Bibulukalan koo to i hakili la

1. Yesu ka cii min be sɔrɔ Matiyu 28:19, 20 kɔnɔ, an mun kɛtɔ lo be o dafa?

¹ Yesu ye cii di an ma ko an ka mɔgɔw ‘kɛ ale ka kalandenw ye, . . . ka u kalan.’ (Mat. 28:19, 20). O kama, an ka bibulukalan koo to an hakili la tuma bɛɛ. Wikɛni min sugandira ka bibulukalan kofɔ mɔgɔw ye, an kana dan o dɔrɔn ma. Ladili nunu bena an dɛmɛ o koo la.

2. An be se ka bibulukalan kofɔ mɔgɔ jumanw lo ye?

² An ka bibulukalan kofɔ: N’an be to ka bibulukalan kofɔ mɔgɔw ye an bena sababu caaman sɔrɔ ka se ka dɔ daminɛ (Waaj. 11:6). Yala i y’a ɲini ka sin ka bibulukalan daminɛ ni mɔgɔ ye ka ye wa? Etazini jamana na, kafo dɔ y’a sɔbɛ don k’o lo kɛ kalo kelen kuru bɛɛ kɔnɔ. U ye bibulukalan 42 daminɛ. O kɛra ɲagaliba ye u fɛ dɛ! I be to ka taga bɔ makodon mɔgɔ minw ye, kana a miiri ko u b’a lɔn ka ban ko i b’a fɛ ka bibulukalan kɛ n’u ye. N’i segira ka taga siɲɛ wɛrɛ, mun na i tɛ bibulukalan kofɔ u ye? N’u banna, o tɛ basi ye. I be se ka to ka na baro kɛ n’u ye Alakow kan. Yala i ye i sigiɲɔgɔnw, somɔgɔw, baarakɛɲɔgɔnw wala lakɔli filankuruw ɲininga n’u b’a fɛ ka bibulukalan kɛ n’i ye wa? I be se fana k’i ka Bibulu kalandenw ɲininga n’a bena diya u teri wala u somɔgɔ dɔw ye ka bibulukalan kɛ.

3. Baarakɛminan ɲuman juman b’an fɛ ka se ka bibulukalanw daminɛ ani an be baara kɛ n’a ye cogo di?

³ Baarakɛminan ɲuman: Sɛbɛ ɲuman min be se k’an dɛmɛ ka bibulukalanw daminɛ, o ye nin ye: Yala i b’a fɛ ka tiɲɛn lɔn wa? I be se k’a di mɔgɔw ma n’u sɔnna gafe wɛrɛ la wala n’u ma sɔn gafe si la. I be se fana k’a di mɔgɔw ma waajuli kɛtɔ jago kɛyɔrɔw la, siradaw la, n’i be lɛtɛrɛw ci ani viziti kuraw kɛtɔ. Mɔgɔ minw tɛ u ka soo, i be se k’a dɔ to u ye fana. Mun na i tɛ a dɔw ta i kun n’i be bolifɛn dɔ kɔnɔ ni mɔgɔ wɛrɛw ye, sanni kɛyɔrɔ la ani baara kɛyɔrɔ la? A ɲɛɛ laban be an ka bibulukalan kɛcogo ɲɛfɔ ani a be gafe Bibulu ka kalana kofɔ.

4. An be se ka bibulukalan daminɛ cogo di ni sɛbɛnin Tiɲɛn lɔn ye?

⁴ N’i ye sɛbɛnin di mɔgɔ dɔ ma, i be se k’a ɲɛɛ fɔlɔ ka ɲiningaliw yira a la ani k’a ɲininga ko: “I b’a fɛ k’o ɲiningaliw la juman jaabili sɔrɔ?” O kɔ, i k’o ɲiningali jaabili lajɛ n’a tigi ye sɛbɛnin kɔnɔ, ani ɲɛɛ laban min be an ka bibulukalan kɛcogo ɲɛfɔ i k’o kalan wala i k’o lakali. Kunnafɔni wɛrɛ be sɔrɔ gafe Bibulu ka kalan yɔrɔ min na ka ɲɛsin o koo ma, i be se k’o yira a la, k’o gafe di a ma ani ka labɛn kɛ ka segi ka na taga ɲɛ ni baro ye.

5. Mun na an ka kan ka bibulukalan koo to an hakili la?

⁵ Mɔgɔw bele be sɔrɔ an ka kiinw kɔnɔ minw b’a fɛ k’a lɔn kalan tigitigi min be sɔrɔ Bibulu kɔnɔ. N’an be bibulukalan koo to an hakili la, an bena ninsɔndiya ka sababu caaman sɔrɔ ka se ka mɔgɔ wɛrɛw dɛmɛ u ka ɲɛnamaya sira ta.—Mat. 7:13, 14.

[Footnotes]