Baara kɛ ni sɛbɛninw ye ka kibaro diiman jɛnsɛn

1. Ala sagokɛlaw ye baara juman kɛ ni sɛbɛninw ye?

¹ Kabi galen, Jehova sagokɛlaw be baara kɛ ni sɛbɛninw ye minw basiginin be Bibulu kan walisa ka kibaro diiman jɛnsɛn. Saan 1880 la, C. T. Russel n’a jɛnɲɔgɔnw y’a daminɛ ka sɛbɛninw bɔ (Bible Students’ Tracts) ani k’u di La Tour de Garde kalanbagaw ma walisa u k’u tilan-tilan ka di jama ma. Saan 1884 la, C. T. Russel ye tɔɔn dɔ sigi sen kan ka kɛɲɛ ni sariya ye Masayakow yiriwali kosɔn. Komi sɛbɛninw nafa tun ka bon kosɔbɛ, a ye kumaden “sɛbɛninw” fara o tɔɔn tɔgɔ kan ko Zion’s Watch Tower Tract Society. Bi, o tɔɔn tɔgɔ ko Watch Tower Bible and Tract Society of Pennsylvania. Fɔɔ ka na se saan 1918 ma, Bibulu Kalandenw tun ye sɛbɛnin deen miliyɔn 300 ni kɔ tilan-tilan ka di mɔgɔw ma. Sɛbɛninw bele ye baarakɛfɛn ɲumanw ye waajuli la.

2. Mun na barika be sɛbɛninw na?

² Mun na barika b’u la? Sɛbɛninw ye kulɛrilaman ye ani u filɛ ka di. U kɔnɔkow man ca kojugu, u be mɔgɔ ɲɛɛ sama ani kalan nafaman be sɔrɔ u kɔnɔ. O kama, mɔgɔw be se ka ɲɛbɔ u fɛ n’a y’a sɔrɔ u be siran ka zurunaliw wala gafew kalan sabu olu kɔnɔkow ka ca. Sɛbɛninw yiracogo man gwɛlɛ, hali weleweledala kuraw ni denmisɛnw be se k’o kɛ. Ka fara o kan u man bon kojugu, o kosɔn u minɛ ka nɔgɔ an fɛ.

3. Wale dɔ lakali, i tɔgɔla ta wala gafe dɔ kɔnɔ, k’a yira ko nafa be sɛbɛninw na.

³ Mɔgɔ caaman ye tiɲɛn koo mɛn a siɲɛ fɔlɔ la sɛbɛnin dɔ sababu la. Ɲɛyirali fɛ, Hayiti jamana na, muso dɔ ye an ka sɛbɛnin dɔ tɔmɔ sira kan. A y’a kalan ani a kabara ko: “Nin ye tiɲɛn lo ye!” O kɔ, a tagara Masaya Boon na, a ye bibulukalan daminɛ ani kɔfɛ a batisera. O bɛɛ sɔrɔla mun lo fɛ? Ala ka Kuma barikaman min ɲɛfɔra sɛbɛnin dɔ kɔnɔ.

4. An ka laɲinita ye mun lo ye n’an be sɛbɛninw lo yirala mɔgɔw la kalo la?

⁴ Soo ni soo: K’a daminɛ novanburukalo la, an bena to ka gafe minw yira mɔgɔw la, u dɔw bena kɛ sɛbɛninw ye sabu u ye baarakɛfɛn ɲumanw ye waajuli la. An ka laɲinita tɛ ka sɛbɛninw di mɔgɔw ma dɔrɔn, nka an b’a fɛ ka baara kɛ n’u ye ka baro daminɛ. Ni mɔgɔ dɔ y’a mako don an tɛmɛko fɔlɔ la wala viziti kura tuma na, an be se ka bibulukalan kɛcogo ɲɛyira a la gafe Bibulu ka kalan kɔnɔ wala gafe wɛrɛ kɔnɔ bibulukalan be kɛ ni min ye. An be se ka sɛbɛninw yira mɔgɔw la cogo di soo ni soo? Komi sɛbɛninw tɛ kelen ye, o kama an be minw yirala mɔgɔw la, a ka ɲi an k’u kɔnɔkow lɔn ka ɲɛ.

