An ka Jehova ka jogo cɛɲumanbaw weleweleda
1 “Bonya ni barika ani saramaya ye e de ta ye, Matigi, katuguni sankolola fɛnw ni dugukolo kan fɛnw ye e de ta ye.” (1 Til. Kib. 29:11). An be Jehova kanu k’a waleɲuman lɔn cogo min na, o b’an lasun ka mun lo kɛ? O b’an lasun k’a “ka ɲumaya kow fɔ” ale min ye ‘an wele ka bɔ dibi la ka an don a ka kabako kɛnɛ la.’ (1 Piɛrɛ 2:9). An tɛ se ka an ka Alaba kofɔli dabila mɔgɔw ye. An bena sababubaw sɔrɔ ka Jehova ka jogo cɛɲumanbaw weleweleda marisi ni awirili ni mɛkalo la.
2 Kanpaɲi kɛrɛnkɛrɛnnin bena kɛ ka Hakilijigi lajɛn kofɔ mɔgɔw ye: Awirilikalo tile 2nan na, ntɛnɛlon, an bena Jehova ka jogo cɛɲumanbaw yira ka gwɛ an kɛtɔ ka lajɛn Matigi ka surafana kama. O koba kosɔn, welelisɛbɛ kɛrɛnkɛrɛnnin dɔw bena tilan ka di mɔgɔw ma duniɲa kuru bɛɛ kɔnɔ: ka ta marisi tile 17nan ma ka taga se awirili tile 2nan ma. An be bɛɛ jija u k’u sen don bɛrɛbɛrɛ o kanpaɲi na. O bena kɛ sababu ɲuman ye mɔgɔ kuraw fɛ u k’a daminɛ ka kibaro duman weleweleda n’u ka koow dafara. N’i ka kalandenw wala i ka denmisɛnw ka koow dafara, i k’a bɔ i yɛrɛ la ka kuma diinan mɔgɔkɔrɔw fɛ.
3 O kanpaɲi bena kɛ i n’a fɔ min kɛra ka tile saba lajɛnba “Kisili wagati ka surun!” kofɔ. Kafow bena welelisɛbɛ caaman sɔrɔ walisa weleweledala bɛɛ ka deen 50 sɔrɔ ani piyɔniye bɛɛ ka deen 150 sɔrɔ. I k’a yiracogo kɛ nɔgɔman na. I be se k’a fɔ ko: “Nin ye e ka welelisɛbɛ ye ka na koba nata dɔ la min be kɛ saan o saan. An dusu bena diya k’i kunbɛn yen. Kunnafoniw bɛɛ b’a kan.” Ayiwa, ni ɲiningaliw b’a tigi fɛ, an ka wagati ta k’a jaabi. Gafe Qu’enseigne la Bible ɲɛɛ 206-8nan ka barokun be se k’an dɛmɛ: a be kuma Matigi ka surafana kan. Samedi ni dimansi, an bena o sɛbɛw fara zurunali kuraw kan k’u di mɔgɔw ma. Mɔgɔ o mɔgɔ mana a mako don, an k’o tigi tɔgɔ sɛbɛ ani an ka labɛn kɛ ka segi ka na bɔ a ye.
4 Yɔrɔ min na a be se ka kɛ, an k’o welelisɛbɛw don mɔgɔ kelen-kelen yɛrɛ bolo. O kama, mɔgɔ minw tɛ u ka soo, an k’u ka soo ladɛrɛsi ta ani an ka labɛn kɛ walisa ka segi ka na kɔfɛ. Lɔgɔkun laban na ka kɔn Hakilijigi lajɛn ɲɛ, ni welelisɛbɛ caaman tora kafo dɔw fɛ, u be se k’u to nɛmɛnɛmɛ mɔgɔw fɛ minw tɛ u ka soo kɔnɔ, nka a kana kɛ o wagati ɲɛ. An k’an janto ka welelisɛbɛ dɔ di viziti kuraw ma, ani Bibulu kalandenw, an somɔgɔw, baarakɛɲɔgɔnw, sigiɲɔgɔnw ani an ka lɔnbaga wɛrɛw ma.
