I yɛrɛ labɛn kabini sisan ka dɔ fara i ka cidenya baara kan
1. Hakilijigi wagati be sababu di an ma ka mun lo kɛ, ani an be se k’an yɛrɛ labɛn cogo di o kama?
1 Hakilijigi wagatiw bɛɛ be sababu kura di an ma ka Jehova “tanuli dɔnkili da” kosɔbɛ (Zab. 109:30). Yala i bena dɔ fara i ka cidenya baara kan marisikalo la walisa ka kunmabɔsara Dibaga waleɲuman lɔn wa? Sisan lo i ka kan k’a daminɛ k’i yɛrɛ labɛn.—Ntal. 21:5.
2. Salon awirilikalo la, dɔ bɔra piyɔniye kɔrɔsigiw ka lɛri hakɛ la. Ele ni balima wɛrɛw ye mun kɛ o kosɔn?
2 Piyɔniye kɔrɔsigi baara: Salon, kafow ɲagalila kosɔbɛ k’a mɛn ko dɔ bɔra piyɔniye kɔrɔsigiw ka lɛri hakɛ la awirilikalo la. Balimacɛ dɔ y’a sɛbɛ ko: “Ne bele be lise la, ani n’ y’a ye ko n’ tɛ se ka kɛ kudayi piyɔniye ye. Nka, ne bena n’ tɔgɔ di ka lɛri 30 kɛ ani n’ bena n’ jija ka lɛri 50 sɔrɔ awirilikalo la.” Balimamuso dɔ be baloɲini baara la tuma bɛɛ. Ale y’a sɛbɛ ko: “Lɛri bisaba, o kɔni ka nɔgɔ sa!” Piyɔniye kɔrɔ dɔ tun be ni saan 80 ye. Tuma min na ale y’a mɛn ko dɔ bɔra lɛri hakɛ la, a y’a fɔ ko: “Ne tun be min kɔnɔna o lo ye ten! Jehova b’a lɔn ko piyɔniye baara ye koo fisaman ye ne ka ɲɛnamaya kɔnɔ!” Mɔgɔ minw ma se ka kɛ piyɔniye kɔrɔsigiw ye, olu y’a laɲini ka dɔ fara u ka waajuli baara kan.
3. Mun na an ka kan k’a filɛ n’an be se ka kɛ piyɔniye kɔrɔsigiw ye marisi, awirili ani mɛ kalow la?
3 Marisikalo la, sababu ɲuman bena di an ma ka kɛ piyɔniye kɔrɔsigiw ye sabu an bena se k’a sugandi tugun ka lɛri 30 wala lɛri 50 kɛ. Ka fara o kan, k’a ta samedilon marisi tile 17nan na, an bena kanpaɲiba dɔ kɛ ka mɔgɔw weele u ka na Hakilijigi lajɛn kɛ n’an ye awirili tile 5nan na. A bena diya mɔgɔ caaman ye ka baaraba kɛ waajuli la fɔɔ u bena a ɲini ka kɛ piyɔniye kɔrɔsigiw ye tugun awirili ani mɛ kalow la. O kalow la lɛri hakɛ ye 50 lo ye.
4. An be se ka dɔ fara an ka cidenya baara kan cogo di, ani nafa juman bena sɔrɔ o la?
4 Aw ka gwa kɔnɔ batoli nata wagati la sufɛ, mun na aw tɛ baro kɛ k’a filɛ cogo min na aw kelen kelen be se ka dɔ fara a ka cidenya baara kan Hakilijigi wagati la? (Ntal. 15:22). Aw bena jijali min kɛ, a’ ye Jehova deli a k’aw duga o la (1 Yuh. 3:22). I kɛtɔ ka caaman kɛ cidenya baara la, i tɛna dɔ fara Jehova tandoli kan dɔrɔn dɛ, nka ele yɛrɛ bena ninsɔndiyaba sɔrɔ o la fana.—2 Kɔr. 9:6.