5. Cogo juman na an be se ka sɛbɛninw yira mɔgɔw la soo ni soo?

⁵ An ka yiracogo ka kan ka kɛɲɛ ni kiinw ani sɛbɛninw cogoya ye. An be se ka baro daminɛ an kɛtɔ ka sɛbɛnin di an lamɛnbaga ma. A ɲɛɛ fɔlɔ filɛ ka di minkɛ, o be se k’a nege don a tigi la. An be se fana ka sɛbɛnin sifa caaman yira a tigi la ani k’a to a k’a ɲɛnata sugandi. Kiin dɔw kɔnɔ, mɔgɔw be sigasiga ka daa yɛlɛ an ye. N’o lo, an be se ka lɔ yɔrɔ dɔ la ka sɛbɛnin ɲɛɛ fɔlɔ yira soo kɔnɔ mɔgɔw la walisa u ka se k’a ye. An be se fana k’a fɔ u ye ko an b’a fɛ ka fɛɛn dɔ don u ka daa jukɔrɔ ani ko an b’a fɛ k’u ka miiriya lɔn o kan. Ni sɛbɛnin barokun ye ɲiningali ye, an be se k’a ɲini an lamɛnbaga fɛ a k’a ka miiriya fɔ an ye o koo la. An be se fana k’an yɛrɛ ka ɲiningali dɔ kɛ walisa k’a lasun a k’a mako don ani ka kuma n’an ye. An be se ka sɛbɛnin yɔrɔ dɔ kalan a tigi ye. Ɲiningali minw b’o yɔrɔ la, an k’u kalan ani an k’a ɲini a fɛ a k’a ka miiriya fɔ an ye. An be se ka vɛrise jɔnjɔnw kalan Bibulu kɔnɔ. Baro kɛnin kɔ sɛbɛnin yɔrɔ dɔ kan, an ka baro kuncɛ ani an ka labɛn tigitigi kɛ ka segi ka na. Minw tɛ u ka soo, ni sira dira an ma ka gafew to u ye, an be se ka sɛbɛnin dɔ to u ye yɔrɔ min na tɛmɛbagaw ɲɛɛ t’a la.

6. An be se ka waajuli kɛ ni sɛbɛninw ye cogo di siradaw la?

⁶ Sirada la waajuli: I delila ka waajuli kɛ ni sɛbɛninw ye sirada la wa? Tɛmɛbaga dɔw kɔrɔtɔnin lo ani u t’a fɛ ka lɔ ka baro kɛ n’an ye. A be se ka gwɛlɛya an ma k’a lɔn n’u b’u mako don sɔbɛ la. Sanni an ka zurunali kuraw di u ma k’a sɔrɔ an lanin t’a la n’u bena u kalan, mun na an tɛ sɛbɛnin dɔ di u ma? Komi sɛbɛninw ɲɛɛ fɔlɔ filɛ ka di ani u kɔnɔkow man ca, dɔw be se k’a ɲini k’u kalan ka filɛ min b’u kɔnɔ ni wagati dɔɔni b’u fɛ. Nka n’u kɔrɔtɔnin tɛ, an be se ka baro kɛ n’u ye sɛbɛnin yɔrɔ dɔw kan.

7. Wale dɔw lakali ka seereya kɛcogo ɲɛfɔ ni sɛbɛninw ye sababu dɔ sen fɛ.

⁷ Seereya kɛcogo n’u ye sababu dɔ sen fɛ: A man gwɛlɛ ka seereya kɛ ni sɛbɛninw ye sababu dɔ sen fɛ. Balima dɔ b’u damanin don a pɔsi kɔnɔ n’a be bɔ a ka soo. N’a ye mɔgɔ dɔ kunbɛn, i n’a fɔ magazɛn kɔnɔ baarakɛla, a b’a fɔ a tigi ye dɔrɔn ko ale b’a fɛ ka sɛbɛ kalanta dɔ di a ma. O kɔ, a be sɛbɛnin dɔ di a ma. Tuma min na balimacɛ dɔ n’a muso y’a latigɛ ka taga bɔ Niyɔriki, u y’a faamu k’u bena siya caaman mɔgɔw kunbɛn yen. O kama, u ye gafenin Nations ta ani sɛbɛnin dɔw fana kaan caaman na. O la, u tun mana feerelikɛla dɔ sɔrɔ sirada la wala n’u tun sigira mɔgɔ dɔ gɛrɛfɛ zaradɛn kɔnɔ wala ɛrɛsitoran kɔnɔ, n’o tigi be kumana kaan wɛrɛ la, u tun be sɛbɛnin dɔ di a ma a ka siyakan na.

8. Mun na an be se ka sɛbɛninw suma ni sumankisɛw ye?

⁸ “I ka i ka danni si dan”: An be se ka sɛbɛninw suma ni sumankisɛw ye. Sɛnɛkɛla b’a ka sumankisɛw seriseri yɔrɔ bɛɛ sabu a t’a lɔn min bena falen ani ka bonya. Waajulikɛla 11:6 b’a fɔ ko: “I ka i ka danni si dan kabini sɔgɔma da fɛ, i kana salaya wula da fɛ k’a masɔrɔ i t’a dɔn yala ni sɔgɔma da ta na ɲɛ wala wula da ta na ɲɛ wala u fila bɛɛ na ɲɛ.” O kama, an ka to ka “dɔnniya jɛnsɛn” n’o waajulikɛfɛn ye min barika ka bon kosɔbɛ.—Ntal. 15:7.

[Koorilen ɲɛɛ 3 kan]

K’a daminɛ novanburukalo la, an bena to ka gafe minw yira mɔgɔw la, u dɔw bena kɛ sɛbɛninw ye sabu u ye baarakɛfɛn ɲumanw ye waajuli la.