Mɔgɔw dɛmɛ u ka mɛnni kɛ Ala fɛ

1. An ye kitabunin jumanw lo sɔrɔ an ka tile saba lajɛnba tɛmɛnin na ani mun lo b’a yira ko u bena mɔgɔ caaman nafa?

¹ An ka tile saba lajɛnba la min kuun tun ko “Ala ka Masaya ka na!”, an ye kitabunin kura fila nunu sɔrɔ: Mɛnni kɛ Ala fɛ ani to niin na fɔɔ abada ani Mɛnni kɛ Ala fɛ, o min ka nɔgɔ ka tɛmɛ fɔlɔ kan. Komi sɛbɛriw man ca u kɔnɔ, u be se ka bayɛlɛma cogo nɔgɔman na joona joona. A daminɛ na, sira tun dira ko kitabunin Mɛnni kɛ Ala fɛ ani to niin na fɔɔ abada ka bayɛlɛma kaan 431 na.

2. Kitabunin nunu bena jɔn lo nafa?

² O kitabuninw ɲɛsinna jɔn lo ma tigitigi? An k’a filɛ koo minw ka teli ka kɛ weleweledala caaman seen kɔrɔ duniɲa kuru bɛɛ kɔnɔ:

• Baro kɛtɔ ni mɔgɔ dɔ ye ɲɔgɔnyeko fɔlɔ la wala viziti kura kɛtɔ, weleweledala b’a kɔrɔsi ko a tigi tɛ sɛbɛ lɔn wala a tɛ se kalan na koɲuman.

• Weleweledala be mɔgɔ minw waajura, an ka gafe bɛrɛ wala gafe si ma bayɛlɛma o mɔgɔw ka siya kaan na. Kiin mɔgɔw fanba be kaan min fɔ ka ɲɛ, u tɛ se ka kalan kɛ o kaan na.

• Weleweledala be tɛmɛ bobow kumacogo fɛ ka tulogwelenw waaju kiin kɔnɔ.

• Bangebaga dɔ b’a fɛ k’a deen fitinin kalan tiɲɛn koo la, nka o deen tɛ se kalan na fɔlɔ.

3. Mun lo be sɔrɔ kitabunin Mɛnni kɛ Ala fɛ ɲɛɛw kan?

³ U kɔnɔkow labɛnna cogo di? Sɛbɛriw man ca kitabunin Mɛnni kɛ Ala fɛ kɔnɔ. Tuma caaman na, kumasen kelen dɔrɔn lo sɛbɛra ɲɛɛ kelen kelen bɛɛ jukɔrɔ ani a be hakilinata jɔnjɔnw bɔ kɛnɛ kan. Vɛrise dɔw sɛbɛra ka fara o kan. Mun na o kitabunin labɛnna ten do? I ka miiri k’a filɛ, kitabunin dɔ dira i ma kaan dɔ la i tɛ se ka min kalan. N’a sɔrɔ i yɛrɛ ma deli k’o sɛbɛri ɲɔgɔn ye. Hali ni jaa ɲumanw b’a kɔnɔ, yala a bena i nafa wa? N’ ma la a la dɛ! O cogo kelen na, mɔgɔ minw tɛ se kalan na, u fari be faga joona ni sɛbɛriw ka ca gafe kɔnɔ. O kama, jaa ɲumanw lo fanin be kitabunin Mɛnni kɛ Ala fɛ ɲɛɛ kelen kelen bɛɛ kan. Tagamasiɲɛ dɔw kɛra fana walisa k’a yira baro be kɛ jaaw kan ka tugu-tugu ɲɔgɔn kɔ cogo min na.

4. Mun lo be sɔrɔ kitabunin Mɛnni kɛ Ala fɛ ani to niin na fɔɔ abada ɲɛɛw kan?

⁴ Jaa minw be sɔrɔ kitabunin Mɛnni kɛ Ala fɛ ani to niin na fɔɔ abada kɔnɔ, o kelen lo be sɔrɔ kitabunin Mɛnni kɛ Ala fɛ kɔnɔ. Kitabunin fɔlɔ labɛnna mɔgɔw kama minw tɛ se kalan na koɲuman wala minw be kalangwɛ degira. Bibulu kalanfa fana be se ka baara kɛ n’a ye ka mɔgɔ dɔ kalan kitabunin Mɛnni kɛ Ala fɛ be min bolo. Ɲiningali dɔ sɛbɛra numanbolo ɲɛɛ kelen kelen bɛɛ sanfɛ. A jaabili be sɔrɔ numanbolo ani kinibolo ɲɛɛw kan. Ka fara jaaw kan, ɲɛfɔliw ni vɛrisew be yen. Ɲɛɛ caaman jukɔrɔ, nɔnkɔn na, kunnafoni wɛrɛw ani vɛrise dɔw be sɔrɔ koorilenw kɔnɔ. An be se ka baro kɛ u kan ka kɛɲɛ ni kalanden seko ye.

5. Tuma juman ani cogo di an be se k’o kitabuninw yira mɔgɔw la?

⁵ Baara be kɛ n’u ye cogo di? I be se k’o kitabunin fila dɔ kofɔ waajuli la soo ni soo n’a bena a tigi nafa hali ni baara tɛ kɛra ni kitabuninw ye o kalo la (Koorilen nin lajɛ: “U yiracogo.”) Viziti kura kɛtɔ, i be se k’a fɔ a tigi ye dɔrɔn ko fɛɛn dɔ b’i fɛ k’a yira a la, ani i ka kitabunin dɔ di a ma.

