An ye Jehova Seerew ye tuma bɛɛ
1. Yesu ye seereya min kɛ muso ye kɔlɔnda la, an be kalan juman sɔrɔ o la?
1 Yesu tagamana lɛri caaman na. A sɛgɛnna ani minnɔgɔ tun b’a la. K’a to a ka kalandenw tagara domuni san yɔrɔ la, a y’i sigi ka lafiɲɛ kɔlɔn dɔ daa la Samari dugu dɔ gɛrɛ fɛ. Yesu tun ma na Samari waajuli kama, nka a tɛmɛtɔ tun lo dɔrɔn ka taga Galile mara la k’a ka cidenya baara lataga ɲɛ. O bɛɛ n’a ta, a tɛmɛna o sababu fɛ ka seereya kɛ muso dɔ ye min tun nana jii bɔ yɔrɔ la ( Yuh. 4:5-14). Mun na do? Ka kɛ Jehova “Seere Tilennen Sɛbɛma” ye Yesu ma o dabila loon si la ( Jir. 3:14). An be Yesu ladegi n’an ye Jehova Seerew ye tuma bɛɛ.—1 Piɛrɛ 2:21.
2. An be se k’an yɛrɛ labɛn cogo di walisa ka seereya kɛ koo dɔ sen fɛ?
2 An k’an yɛrɛ labɛn: N’an be gafe dɔw kɛ an kun, an labɛnnen bena to ka seereya kɛ koo dɔw sen fɛ. Weleweledala caaman be sɛbɛninw to u bolo kɔrɔ ani u be u di feerelikɛlaw ma magazɛnw kɔnɔ, esansi feerebagaw ma ani u be mɔgɔ wɛrɛ minw kunbɛn tile kɔnɔ (Waaj. 11:6). Balimamuso dɔ ka teli ka taga tagama na. Tuma o tuma, a b’a janto ka Bibulu dennin ni gafe Qu’enseigne ? don a ka sakɔsi dennin kɔnɔ ani a b’a jija ka baro daminɛ ni mɔgɔw ye minw sigilen be a gɛrɛ fɛ.
3. An be se ka baro daminɛ cogo di?
3 Baro daminɛcogo: N’an be seereya kɛra koo dɔw sen fɛ, waajibi tɛ an ka baro daminɛ kelen Bibulu kan. Yesu ma baro daminɛ ni muso ye kɔlɔnda la a kɛtɔ k’a yɛrɛ yira a la ko a ye Masiya ye. A ye jii minta dɔrɔn deli a fɛ, o ye muso lasun ka ɲiningali kɛ ( Yuh. 4:7-9). Balimamuso dɔ y’a kɔrɔsi k’o kɛcogo ɲɔgɔn b’ale dɛmɛ ka baro dadon n’u y’a ɲininga ko: yala fɛti diyara wa? Sanni a k’a fɔ ko ale ma fɛti kɛ sabu a ye Jehova Seere ye, a b’a fɔ ko: “Ne yɛrɛ y’a latigɛ ko n’ tɛ o fɛti kɛ.” Koo sɛnsɛnla ka teli ka ɲiningali kɛ ko: mun na do? O be sira di balimamuso ma ka seereya kɛ.
4. Mun na Matiyu 28:18-20 be an jija waajuli la?
4 Yesu ye kisɛya kɛ k’a ka cidenya baara dafa ka ban dugukolo kan. Nka, a bele b’a mako donna kosɔbɛ waajuli baara la min be kɛra i ko ale y’a kɛ cogo min na (Mat. 28:18-20). I ko an ka Ɲɛyirabaga Yesu, an fana ye Seerew ye minw labɛnnen lo k’an ka limaniya kofɔ bɛɛ ɲɛɛ na tuma bɛɛ.—Heb. 10:23.