Tagamacogo min be nɔɔrɔ la Ala kan
1. Mun na mɔgɔw ka teli ka Jehova Seerew faranfasi k’u lɔn n’u be taga tile saba lajɛnbaw la?
1 N’an be taga tile saba lajɛnbaw la, mɔgɔw ka teli k’an faranfasi k’an lɔn. Tile saba lajɛnbaw be kɛ dugu minw kɔnɔ, u caaman kɔnɔ, zurunaliw ka teli k’a fɔ jama ye ko Jehova Seerew nana. Jama b’a kɔrɔsi ko lajɛnba tagamasiɲɛ sɛbɛw be lonanw ka faniw kan. An tagamacogo ɲuman be se ka nɔɔrɔ la an ka Ala kan dugu kɔnɔ. An ka hakilijigiko dɔw lajɛ minw bena an dɛmɛ k’o kɛ.—1 Piɛrɛ 2:12.
2. K’an to dugu kɔnɔ, an be se ka nɔɔrɔ la Ala kan cogo di n’an ka fani doncogo ka ɲi?
2 Fani doncogo bɛnnin: N’an be taga lajɛnba la, an ka fani doncogo ɲuman ka teli ka mɔgɔw kabakoya. Nka wagati wɛrɛw la fana, an ka fani doncogo be se ka nɔɔba to an filɛbagaw kan. O be se ka kɛ n’an be dumuni kɛra ɛrɛsitoran na, n’an be sanni kɛra magazɛnw na, wala n’an be koo wɛrɛ ɲɛnabɔra dugu kɔnɔ. O koow sen fɛ, an tɛ lajɛnba faniw don ka bɔ. Nka an man kan ka fani don cogo ferekenin na. An ka fani doncogo ka kan ka danbe la an kan ani k’a yira ko an majiginin lo. Mɔgɔw ka kan k’a ye ko an ni dannabaliw tɛ kelen ye (Rom. 12:2). Lajɛnba tagamasiɲɛ sɛbɛ ka kan ka kɛ an ka fani kan sabu a be lajɛnba kofɔ mɔgɔw ye, a be sababu di an ma ka seereya kɛ, ani a b’a to an balimaw k’an faranfasi k’an lɔn.
3. An be se k’a yira cogo di ko an be muɲuli kɛ ani ko an be mɔgɔw bonya?
3 Muɲuli ni mɔgɔ bonyacogo: Bi duniɲa kɔnɔ, mɔgɔ caaman b’u yɛrɛ nafa dɔrɔn ɲini ani waleɲumanlɔn t’u la. N’an be muɲuli kɛ ani n’an be mɔgɔw bonya, o ye hɛɛrɛko ye an filɛbagaw fɛ i n’a fɔ ɛrɛsitoran baarakɛlaw (2 Tim. 3:1-5). N’an be sigiyɔrɔw marala mɔgɔw ye wala n’an be tugutugu ɲɔgɔn kɔ ka taga gafe kuraw minɛ, an kana an yɛrɛ nafa dɔrɔn ɲini nka an k’an janto mɔgɔ wɛrɛw la fana (1 Kɔr. 10:23, 24). Cɛɛ dɔ siɲɛ fɔlɔ tagara an ka tile saba lajɛnba dɔ la. Lajɛnba banni kɔ, o cɛɛ y’a fɔ ko: “Kalan minw kɛra o loon na, ne hakili tɛ o si la tugun. Nka, Jehova Seerew tagamacogo ye nɔɔba to ne kan.”
4. Ni see b’an ye, mun na a ka ɲi an k’an yɛrɛ di ka baara kɛ gwansan tile saba lajɛnba la?
4 An k’an yɛrɛ di ka baara kɛ gwansan: K’i yɛrɛ di ka baara kɛ gwansan, o ye kerecɛn sɔbɛw ka tagamasiɲɛ dɔ ye (Zab. 110:3). I be se k’i yɛrɛ di ka baara kɛ tile saba lajɛnba yɔrɔ la wa? Tile saba lajɛnba dɔ la, balimacɛ ni balimamuso 600 ɲɔgɔn y’u yɛrɛ di ka yɔrɔ saniya sanni lajɛnba ka daminɛ. O yɔrɔ ɲɛmɔgɔw y’a fɔ ko: “An ma deli ka kabako nin ɲɔgɔn ye! Mɔgɔ tɛ se ka la a la ko mɔgɔ nunu bɛɛ y’u yɛrɛ di ka baara kɛ gwansan.” An kɔrɔtɔnin lo ka kɛ saan 2013, tile saba lajɛnba la. O bena sababu di an ma ka lamɛnni kɛ ani ka lɔnniya sɔrɔ Ala fɛ. An bena sababu sɔrɔ fana ka nɔɔrɔ la a kan.