A ɲini k’i ka waajuli kɛcogo fisaya: N’i lamɛnbaga dimina, a jaabicogo

Mun na a kɔrɔtanin lo: An be kuma mɔgɔ minw fɛ waajuli la, u caaman b’an bonya. Nka, Yezu tun kɔnna k’a fɔ ko mɔgɔ dɔw bena an kɔniya (Zan 17:14). O kama, a tɛ bari an na k’a ye ko dɔw be dimi an kɔrɔ. N’o kɛra, an k’a tigi jaabi cogo dɔ la min bena diya Jehova ye, an nana ale min tɔgɔ la (Ɔrɔm. 12:17-21; 1 Piyɛri 3:15). N’an b’o kɛ, o tɛna dɔ fara a tigi ka dimiya kan. O fana bena kɛ seereya ye an lamɛnbaga n’a gɛrɛfɛ mɔgɔw fɛ ani o bena a to u ka sɔn ka lamɛnni kɛ siɲɛ wɛrɛ ni Jehova Seere dɔ nana bɔ u ye.—2 Kor. 6:3.

A kɛcogo:

I dusu suma ani a tigi minɛ ni teriya ye. O bena a tigi dusu faga. Kana a jati ko a tigi dimina e lo kɔrɔ (Waaj. 7:9). N’a sɔrɔ a diminin lo a yɛrɛ ka kunkow kosɔn, wala an y’a ka daa kɔkɔ wagati dɔ la min bɛnnin tɛ. Hali n’a tigi dimina an ka kibaro diiman lo kosɔn, a be se ka kɛ ko a lafilinin lo.—2 Kor. 4:4.
An k’a tigi jaabi ni dususuman ni kuma diimanw ye (Talenw 15:1). Yala an y’a tigi kunu sinɔgɔ la wala a tun be koo dɔ la ani an y’a lalɔ wa? Tiɲɛn lo ko an tɛ yafa deli mɔgɔw fɛ an ka waajuli baara kosɔn. Nka, an be se k’an yɛrɛ majigi ka yafa deli sabu an nana wagati dɔ la min bɛnnin tɛ. Yala a diminin lo sabu a ye ngalon kuma dɔw mɛn an koo la wa? N’o lo, an be se k’a fɔ ko: “N’ b’a faamu fɛɛn min kama i diminin lo. Nka, i ye min mɛn an koo la, a be komi o tɛ tiɲɛn ye. I be se k’a to n’ b’a ɲɛfɔ i ye wa?” N’a sɔrɔ a be an ka lannako nunu dɔ sɔsɔ, i n’a fɔ ka mɔgɔ gwɛn ka bɔ kafo la wala ka ban joli la. N’o lo, i be se k’a fɔ ko: “Ne b’i faamu. O koo be mɔgɔ wɛrɛw tɔɔrɔ fana. Bibulu be min fɔ o koo la, ne be se k’o yira i la wa?”
N’a tigi dusu gwanna kosɔbɛ, a ka fisa i ka taga. Kana a ɲini k’a jaabi. N’a ko a t’a fɛ Jehova Seerew ka na ale fɛ tugun, i be se k’a jigi sigi ko a ye min fɔ, an bena an janto o la.

Nin kɛ ka filɛ kalo nin na:

Gwa kɔnɔ batoli tuma na, a’ ye ɲɛyirali dɔ kɛ ka filɛ.
N’i bɔra mɔgɔ dɔ kɔrɔ min diminin lo, baro kɛ n’i waajulikɛɲɔgɔn ye k’a filɛ i tun be se k’a tigi jaabi cogo fisaman min na.