5 Piyɔniye kɔrɔsigi baara: Yala i be se ka kɛ piyɔniye kɔrɔsigi ye marisi, awirili ni mɛkalo la walisa ka Jehova ka jogo cɛɲumanbaw weleweleda bɛrɛbɛrɛ wa? N’a sɔrɔ i ka ɲi k’i ka loon o loon porogramu makɛɲɛ (Efɛs. 5:15-17). I ka la a la ko n’i be i jija ka caaman kɛ Jehova ka baara la, i bena ninsɔndiya ni baraji sɔrɔ (Ntal. 10:22). Komi Hakilijigi wagati be surunyana, labɛn kɛwagati ye sisan lo ye.—Ntal. 21:5.
6 Saan 90 balimamuso dɔ ye nɛɛma sɔrɔ ka kɛ piyɔniye kɔrɔsigi ye salon. A b’a fɔ ko: “Hali ni nankɔ baara ka di ne ye kosɔbɛ, ani ne tun b’a fɛ k’a daminɛ ka danni kɛ, ne y’a faamu ko ne ka kan ka ɲɛnako ɲumanw latigɛ. Komi a nege tun be ne la ka Masayakow bila koo bɛɛ ɲɛ, ne y’a latigɛ ka kɛ piyɔniye kɔrɔsigi ye marisikalo la.” Yala a ye baraji sɔrɔ a ka jijali kɛli kosɔn wa? A b’a fɔ ko: “O ye ne magwɛrɛ kafo ni Jehova la ka tɛmɛ fɔlɔ kan.” An k’an ka ɲɛnakow sɛgɛsɛgɛ ka filɛ, ani an ka yɛlɛmani bɛnnen don u la.
7 N’a sɔrɔ a yɛrɛ tɛna gwɛlɛya i ma ka waajuli kɛ ka lɛri 50 sɔrɔ i ko i b’a miirila cogo min na. I k’i ka loon o loon baara jati minɛ delili kɔnɔ, i ka porogramu dɔ kɛ, ani i k’o sɛbɛ ka fara Masaya baara tɔɔw kan. Ile yɛrɛ lo b’i ka koow cogoya lɔn ka tɛmɛ bɛɛ kan. Ni kɛnɛyako b’i kan ani i tɛ se ka sɔminɛ kɛ, n’a sɔrɔ i be se ka lɛri fila kɛ waajuli la loon o loon. N’i be taga baara la tuma bɛɛ, wala n’i be taga lakɔli la, i be se ka kɛ piyɔniye kɔrɔsigi ye i kɛtɔ ka waajuli kɛ wula fɛ wala samedi ni dimansi.
8 Denbaya kulu caaman sera ka kɛ piyɔniye kɔrɔsigiw ye. Saan tɛmɛnenw na, balimacɛ dɔ n’a muso tun be sigasiga k’u tɔgɔ di piyɔniye kɔrɔsigi baara kama sabu u tun be miiri ko see t’olu ye k’o kɛ u ka cogoya kosɔn. U ye mun lo kɛ do? U b’a fɔ ko: “An ye Jehova deli a k’an dɛmɛ k’o baara kɛ, an tun b’a fɛ ka min kɛ ɲɔgɔn fɛ kabini wagati jan.” Labɛn ɲuman y’u dɛmɛ k’u ka laɲinita dafa. U y’a fɔ ka fara a kan ko: “A diyara kosɔbɛ! An ye baraji caaman sɔrɔ ɲɔgɔn fɛ. An be aw ladi ko: A’ y’a kɛ ka filɛ. Ni an sera k’a kɛ, n’a sɔrɔ aw fana bena se a la.”
9 Gwakalan nata la, mun na aw tɛ wagati dɔ ta k’a filɛ cogo min na gwa mɔgɔw bɛɛ be se ka dɔ fara u ka waajuli baara kan kalo nataw la. Hali ni bɛɛ tɛ se ka kɛ piyɔniye kɔrɔsigiw ye, n’a sɔrɔ aw la mɔgɔ kelen be se ka kɛ a ye ni tɔɔw ye bolo di ɲɔgɔnw ma k’a dɛmɛ. N’o tɛ, n’a sɔrɔ aw ka denbaya be se ka laɲinita dɔw latigɛ walisa ka dɔ fara aw ka cidenya baara kan o kalo kɛrɛnkɛrɛnninw kɔnɔ.
