Sɛbɛnin modɛli kura dɔw!
1. Waajulikɛfɛn modɛli kura juman lo b’an ɲagali?
1 Saan 2013 ka tile saba lajɛnba barokun tun ko: “Ala ka Kuma ye tiɲɛn ye!” O lajɛnba la, an ye sɛbɛnin kura deen duuru sɔrɔ. Ka fara o kan, an ye Masaya kibarow no 38 fana sɔrɔ. Ale barokun ko: “Suuw be se ka kunu tiɲɛn tiɲɛn na wa?” O sɛbɛnin wɔɔrɔ bɛɛ labɛncogo b’an ɲagali. Mun na o sɛbɛninw labɛnna o cogo la do? N’an b’u yirala mɔgɔw la soo ni soo, an be se ka baara ɲuman kɛ n’u ye cogo di?
2. Sɛbɛninw labɛncogo kura kuun ye mun lo ye?
2 O modɛli kura kuun ye mun ye? Soo ni soo waajuli man teli ka ɲɛ koo naani nunu kɔ: 1) Baro daminɛ ni ɲiningali dɔ ye walisa k’a tigi ka miiriya lɔn. 2) Miiriya dɔ yira a la Bibulu kɔnɔ. 3) Gafe dɔ di a tigi ma a k’a kalan kɔfɛ. 4) Ɲiningali dɔ lawuli i bena min jaabi siɲɛ wɛrɛ ani labɛn kɛ ka segi ka na. Sɛbɛninw labɛncogo kura b’an dɛmɛ ka o koo naani nunu bɛɛ kɛ ka dafa cogo nɔgɔman na.
3. An be se ka sɛbɛnin kura dɔ yira mɔgɔw la cogo di waajuli la?
3 Baara be kɛ n’u ye cogo min na: 1) Ɲiningali dɔ be sɛbɛnin ɲɛɛ fɔlɔ kan min be mɔgɔ lasun a ka miiri. Foli bannin kɔ, o yira lamɛnnikɛla la. A ɲininga a ka miiriya la. 2) Sɛbɛnin dayɛlɛ ani aw ka yɔrɔ nin lajɛ: “Bibulu b’a fɔ ko.” N’a be se ka kɛ, sin ka vɛrise kalan Bibulu kɔnɔ. Ni wagati b’a tigi fɛ, aw ka yɔrɔ nin lajɛ: “I be se ka nafa min sɔrɔ o la.” 3) Sɛbɛnin to a tigi fɛ. A jija a k’a tɔɔ kalan a diyanye wagati la. 4) Sɛbɛnin kɔɔ kan, ɲiningali dɔ be sɔrɔ cɛtigɛ nin jukɔrɔ: “Miiri k’a filɛ.” Sanni i ka taga, o ɲiningali yira a tigi la ani labɛn kɛ ka na Bibulu ka jaabili lajɛ n’a ye siɲɛ wɛrɛ.
4. An be se ka baara kɛ ni sɛbɛnin kuraw ye cogo di viziti kura kɛtɔ?
4 Viziti kura fana ka nɔgɔ. I tɛmɛko fɔlɔ la, i tun ye ɲiningali dɔ lawuli baro laban na. Vɛrise minw be sɛbɛnin kɔɔ kan, baara kɛ n’olu ye dɔrɔn walisa k’o ɲiningali jaabi. Sanni i ka taga, kitabunin Kibaro diiman jaa yira a la sɛbɛnin kan. Kitabunin yɛrɛ yira a la ani kalansen min kofɔra. O kalansen kɔnɔ, kunnafoni wɛrɛw be sɔrɔ. O kɔ, kitabunin di a tigi ma. N’a sɔnna a la, labɛn kɛ ka na a lajɛ n’a ye siɲɛ wɛrɛ. I ye bibulukalan lo daminɛ ten! I be se fana ka sɛbɛnin wɛrɛ di a tigi ma kitabunin nɔɔ na ani ka labɛn kɛ ka na a lajɛ n’a ye siɲɛ wɛrɛ.
5. An ka waajuli baara la, nafa juman be sɛbɛninw na?
5 Kabi saan 130 ni kɔ, an be baara kɛra ni sɛbɛninw ye waajuli la. Hali n’u bonya n’u cogoya yɛlɛmana, u bele ye waajulikɛfɛn ɲumanw ye. An ka to ka baara ɲuman kɛ n’o sɛbɛnin modɛli kuraw ye walisa ka Bibulu lɔnniya jɛnsɛn yɔrɔ bɛɛ la duniɲa kɔnɔ.—Talenw 15:7a.