Waajuli kɛtɔ, i k’i yɛrɛ kɔrɔsi
1. Mun na a kɔrɔtanin lo an k’an yɛrɛ kɔrɔsi waajuli kɛtɔ?
1 I ko “sagaw . . . waraw cɛma,” Ala sagokɛlaw be waajuli kɛ “mɔgɔ tulo gɛlɛnw cɛma.” (Mat. 10:16; Fil. 2:15). An ka teli ka kibaro jugu dɔw mɛn ko dugu ɲagaminin lo, ko jama diminin lo, wala ko benkannikɛlaw ye dɔ minɛ. O bɛɛ b’a yira ko mɔgɔ juguw be ‘juguyara ka taga ɲɛ.’ (2 Tim. 3:13). Bibulu kɔnɔ miiriya jɔnjɔn jumanw sira tagamani bena an dɛmɛ an k’an yɛrɛ kɔrɔsi waajuli kɛtɔ?—Mat. 10:16.
2. Koo jumanw kosɔn a ka fisa an ka bɔ kiin dɔ kɔnɔ ani ka taga waajuli kɛ yɔrɔ wɛrɛ la?
2 An ka hakili sɔrɔ: Ntalenw 22:3 b’a fɔ ka gwɛlɛya ko n’an ye koo jugu natɔ ye, an ka hakili sɔrɔ k’an “yɛrɛ dogo.” To ka kɔrɔsili kɛ! Hɛɛrɛ min be i sigida la, o be se ka bari ka nagasi. I be se k’a ye ko polisiw be munumununa kiin kɔnɔ, wala jama be cayara sira kan. Tuma dɔw la, sigiɲɔgɔn ɲuman dɔ be se k’an lasɔmi. Sanni an k’an seen sumaya k’a ɲini ka koow sɛnsɛn, a ka fisa an ka teliya ka bɔ yen ani ka taga waajuli kɛ yɔrɔ wɛrɛ la.—Ntal. 17:14; Yuh. 8:59; 1 Tes. 4:11.
3. Waajulikɛla 4:9 ka miiriya sira be tagama waajuli la cogo di?
3 An ka jɛn ka waajuli kɛ: Waajulikɛla 4:9 b’a fɔ ko “Mɔgɔ fila ka fisa ni mɔgɔ kelen ye.” Hali n’i delinanko tun lo ka waajuli kɛ i kelen hɛɛrɛ la, yala i bele be se k’o kɛ bi ni farati ma kɛ i seen kɔrɔ wa? Yɔrɔ dɔw la, i be se k’o kɛ. Nka yɔrɔ wɛrɛw la, farati b’a la balimamuso wala denmisɛn ka waajuli kɛ soo ni soo a kelen na sanko ni tilekun benna. Koow b’a yira ko nafa b’a la ka kɛ ni waajulikɛɲɔgɔn dɔ ye min be kɔrɔsili kɛ (Waaj. 4:10, 12). I be waajuli kɛ ni minw ye, to k’u yɔrɔ filɛ. N’i b’a fɛ ka bɔ kiin kɔnɔ, a kɛ i delinanko ye ka sara tɔɔw la.
4. An be se ka mun lo kɛ walisa kafodenw bɛɛ ka tanga?
4 Cii dira diinan mɔgɔkɔrɔw ma ‘k’an niinw kɔrɔsi.’ U ka baara ye ka ladili nafamanw di minw bɛnnin lo an ka kiinw cogoya ma (Heb. 13:17). N’an b’an yɛrɛ majigi u ye, ani n’an be sɔn u ka fɔta ma, Jehova bena an duga (Mise 6:8; 1 Kɔr. 10:12). An ka laɲinita ye ko Ala sagokɛlaw bɛɛ ka kɛ sababu ye seereya ka di bɛrɛbɛrɛ an ka kiinw kɔnɔ. Nka, an k’an yɛrɛ kɔrɔsi tuma bɛɛ.