10 An ka ɲɔgɔn dɛmɛ: An ka dusudiya be yɛlɛma mɔgɔ wɛrɛw la. I ka baro kɛ ni mɔgɔ wɛrɛw ye ko ile b’a fɛ ka kɛ piyɔniye kɔrɔsigi ye. N’a sɔrɔ o bena u jaa gwɛlɛya k’u tɔgɔ di fana. Ka fara o kan, minw kɛra piyɔniye ye ka ye, u be se ka ladiliw di i ma. O bena i dɛmɛ k’i ka koɲɛw labɛn walisa k’i ka laɲinita dafa (Ntal. 15:22). Ni see b’i ye ka kɛ piyɔniye kɔrɔsigi ye, i ka weleweledala dɔ weele, min be i ka cogoya ɲɔgɔn na, a ka jɛn n’i ye k’o baara diiman kɛ.
11 Diinan mɔgɔkɔrɔ caaman be labɛnw kɛ walisa k’u sen don o baara kɛrɛnkɛrɛnnin na (Heb. 13:7). Siga t’a la, o be dusu don kafo mɔgɔw la dɛ! Diinan mɔgɔkɔrɔw be se ka dusudiya don mɔgɔw la fana u kɛtɔ ka baro kɛ n’u ye. Dɔw mako be jagwɛlɛya kuma diiman damanin wala ladili nafamanw dɔrɔn lo la walisa k’u sen don piyɔniye kɔrɔsigi baara la. N’a sɔrɔ waajulibaara kɔrɔsibaga bena lajɛn wɛrɛw labɛn waajuli kama walisa bɛɛ ka se ka jɛn ni jɛnkulu ye ka waajuli kɛ, hali baara jiginen kɔ wala lakɔli bannen kɔ. O labɛnw ka kan ka to ka fɔ kafo ye tuma o tuma. A fana ka kan k’a janto ko waajulikɛyɔrɔw ni gafew bena labɔri kɛ bɛɛ ye.
12 Hali ni i ka cogoya b’i bali ka kɛ piyɔniye kɔrɔsigi ye, minw sen b’o baara la, i be se k’u jaa gwɛlɛya, ani i be se ka delili kɛ u ye (Ntal. 25:11; Kol. 4:12). N’a sɔrɔ i be se ka labɛn kɛ ka loon wɛrɛ ta lɔgɔkun kɔnɔ walisa ka waajuli kɛ n’u ye. I fana be se ka waajuli kɛ n’u ye ka mɛn ka tɛmɛ i delinanko kan.
13 An be piyɔniye kɔrɔsigi daa min ɲini awirilikalo la: Piyɔniye kɔrɔsigiw cayaliba min sɔrɔla jamanaw kɔnɔ minw be baara kɛ ni An ka Masaya Cidenyabaara sɛbɛ nin ye, o kɛra 8250 ye. O kama, an be piyɔniye kɔrɔsigi 10000 ɲini awirilikalo nata la: o ye laɲinita dama kɛɲɛnen ye. Jamana kelen-kelen bɛɛ ka laɲinita be sɔrɔ koorilen kɔnɔ sɛbɛ nin ɲɛɛ 4nan na. O laɲinita be se ka sɔrɔ ni diinan mɔgɔkɔrɔw jɛnkulu kelen-kelen bɛɛ ye laɲinita bɛnnen dɔ latigɛ u ka kafo ye ka dusu don kafodenw na. Ɲɛyirali fɛ, u be se k’a ɲini ko weleweledala 6 kan, mɔgɔ 1 ka kɛ piyɔniye kɔrɔsigi ye. Siga t’a la, kafo dɔw bena weleweledala caaman sɔrɔ ka tɛmɛ o kan minw be se ka kɛ piyɔniye kɔrɔsigiw ye. See be kafo caamanba ye k’o laɲinita dafa nɔgɔman na. I miiri ka filɛ o bena na ni dusudiya min ye aw ka kafo kɔnɔ, ani o bena nɔɔ ɲuman min to kiin mɔgɔw kan!
