Aw Ka Ɲiningaliw Jaabiliw

◼ Yala weleweledalaw ka kan ka baara kɛ caaman ni ɛntɛrɛnɛti ye walisa ka seereya kɛ wala ka bibulukalan kɛ ni jamana wɛrɛ mɔgɔw ye, u tɛ minw lɔn wa?

Jamana dɔw la, faamanw ye bali sigi an ka waajuli baara la. Jamana wɛrɛw la fana, weleweledalaw man ca. Balima dɔw tɛmɛna ɛntɛrɛnɛti fɛ ka bibulukalanw sɔrɔ o jamanaw na. Nafa ɲuman sɔrɔla u dɔw la. Nka, ni weleweledalaw be e-mail ci wala ka baro kɛ ni mɔgɔw ye ɛntɛrɛnɛti kan u tɛ minw lɔn, farati b’o la. (An ka Masaya Cidenyabaara ɲɛɛ 3nan lajɛ, saan 2007, zuwekalo ta.) Tiɲɛn lo ko u ka laɲinita ye ka Masaya kibaro lase mɔgɔ kɔnɔgwɛw ma. Nka, o kumaɲɔgɔnya be se k’a to balimaw be jɛnɲɔgɔnya kɛ ni mɔgɔ juguw ye hali minw be murutili kalanw kɛ (1 Kor. 1:19-25; Kɔlɔs. 2:8). Ka fara o kan, jamana minw na bali sigira waajuli baara la, o kumaɲɔgɔnya be se ka balimaw niin bila farati la n’a y’a sɔrɔ ko faamanw be e-mail ni lɛtɛrɛw kɔnɔkow kɔrɔsi. O kama, balimaw man kan ka tɛmɛ ɛntɛrɛnɛti fɛ ka mɔgɔw ɲini jamana wɛrɛw la walisa ka kibaro diiman lase u ma.

An be se ka tɛmɛ sababu dɔ fɛ ka seereya kɛ lonan dɔ ye min bɔra jamana wɛrɛ la. Ni Betɛli ma sira di an ma, an man kan k’a ɲini k’a tigi dɛmɛ Alako ta fan fɛ n’a kɔsegira a ka jamana na. Nka, an be se k’a yira a tigi la cogo min na a be se ka tɛmɛ jw.org fɛ, ka kunnafoni wɛrɛw sɔrɔ wala ka kaan bɔ Betɛli ma a ka jamana na. An be se fana k’a jija a ka taga Masaya boon dɔ la a sigida la. Tiɲɛn lo ko Masaya boonw tɛ yen jamana dɔw la. N’a b’a fɛ Jehova Seere dɔ ka na bɔ a ye a sigida la, an ka sɛbɛ nin dafa ani k’a di kafo ka sekeretɛri ma: Personne qui demande à être visitée (S-43). Sekeretɛri bena tɛmɛ jw.org fɛ k’o sɛbɛ ci. Betɛli min be waajuli baara koo ɲɛnabɔ o jamana na, ale b’o yɔrɔ ka koow cogoya lɔn tigitigi ani a be se k’a tigi dɛmɛ bɛrɛbɛrɛ Alako ta fan fɛ.—An ka Masaya Cidenyabaara nunu lajɛ: saan 2014, zuwɛn ta, ɲɛɛ 7nan; saan 2011, novanburu ta, ɲɛɛ 2nan.

N’a sɔrɔ an be deli ka taga bɔ mɔgɔ dɔ ye ani a tigi yɛlɛmana jamana wɛrɛ la. A be se ka kɛ fana ko an be bibulukalan kɛra ni jamana wɛrɛ mɔgɔ dɔ ye an ye min lɔn ɛntɛrɛnɛti dama fɛ. N’o lo, cikan minw fɔra ka tɛmɛ, an ka kan k’olu sira tagama. Nka, an be se ka to k’a tigi dɛmɛ Alako ta fan fɛ fɔɔ an balimaw be kaan bɔ a ye. N’a tigi be jamana dɔ la yɔrɔ min na bali sigira an ka waajuli baara la, an ka kan ka kɔrɔsili kɛ kosɔbɛ n’an be tɛmɛ lɛtɛrɛ, telefɔni, wala e-mail fɛ ka baro kɛ Bibulu koo la.—Mat. 10:16.