Yala ele bena kɛ piyɔniye kɔrɔsigi ye wa?
1. Mun na Hakilijigi wagati be sababu di an ma ka dɔ fara an ka waajuli baara kan?
1 Hakilijigi wagati be sababu di an ma ka dɔ fara an ka waajuli baara kan. O wagati la, an be miiri Jehova ka kanuyaba koo la, a ye min yira a kɛtɔ k’a Dencɛ di k’a kɛ kunmabɔsara ye (Yuh. 3:16). O koo b’an dusukun fa waleɲumanlɔn na. A fana b’a nege don an na kosɔbɛ ka kuma mɔgɔw fɛ Jehova koo la ani a be min kɛra adamadenw ye (Es. 12:4, 5; Luka 6:45). O wagati lo la fana, an be kanpaɲiba kɛ k’an lɔnbagaw ni kiinmɔgɔw weele u ka na Hakilijigi lajɛn kɛ n’an ye. O kɔ, minw nana o lajɛn na, an b’an jija k’u dɛmɛ tugun. Yala ele bena kɛ piyɔniye kɔrɔsigi ye marisi, awirili wala mɛkalo la walisa ka dɔ fara i ka waajuli baara kan wa?
2. Mun na marisikalo bena sababu ɲuman di an ma ka kɛ piyɔniye kɔrɔsigiw ye?
2 A to marisikalo ka kɛ kalo kɛrɛnkɛrɛnnin ye i fɛ: Marisikalo bena sababu ɲuman di an ma ka kɛ piyɔniye kɔrɔsigiw ye. Piyɔniye kɔrɔsigiw bena se k’a sugandi ka lɛri 30 wala lɛri 50 kɛ. Ni kafokulu kɔrɔsibaga nana bɔ kafo ye marisikalo la, a be lajɛn min kɛ ni kudayi piyɔniyew ni dan na piyɔniyew ye, piyɔniye kɔrɔsigiw fana be se ka na o lajɛn kuru bɛɛ la. Ɲinan, Hakilijigi lajɛn bena kɛ talatalon marisi tile 26nan loon na. Kanpaɲi min bena kɛ ka mɔgɔw weele ka na o lajɛn na, o wagati bena janya ka tɛmɛ saan tɛmɛninw ta kan. A bena daminɛ marisi tile fɔlɔ la fɔɔ ka taga se marisi tile 26nan loon ma. Ka fara o kan, wikɛni duuru lo be marisikalo kɔnɔ. O la do, mun na i t’a filɛ sɔbɛ la n’i be se ka fara tɔɔw kan walisa ka marisi kɛ kalo kɛrɛnkɛrɛnnin ye saan kɔnɔ?
3. An be se ka labɛn juman lo kɛ walisa ka dɔ fara an ka waajuli baara kan?
3 I yɛrɛ labɛn kabini sisan: Sisan lo ye wagati ye k’a filɛ i ka ɲi ka yɛlɛmani minw kɛ i ka porogramu na walisa ka piyɔniye baara kɛ. A ka ɲi denbaya mɔgɔw ka ɲɔgɔn dɛmɛ o koo la. O la, aw ka gwa kɔnɔ batoli wagati la, a’ y’a filɛ aw ka denbaya mɔgɔw be se ka laɲinita minw latigɛ ani a’ ye porogramu kɛ o kama (Ntal. 15:22). N’i tɛ se ka kɛ piyɔniye kɔrɔsigi ye, kana i fari faga. I be to ka bɔ loon minw na, yala i be se ka mɛɛn waajuli la ka tɛmɛ fɔlɔ kan wa? Yala i be se ka loon wɛrɛ latigɛ ka fara o kan wa?
4. N’an ye dɔ fara an ka waajuli baara kan marisi, awirili ani mɛkalo la, an bena nafa juman lo sɔrɔ o la?
4 An ka dɔ fara an ka waajuli baara kan marisi, awirili ani mɛkalo la. O la, an ye baara min kɛ ka Jehova sago kɛ ani ka mɔgɔw dɛmɛ, o bena an ninsɔndiya ani k’an wasa kosɔbɛ (Yuh. 4:34; Kɛw. 20:35). Min yɛrɛ kɔrɔtanin lo ka tɛmɛ o kan, o ye ko an ye an yɛrɛ saraka ka jijali min kɛ, o bena Jehova ninsɔndiya.—Ntal. 27:11.