Baara kɛ koɲuman ni zurunali kɔrɔmanw ye

Ni zurunali kɔrɔmanw tonnin b’an fɛ wala n’an y’u fili, u tɛ mɔgɔ si nafa. O kama, a ka ɲi an ka banba k’u di mɔgɔw ma. Zurunali kelen dɔrɔn be se ka tiɲɛn nege don mɔgɔ la ani k’a lasun a k’a daminɛ ka Jehova tɔgɔ weele (Ɔrɔm. 10:13, 14). Ladili dɔw be sɔrɔ jukɔrɔ walisa k’i dɛmɛ ka baara kɛ koɲuman ni zurunali kɔrɔmanw ye.

• Waajuli man teli ka kɛ kiin dɔw la. N’i be waajuli kɛra o yɔrɔw la, n’a sɔrɔ i be se ka zurunali kɔrɔman dɔ to mɔgɔw ye minw tɛ yen u ka soo. I be se k’a bila yɔrɔ dɔ la walisa tɛmɛbaga kana a ye.

• N’an be waajuli kɛra jamayɔrɔw la, i n’a fɔ mobiliw wala tɛrɛn gariw la, mɔgɔw ɲininga n’u be sɛbɛ kalanta fɛ. Zurunali kɔrɔman damanin yira u la ani a to u ka dɔ sugandi.

• Yɔrɔ dɔw be sɔrɔ aw ka kafo ka kiinw kɔnɔ i n’a fɔ: dɔgɔtɔrɔsow, kilinikiw ani a ɲɔgɔnna yɔrɔw. N’i be waajuli kɛra yen, zurunali kɔrɔman damanin to yɔrɔ min na mɔgɔw be kɔnɔni kɛra. Nka a ka ɲi i ka sira ɲini yɔrɔ tigi fɛ fɔlɔ. N’an ka zurunaliw be o yɔrɔ la ka ban, i kana dɔ wɛrɛw bila yen.

• N’i b’i yɛrɛ labɛnna viziti kuraw kama, i bena taga bɔ mɔgɔ minw ye, miiri u kelen kelen bɛɛ ka makoyaw koo la. Yala denbaya b’a fɛ wa? Yala dugutaga ka di a ye wa? Yala nankɔ baara ka di a ye wa? I k’a filɛ i ka zurunali kɔrɔmanw kɔnɔ ni barokun dɔ be yen min bena diya a ye ani i ka taga o yira a la.

• N’i be to ka taga fɔn makodon mɔgɔ dɔ kɔ, n’i labanna k’a sɔrɔ a ka soo, a ma zurunali kɔrɔman minw sɔrɔ, i k’olu dɔw yira a la.