A ɲini k’i ka waajuli kɛcogo fisaya: Kuma tigɛbagaw jaabicogo

Mun na a kɔrɔtanin lo: Miiri k’a filɛ, i b’a lɔn ko yanni dɔɔni, balawo dɔ bena cun mɔgɔw kan. U bena sa n’u ma boli ka dogoyɔrɔ ɲini. I tagara i sigiɲɔgɔn dɔ fɛ ko i b’a lasɔmi. Nka, a be kuma tigɛ i daa ko ale bolo degunnin lo. I kɔni tɛna i fari faga kelen ani ka taga k’a to yen! An ka kiinw kɔnɔ, mɔgɔ caaman be ban k’an lamɛn. U t’a lɔn ko an ka kibaro be se k’u niin kisi. An tagara bɔ u ye tuma min na, n’a sɔrɔ u ɲɛɛ gwannin tun lo koo dɔ la (Mat. 24:37-39). N’a sɔrɔ fana u ye ngalon kuma dɔw mɛn an koo la minw y’u lafili (Mat. 11:18, 19). A be se ka kɛ fana ko u b’a miiri ko diinan minw ka kɛwalew man ɲi, an ni olu bɛɛ ye kelen ye (2 Piyɛri 2:1, 2). A daminɛ na, ni an lamɛnbaga m’a mako don, an kana an fari faga joona joona.

A kɛcogo:

• Sanni i ka taga waajuli kɛ soo ni soo, i ka wagati dɔɔni ta ka miiri k’a filɛ mɔgɔw be se ka min fɔ walisa ka kuma tigɛ i daa. A filɛ i bena u jaabi cogo min na.

• N’i lamɛnbaga ye kuma dɔ fɔ walisa k’i bali ka kuma, a ɲini ka taga ɲɛ ni baro ye nɛmɛnɛmɛ. N’a sɔrɔ i be se k’o kɛ, i kɛtɔ k’a tigi tando. N’a y’a fɔ ko ale be diinan dɔ la ka ban, i be se k’a jaabi ko: “Minw b’u mako don Alakow la i n’a fɔ ele, ne be olu ɲɔgɔn lo ɲinina.” Tuma dɔw la, n’i ye lamɛnbaga ka dusukunnataw n’a ka koow cogoya faamu, o be se k’i dɛmɛ i ka seereya kɛ a tigi ye. N’a tigi ko a bolo degunnin lo, i be se k’a fɔ ko: “Ne b’i faamu. Nka sanni n’ ka taga, n’ b’a fɛ ka sɛbɛ nin d’i ma.” N’a tigi ko ale mako t’a la, i be se k’a ɲininga ko: “I b’a fɛ k’a fɔ ko i mako tɛ Bibulu koo la wala i mako tɛ diinanw lo koo la?

• I ka hakili sɔrɔ. I hakili to a la ko Jehova tɛ mɔgɔw waajibiya ka lamɛnni kɛ (Deter. 30:19). Mɔgɔw bɛɛ kelen kelen bena lɔ n’a yɛrɛ kunko ye Jehova ɲɛɛ kɔrɔ (Gal. 6:5). N’a tigi lɔra kelen kan, a ka fisa i ka taga. N’an b’an janto a dusukunnataw la, n’a sɔrɔ o bena kɛ sababu ye a be sɔn ka lamɛnni kɛ an balima dɔ fɛ siɲɛ wɛrɛ.—1 Piyɛri 3:15.

Nin kɛ ka filɛ kalo nin na:

• N’i bɔra kuma tigɛbaga dɔ kɔrɔ, baro kɛ n’i ka waajulikɛɲɔgɔn ye k’a filɛ i tun be se k’a tigi jaabi cogo fisaman min na.