Nafoloba kalifara an ma
1 Ala tun ye cii min di ciden Pol ma a ka waajuli kɛ, a tun b’o jati fɛɛnba ye ani a y’a fɔ k’o ye “nafoloba” ye (2 Kɔr. 4:7). A ye gwɛlɛyaw ni kɔrɔbɔliw muɲu a kɛtɔ k’o cii dafa. A tun mana mɔgɔ o mɔgɔ sɔrɔ, a tun tɛ sɛgɛn k’a tigi waaju. A ye tagama gwɛlɛn caaman kɛ siraw kan ani kurun kɔnɔ farati la. An be se ka Pol ladegi cogo di k’a yira ko an ka cidenya baara ka di an ye kosɔbɛ (Rom. 11:13)? Mun lo be an ka cidenya baara kɛ nafoloba ye min ɲɔgɔn tɛ yen?
2 Nafolo fisaman: Tuma caaman na, duniɲa nin ka nafolow be na nin dusukasi caaman ye. U tɔnɔ tɛ bɛrɛ ye, wala u tɛ mɛɛn mɔgɔ bolo. Nka an ka cidenya baara be an ni mɔgɔ wɛrɛw nafa ni kodiimanw ye minw be mɛɛn (1 Tim. 4:16). A be mɔgɔ kɔnɔgwɛw dɛmɛ u ka se ka Jehova lɔn, u ka yɛlɛmani bɛnnenw kɛ u ka ɲɛnamaya kɔnɔ, ani u ka ɲɛnamaya banbali jigiya sɔbɛ sɔrɔ (Rom. 10:13-15). An kɛtɔ k’an ka cidenya baara jati fɛɛnba ye, an be kuun sɔrɔ an ka ɲɛnamaya la ka wasa, a be kɛ an ɲɛ na ko an be baara nafaman lo la, ani an be jigiya diiman sɔrɔ siniɲasigi koo la.—1 Kɔr. 15:58.
3 An k’a yira ko an be an ka cidenya baara jati nafoloba ye: An labɛnnen be ka saraka min kɛ fɛɛn dɔ kama, o b’a yira an b’o fɛɛn tɔgɔla jati cogo min na. Nɛɛma lo k’an ka wagati n’an ka fanga ta ka Jehova tando dɛ! (Efɛs. 5:16, 17) An b’an ka wagati kɛ cogo min na, o ka kan k’a yira ko an be Alakow jati ka tɛmɛ bolofɛnw kan. Komi cira nafamanba b’an fɛ ka lase mɔgɔw ma, an ka ɲi k’o fɔ ni dusudiya ye ani ka labɛn ka kibaro duman fɔ sababuw bɛɛ la.
4 Fɛɛn nafamanbaw tɛ deli ka dogo. Nka u be yira kɛnɛ kan walisa mɔgɔ wɛrɛw k’u mafilɛ. N’an be an ka cidenya baara jati i ko nafoloba, a bena kɛ an ka ɲɛnamaya fanba dɔ ye (Mat. 5:14-16). An dusukun falen waleɲumanlɔnya la, an ka ciden Pol ladegi. Ani, an ka tɛmɛ sababu bɛɛ fɛ k’a yira ko an be an ka cidenya baara jati fɛɛnba ye tiɲɛn na, ko nafoloba lo an fɛ.