulukalanw kofɔ. Tuma kelen-kelen na u ka kan ka weleweledalaw hakili jigi walisa u k’u yɛrɛw labɛn ani ka jijali sɔbɛ kɛ ka bibulukalanw kofɔ soo ni soo ani tuma min na u be segi ka taga bɔ makodon mɔgɔw fɛ.

³ Yɛrɛ labɛn cogo: Ladili minw b’an dɛmɛ ka bibulukalanw daminɛ ni mɔgɔw ye, an be se k’u sɔrɔ An ka Masaya Cidenyabaara kɔnɔ saan 2006, feburukalo ta ɲɛɛ 5, 7-9 ani gafe Comment raisonner kɔnɔ, ɲɛɛ 12nan. Dɔw be se k’a latigɛ ka baara kɛ ni sɛbɛnin dɔ ye, i n’a fɔ Yala i b’a fɛ ka tiɲɛn lɔn wa? Saan 2007, utikalo ka An ka Masaya Cidenyabaara be ladiliw di a ɲɛɛ 3nan na fana k’a yira cogo min na an be se ka bibulukalanw daminɛ ni mɔgɔw ye minw tun sɔnna zurunaliw la. Porogramu bena kɛ walisa diinan mɔgɔkɔrɔw wala kɔrɔsigi cidenw ka waajulibaara lajɛn ɲɛminɛ miniti 10-15 kɔnɔ. O lajɛn na, ladili nafaman minw b’an dɛmɛ ka bibulukalanw daminɛ, baro wala yiracogo ka kan ka kɛ u la kelen wala fila kan.

⁴ Ayiwa, mɔgɔ bɛɛ tɛna sɔn bibulukalan ma wala ka sɔn ka kalan kɛ wagati jan kɔnɔ. O man kan k’an bali ka bibulukalanw kofɔ mɔgɔw ye, sabu mɔgɔ minw be i ko sagaw, Jehova lo b’u sama ka na a ka ɔriganisasiyɔn kɔnɔ ( Yuh. 6:44). An ka baara tɛ daan dɔrɔn ka tiɲɛn kisɛw dan , nka an ka kan k’u sɛnɛ ani k’u sɔn. O kɔrɔ ko an ka bibulukalanw kɛ ni mɔgɔw ye minw b’a fɛ ka Jehova lɔn. N’an b’o kɛ, an bena kɛ Ala baarakɛɲɔgɔnw ye.—1 Kɔr. 3:9.