6. An be se ka bibulukalan kɛ n’o kitabuninw ye cogo di?

⁶ Komi ɲiningaliw ma sɛbɛ kitabunin Mɛnni kɛ Ala fɛ kɔnɔ, o kama kalan tɛ kɛ a kɔnɔ ɲiningaliw ni jaabiliw cogo la i ko a be kɛ cogo min na gafe Bibulu ka kalan kɔnɔ. Siyaw bɛɛ la, a ka di mɔgɔw ye ka maanaw lamɛn. O la, tɛmɛ kitabunin ka jaaw fɛ ka Bibulu kɔnɔ maanaw lakali. Kalanden dɛmɛ a ka jaaw kɔrɔ faamu. O kɛ ni dusudiya ye. A ɲini kalanden fɛ a k’a fɔ a ɲɛɛ be fɛɛn min na ani ale be min miiri o la. Vɛrise minw sɛbɛra kitabunin ɲɛɛw jukɔrɔ, i k’olu kalan ani k’u kɔrɔ ɲɛfɔ a ye. Ɲiningaliw kɛ walisa ka kalanden lasun a k’a daa don baro la ani i k’a filɛ n’a be faamuyali kɛra. N’a sɔrɔ kitabunin Mɛnni kɛ Ala fɛ ani to niin na fɔɔ abada lo be kalanden bolo. N’o lo, sɛbɛri ani vɛrise minw be jaaw kɔrɔ, a’ ye olu kalan ɲɔgɔn fɛ baro kɛtɔ jaaw kan.

7. An be se k’an ka Bibulu kalanden dɛmɛ cogo di a ka ɲɛtaga kɛ?

⁷ Kalanden dɛmɛ a ka ɲɛtaga kɛ: Aw be kalan min kɛra, n’a sɔrɔ o bena kalanden lasun a k’a ɲini k’a yɛrɛ degi kalangwɛ la walisa ale yɛrɛ ka se ka Jehova lɔn a yɛrɛ ma (Mat. 5:3; Yuh. 17:3). O la, n’aw be kalan kɛra Mɛnni kɛ Ala fɛ lo kɔnɔ, wagati dɔ bena se, i be se k’a ɲini ka kalanden degi kalangwɛ kɛcogo la. O kɔ, a’ ye kalan kɛ sisan kitabunin Mɛnni kɛ Ala fɛ ani to niin na fɔɔ abada kɔnɔ. Kalan mana kɛ ka ban kitabunin o kitabunin kɔnɔ, kalanden tɛna se ka batise fɔlɔ. A ka kan ka gafe wɛrɛ kalan tugun walisa ka Bibulu faamu bɛrɛbɛrɛ. O be se ka kɛ gafe Bibulu ka kalan wala o ɲɔgɔnna gafe dɔ ye.

8. Mun na i be Jehova waleɲuman lɔn kitabunin kura fila nunu koo la?

⁸ Mɔgɔw ka kan ka mɛnni kɛ duniɲa kuru bɛɛ Masaba fɛ n’u b’a fɛ ka to niin na fɔɔ abada (Es. 55:3). Jehova do b’a fɛ ‘mɔgɔ sifaw bɛɛ,’ hali minw tɛ se kalan na, u k’a lɔn cogo min na u be se ka mɛnni kɛ ale fɛ (1 Tim. 2:3, 4). An be Jehova waleɲuman lɔn kosɔbɛ kitabunin kura nunu kosɔn, sabu an be se ka mɔgɔw kalan n’u ye walisa k’u dɛmɛ ka mɛnni kɛ Ala fɛ!

[Koorilen ɲɛɛ 3 kan]

U yiracogo

Ɲɛɛ 2-3 yira a tigi la, ani a fɔ ko: “Yala a bena diya i ye ka ɲɛnamaya kɛ duniɲa nin ɲɔgɔn kɔnɔ wa? [Mɛnni kɛ a tigi fɛ.] Bibulu [wala kitabu senuman] kɔnɔ, Ala ye layidu ta ko yanni dɔɔni a bena dugukolo kɛ yɔrɔ cɛɲumanba ye ten, yɔrɔ min na hɛɛrɛ be yen ani fantanya ni bana tɛ yen. A filɛ an ka kan ka min kɛ walisa ka ɲɛnamaya kɛ o yɔrɔ la. [Esayi 55:3 kalan, a kofɔra ɲɛɛ 3nan sanfɛ.] O vɛrise b’a fɔ an ye ko ‘an ka na’ Ala fɛ ani ka “mɛnni kɛ” a fɛ. Nka, mɔgɔ be se ka mɛnni kɛ Ala fɛ cogo di?” Kitabunin dayɛlɛ ɲɛɛ 4-5 kan ani o ɲiningali ka jaabili lajɛ n’a tigi ye. N’a kɔrɔtɔnin lo, kitabunin di a ma ani i ka labɛn kɛ ka segi ka na o ɲiningali ka jaabili lajɛ n’a ye.