An ka waleɲumanlɔn yira Ala ka nilifɛnw bɛɛ la nafaman koo la
1. Mun na an be Jehova waleɲuman lɔn kosɔbɛ?
1 Jehova Dencɛ kanulen ye kunmabɔsara min di, o ye Jehova ka nilifɛn ɲumanw bɛɛ la nafaman ye ( Yak. 1:17). Duga caaman be se ka sɔrɔ o sababu fɛ, i n’a fɔ an ka jurumuw yafa (Efes. 1:7). O waleɲumanlɔn b’an na tuma bɛɛ. Krista saya Hakilijigi wagati la kɔni, an be wagati ta ka miiri o nilifɛn nafamanba koo la.
2. An be se ka an ka denbayamɔgɔw ani an yɛrɛ ka waleɲumanlɔn sabati cogo di kunmabɔsara koo la ?
2 An k’an ka denbayamɔgɔw ka wale-ɲumanlɔn sabati: Hakilijigi lajɛn bena kɛ marisi tile 30nan loon. Lɔgɔkun damanin ka kɔn o loon ɲɛ, batoli kɛtɔ gwa kɔnɔ suu fɛ, mun na aw tɛ wagati dɔ ta ka baro kɛ kunmabɔsara koo la walisa ka denbayamɔgɔw ka waleɲumanlɔn sabati? Bibulu kalangwɛ kɛrɛnkɛrɛnnin min ɲɛsinna Hakilijigiko ma, aw y’o kɛ fana denbaya kɔnɔ. I yɛrɛ ka miiri k’a filɛ kunmabɔsara y’i nafa cogo min na ani a ye nɔɔ min to i ka koow filɛcogo kan ka ɲɛsin Jehova, ele yɛrɛ, mɔgɔ wɛrɛw ani siniko ma. Ni dɔnkili gafe kuraman sera aw ka kafo kɔnɔ, dɔnkili kura fila nunu lo bena la Hakilijigi lajɛn na: 8nan ani 109nan. Nafa b’a la i k’i yɛrɛ degi olu lacogo la fana.—Zab. 77:13.
3. An be se k’an ka waleɲumanlɔn yira cogo di?
3 An ka waleɲumanlɔn yiracogo: An be ni waleɲumanlɔn min ye kunmabɔsara koo la, o b’an lasun an ka kuma Jehova koo la ani a ye kanuyaba min kɛ a kɛtɔ k’a Dencɛ ci (Zab. 145:2-7). Marisi, awirili ani mɛkalo la, denbaya dɔw b’u ka waleɲumanlɔn yira u kɛtɔ ka labɛn kɛ walisa u la kelen kɔni ka kɛ piyɔniye kɔrɔsigi ye. N’o tɛ se ka kɛ, yala aw be se ka “waati kunmabɔ” walisa ka dɔ fara aw ka cidenya baara kan wa? (Efes. 5:16). Waleɲumanlɔn bena an lasun fana ka mɔgɔ wɛrɛw dɛmɛ u ka na Hakilijigi lajɛn kɛ n’an ye ( Jir. 22:17). I b’a fɛ ka mɔgɔ minw weele, i k’a daminɛ k’olu tɔgɔw sɛbɛ: viziti kuraw, Bibulu kalandenw, somɔgɔw, baarakɛɲɔgɔnw ani sigiɲɔgɔnw. O kɔ, i k’i seen don bɛrɛbɛrɛ o kanpaɲi kɛrɛnkɛrɛnnin na.
4. An be se ka hakili sɔrɔ ka baara kɛ cogo di Hakilijigi wagati la?
4 Krista saya Hakilijigi wagati be sababu kuraw di an ma an k’a yira Jehova la ko an b’a waleɲuman lɔn kosɔbɛ a ka nili kosɔn, a ye min kɛ hadamadenw ye. An ka baara kɛ o wagati la ka dɔ fara an ka waleɲumanlɔn kan ani k’o waleɲumanlɔn yira kunmabɔsara koo la ani “Krisita ka nafolotigiya dama dɔnbali” koo la.—Efes. 3:8.