A ɲini k’i ka waajuli kɛcogo fisaya: Baro daminɛcogo walisa ka seereya kɛ sababu dɔ sen fɛ

Mun na a kɔrɔtanin lo: Ni an be waajuli kɛra soo ni soo, an ka teli k’a kɔrɔsi ko mɔgɔ caaman tɛ yen u ka soo. Nka an be se k’u kunbɛn n’an be bolifɛn dɔ kɔnɔ, n’an be kɔnɔni kɛra dɔgɔtɔrɔ fɛ, lafiɲɛ tumaw na baarakɛyɔrɔ la, lakɔliso la ani a ɲɔgɔnna. Jehova b’a fɛ bɛɛ ka Masaya kibaro diiman mɛn (1 Tim. 2:3, 4). Tuma caaman na, ni an b’a fɛ ka seereya kɛ, an yɛrɛ lo ka ɲi ka baro daminɛ.

A kɛcogo:

I ka sugandili kɛ. Yala a tigi dusu ka di ani a b’a fɛ ka baro kɛ wa? Yala koow cogoya bɛnnin lo walisa aw ka se ka baro kɛ dususuman na wa? Weleweledala dɔw b’a daminɛ ka mɔgɔ dɔ filɛ a ɲɛda la ani ka yɛlɛmisɛn kɛ. N’a tigi fana ye yɛlɛmisɛn kɛ, u be baro daminɛ.
N’i be siran ka kuma, i ka delili surun dɔ kɛ i kɔnɔ.—Neemi 2:4; Kɛw. 4:29.
A daminɛ ni kuma fitinin dɔ ye: a be se ka kɛ foli ye. Yezu ma sin ka kuma Ala ka Masaya koo la ni Samarika muso ye (Zan 4:7). Tuma dɔw la, i be se ka baro daminɛ ni tandoli kuma ye. I be se k’a fɔ ko: “I deenw kolo cogo ka ɲi dɛ!” I be se ka ɲiningali kɛ fana walisa ka baro daminɛ. I be se k’a fɔ ko: “Yala i ye kunu sufɛ ka kunnafoniw lamɛn wa?”
Ni baro daminɛna ka ban, a ɲini ka kibaro diiman kofɔ a tigi ye. Nka kana kɔrɔtɔ k’o kɛ. Kana a tigi waajibiya a ka kumaɲɔgɔnya kɛ n’i ye. N’a sɔrɔ i be se ka kuma dɔ fɔ min b’a tigi lasun a ka miiri ani ka ɲiningali dɔ kɛ. Ɲɛyirali fɛ, ni aw be baro kɛra denbaya koo la, i be se k’a fɔ ko: “Ne ye ladili ɲuman dɔw sɔrɔ denmisɛnw lamɔcogo la.” Ni aw be kumana fɛɛn dɔ koo la, i ye min mɛn kunnafoniw na, i be se k’a fɔ ko: “A ma mɛɛn, a diyara ne ye ka kibaro diiman dɔ kalan, min b’a yira ko yɛlɛmani bena don koow la.” I kana i fari faga ni baro banna k’a sɔrɔ i ma se ka seereya kɛ.
Sɛbɛninw wala gafe wɛrɛw ta i bolo. Ni mɔgɔ dɔ y’a makodon, i be se ka dɔ di a ma.

Nin kɛ ka filɛ kalo nin na:

Lɔgɔkun o lɔgɔkun, walisa ka seereya kɛ sababu dɔ sen fɛ, a ɲini ka baro daminɛ siɲɛ kelen ɲɔgɔn.