Aw Ka Ɲiningaliw Jaabiliw

◼ Jɔn lo ka kan ka kupɔn dafa k’a ci wala ka tɛmɛ ɛntɛrɛnɛti fɛ ka fɛɛn dɔ deli?

Tuma caaman na kupɔn be sɔrɔ an ka sɛbɛw kan mɔgɔ be se ka min dafa k’a ci tɔnbolo ma walisa ka sɛbɛ dɔ deli wala k’a ɲini ko Jehova seerew ka na bɔ ale ye. Ka fara o kan, mɔgɔ be se ka tɛmɛ an ka ɛntɛrɛnɛti www.watchtower.org fɛ ka bibulukalan deli. O labɛnw ye mɔgɔ caaman dɛmɛ u ka se ka tiɲɛn lɔn. Nka, weleweledalaw mana tɛmɛ o fɛɛrɛw fɛ walisa dɛmɛ ka lase u somɔgɔw wala mɔgɔ wɛrɛw ma Alako ta fan fɛ, o lo be na ni gwɛlɛya dɔw ye.

Tɔnbolo ye sɛbɛw ci mɔgɔw ma k’a sɔrɔ u m’o deli. A ma diya u dɔw ye ani u y’a fɔ ko an ka ɔriganisasiyɔn b’u tɔɔrɔ ani ko u tɔgɔw be lisi sifa dɔ kan an fɛ walisa sɛbɛw ka to ka ci u ma. A ɲinina weleweledala dɔw fɛ k’u ka taga bɔ mɔgɔ dɔ ye k’a sɔrɔ o tigi yɛrɛ t’a kala ma. A dimina min kɛ, o kɛra degun ye o weleweledalaw fɛ. O kama, makodon mɔgɔw yɛrɛ lo ka kan ka fɛɛnw ɲini ɛntɛrɛnɛti kan wala kupɔn fɛ, weleweledalaw man kan k’o kɛ mɔgɔ wɛrɛw tɔgɔ la. Ni mɔgɔ dɔ tɛmɛna o fɛɛrɛw fɛ ka fɛɛn dɔ deli mɔgɔ wɛrɛ ye, n’an bɔra o kala ma, an t’o tigi jaabi.

Ayiwa, an do be se k’an somɔgɔw wala an lɔnbaga dɔw dɛmɛ cogo di Alako ta fan fɛ? N’i b’a fɛ u ka sɛbɛ dɔ sɔrɔ, n’a sɔrɔ i be se k’a ci u ma kado ye. O tigi be se k’a mako don ani a b’a fɛ Jehova Seerew ka na bɔ a ye. N’i t’a lɔn i bena kaan bɔ cogo min na kafo ka diinan mɔgɔkɔrɔw ma a sigida la, i ka kan ka sɛbɛ nin dafa k’a di i ka kafo ka sekeretɛri ma: Veuillez suivre l’intérêt (S-43). Ale bena a lajɛ ani k’a ci tɔnbolo ma. Nka, n’a tigi be kaso la, dɔgɔtɔrɔso wala dɔrɔgiminlaw furakɛyɔrɔ la, i man kan ka kaan bɔ tɔnbolo ma a koo la. I kɔni be se k’a jija ale yɛrɛ ka kaan bɔ balimaw ma minw be seereya kɛ o yɔrɔw la wala a yɛrɛ ka sɛbɛ ci tɔnbolo ma.