Yala Hakilijigi lajɛn nata bena kɛ sababu ɲuman ye i fɛ k’i ka waleɲumanlɔn yira wa?

1. Krista saya Hakilijigi be sababuba juman lo di an ma?

¹ Hakilijigi lajɛn bena kɛ awirili tile 14nan na. O bena kɛ sababu ye an fɛ ka Jehova waleɲuman lɔn a ka ɲumanya kosɔn. O sababu ɲɔgɔn tɛna sɔrɔ tugun saan kɔnɔ. Luka 17:11-18 b’a yira Jehova ni Yezu be waleɲumanlɔn koo jati cogo min na. A fɔ man di nka Yezu ye kunatɔ tan minw kɛnɛya, u la kelen dɔrɔn lo nana a fo. Sini ma, Yezu ka kunmabɔsara sababu la, banaw bɛɛ bena ban pewu ani mɔgɔw bena se ka ɲɛnamaya banbali kɛ! Siga t’a la, an bena Jehova fo loon o loon o dugaw kosɔn. Nka sanni o cɛ, an be se k’an ka waleɲumanlɔn yira cogo di lɔgɔkun nataw la?

2. Mun lo be se k’an dɛmɛ ka kɛ ni waleɲumanlɔn ye kunmabɔsara koo la?

² An ka kɛ ni waleɲumanlɔn ye: Mɔgɔ ka miiriyaw lo b’a lasun ka kɛ ni waleɲumanlɔn ye. Walisa k’an dɛmɛ ka kɛ ni waleɲumanlɔn ye kunmabɔsara koo la, Bibulu kalangwɛ porogramu dɔ labɛnna Hakilijigi wagati kama. O be sɔrɔ yɔrɔ caaman na, i n’a fɔ kalandiriye ani Examinons les Ecritures kɔnɔ. Mun na i t’o kalangwɛ kɛ n’i ka denbaya ye? N’an b’o kɛ, dɔ bena fara an ka waleɲumanlɔn kan kunmabɔsara koo la. O fana bena nɔɔ ɲuman to an ka kɛwalew kan.—2 Kor. 5:14, 15; 1 Zan 4:11.

3. Cogo jumanw na an be se k’an ka waleɲumanlɔn yira Hakilijigi wagati la?

³ An ka kɛ ɲumanlɔnbagaw ye: Waleɲumanlɔn be yira kɛwalew lo fɛ (Kɔlɔs. 3:15). Waleɲumanlɔn tun be kunatɔ min na, ale banbara ka Yezu yɔrɔ ɲini walisa k’a fo. A kɛnɛyara cogo kabakoman min na, siga t’a la a fana y’o lakali mɔgɔ wɛrɛw ye ni dusudiya ye (Luka 6:45). Waleɲumanlɔn min b’an na kunmabɔsara koo la, yala o bena an lasun an ka banba ka mɔgɔw bɛɛ weele u ka na Hakilijigi lajɛn na wa? Cogo wɛrɛ juman na an be se k’an ka waleɲumanlɔn yira? An be se ka kɛ piyɔniye kɔrɔsigi ye wala ka dɔ fara an ka waajuli baara kan Hakilijigi wagati la. Ni waleɲumanlɔn b’an na, o bena an lasun ka mɔgɔw bisimila Hakilijigi lajɛn na. An fana bena an yɛrɛ labila k’u ka ɲiningaliw jaabi.

4. An be se ka mun lo kɛ walisa nimisa kana an minɛ ɲinan ka Hakilijigi wagati tɛmɛnin kɔ?

⁴ Yala ɲinan ka Hakilijigi lajɛn bena kɛ a laban ye an fɛ wa? (1 Kor. 11:26) An m’a lɔn. Nka an b’a lɔn ko n’a tɛmɛna, sababu kelenpe min tun dira an ma k’an ka waleɲumanlɔn yira, o fana tɛmɛna. Yala i bena i ka waleɲumanlɔn yira o sababu sen fɛ wa? Jehova y’a tɛgɛ labila ka an kunmabɔsara di. An b’a fɛ an ka kumaw ani an dusukun na miiriliw ka diya a ye.—Zab. 19:15.