14 Mun na awirilikalo ye sababu ɲuman ye ka piyɔniye kɔrɔsigi baara kɛ? Hakilijigi lajɛn bena kɛ kalo daminɛ na: o la, sababu caaman bena sɔrɔ an fɛ ka viziti kuraw kɛ mɔgɔw fɛ minw bena na o lajɛn na. O bena a sɔrɔ an be zurunaliw kofɔra mɔgɔw ye walisa ka gafe Qu’enseigne la Bible to u bolo viziti kuraw kɛtɔ, ani ka bibulukalan daminɛ n’u ye. O kama, awirilikalo la, piyɔniye kɔrɔsigi baara bena sababu caaman di an ma ka bibulukalanw daminɛ ni mɔgɔw ye. Ka fara o kan, dimansi 5 ni selilon kelen be yen awirilikalo la. O la, minw be taga baara la wala lakɔli la, a bena nɔgɔya u fɛ ka kɛ piyɔniye kɔrɔsigi ye.
15 Kirista saya Hakilijigi wagati kelen-kelen mana tɛmɛ, an be surunya duniɲa nin laban na tugun. Wagati min tora an fɛ ka an ka Alaba kofɔ mɔgɔw ye, o man ca (1 Kɔr. 7:29). Hakilijigi wagati nin mana na tɛmɛ, sababu ɲuman minw tun b’an bolo ka an sankolola Faa tando o wagati la, o sababuw tɛna kɛ yen tugun abada. O kama, an ka labɛn kɛ sisan walisa k’an seko bɛɛ kɛ ka Jehova ka jogo cɛɲumanbaw weleweleda marisi, awirili ni mɛkalo la!
[Study Questions]
1. Mun lo b’an lasun ka Jehova ka jogo cɛɲumanbaw weleweleda?
2. Kanpaɲi kɛrɛnkɛrɛnnin juman bena kɛ ka Hakilijigi lajɛn kofɔ? Jɔn be se k’a sen don o baara la?
3. An be se ka mun lo fɔ ka mɔgɔw weele ka na Hakilijigi lajɛn na?
4. Welelisɛbɛ kɛrɛnkɛrɛnninw ka kan ka tilan ka di mɔgɔw ma cogo di?
5. Mun na an ka kan k’a daminɛ sisan ka labɛn kɛ piyɔniye kɔrɔsigi baara kama?
6. An be kalan juman sɔrɔ saan 90 balimamuso dɔ ka ɲɛyirali la, min kɛra piyɔniye kɔrɔsigi ye salon?
7. Yala a ka gwɛlɛ ka kɛ piyɔniye kɔrɔsigi ye wa?
8. Mun lo ye balimacɛ dɔ n’a muso dɛmɛ ka kɛ piyɔniye ye?
9. Gwakalan nata la, aw be se ka mun lo kɛ walisa ka aw labɛn baara kama kalo kɛrɛnkɛrɛnnin nataw kɔnɔ?
10. N’an b’a fɛ ka kɛ piyɔniye kɔrɔsigi ye Hakilijigi wagati la, mun na an ka kan k’o baro kɛ ni mɔgɔ wɛrɛ ye?
11. Diinan mɔgɔkɔrɔw be se ka dusudiya don mɔgɔw la cogo di ka piyɔniye kɔrɔsigi baara kɛ kalo nataw la?
12. Ni see t’i ye ka kɛ piyɔniye kɔrɔsigi ye, i be se ka mun lo kɛ?
13. Laɲinita juman latigɛra aw ka jamana ye? Cogo juman na aw ka kafo be se ka dɛmɛ kɛ k’o laɲinita sɔrɔ?
14. Mun na awirilikalo ye sababu ɲuman ye ka piyɔniye kɔrɔsigi baara kɛ?
15. Komi ɲinan Hakilijigi wagati be surunyana, mun na kɔrɔtɔ miiriya ka kan ka kɛ an na?
[Box on page 4]
Piyɔniye kɔrɔsigi joli be se ka sɔrɔ awirilikalo la?
◼ Benɛn: 1400
◼ Burkina Faso: 300
◼ Cadi: 75
◼ Gabɔn: 400
◼ Kameruni: 4000
◼ Laginɛ Ekwat.: 200
◼ Mali: 35
◼ Nizɛri: 50
◼ Santarafiriki: 300
◼ Sɛnɛgali: 220
◼ Togo: 3500