A ɲini k’i ka waajuli kɛcogo fisaya: Gafe Bibulu ka kalan yiracogo

Mun na a kɔrɔtanin lo: Gafe Bibulu ka kalan y’an ka baarakɛminan jɔnjɔn ye, an be basigi min kan ka mɔgɔw kalan. Nka, sanni an ka se ka bibulukalan daminɛ ni mɔgɔ ye, an ka kan k’o gafe to a tigi fɛ fɔlɔ. O kama, waajuli kɛtɔ, an bɛɛ ka ɲi ka banba ka se koɲuman gafe Bibulu ka kalan yiracogo la (Talenw 22:29). Yiracogow ka ca. Nka, yiracogo min ka fisa weleweledalaw fɛ, u ka ɲi k’o lo kɛ.

A kɛcogo:

Ɲiningali dɔ kɛ min bena a to i lamɛnbaga b’a mako don baro la. O kɔ, sapitiri min b’o ɲiningali jaabi, i k’o yira a la gafe kɔnɔ. Ɲiningali minw be sapitiri kelen kelen bɛɛ daminɛ na, i yɛrɛ be se k’u la kelen sugandi. Mɛnni kɛ lamɛnnikɛla fɛ. O kɔ, vɛrise bɛnnin dɔ kalan. Dakun min be kuma o barokun koo la, o yira a tigi la gafe kɔnɔ. Aw yɛrɛ be se ka baro kɛ o dakun kan dɔɔni.
Kɛcogo wɛrɛ: Basigi gafe ɲɛɛ 3-7 kan, ka baro nege don lamɛnnikɛla la. O kɔ, Bibulu ka jaabili be sɔrɔ yɔrɔ min na gafe kɔnɔ, o yira a la. Ɲɛyirali fɛ, i be se ka kuma balawoko dɔ koo la min kɛra a ma mɛɛn ani min kofɔra arajo, telewisɔn wala zurunaliw kɔnɔ. O kɔ, i be se k’a fɔ a tigi ye ko ɲiningali minw be sɔrɔ gafe ɲɛɛ 3 kan, mɔgɔ caaman y’u yɛrɛ ɲininga u la. Wala i be se k’a fɔ ko, Bibulu be jigiya ɲuman min di an ma siniɲasigi koo la, an nana o lo ɲɛfɔ a ye. O kɔ, jaa minw be sɔrɔ gafe ɲɛɛ 4-5 kan, o yira a tigi la ani a ɲininga ko: “Layidu minw kofɔra yan, e b’a fɛ juman lo ka dafa e ɲɛɛ na?” I be se fana k’a fɔ ko, ɲiningali minw be mɔgɔ dabali ban, i be mɔgɔw dɛmɛna k’u jaabili sɔrɔ. O kɔ, o ɲiningaliw yira a tigi la gafe ɲɛɛ 6nan jukɔrɔ. A ɲininga ko ale b’a fɛ k’u la juman lo jaabili sɔrɔ.
Sin ka bibulukalan daminɛ ni mɔgɔw ye. I be se k’a fɔ ko: “An be gafe nin yirala mɔgɔw la. A labɛnna bibulukalan lo kama. I delila k’a ye wa? [Mɛnni kɛ a tigi fɛ.] Ni miniti damanin b’i fɛ, a bena diya n’ ye ka bibulukalan kɛcogo ɲɛyira i la n’i tɔgɔla Bibulu ye.”

Nin kɛ ka filɛ kalo nin na:

Gwa kɔnɔ batoli tuma na, a’ ye ɲɛyirali dɔ kɛ ka filɛ.
I ye yiracogo minw labɛn, i k’u fɔ weleweledala tɔɔw ye waajuli kɛtɔ n’u ye (Talenw 27:17). Ni nafa bɛrɛ tɛ sɔrɔ i ka yiracogow la, i k’u yɛlɛma.