Waajuli kɛcogo kura dɔ jamayɔrɔw la
1. A ɲinina kafo dɔw fɛ ko u ka mun lo kɛ yɔrɔ minw na sennatigiw ka ca?
1 Kafo dɔw ka kiin dɔw la, sennatigiw ka ca yɔrɔ dɔw la. A tun ɲinina o kafow fɛ u ka labɛnw kɛ ka se ka seereya kɛ jamayɔrɔw la ni tabaliw wala wotorow ye. N’u be seereya kɛra ni wotoro lo ye, weleweledala kelen ɲɔgɔn ka ɲi ka lɔ wala ka sigi a kɔrɔ. Nka ni tabali lo, weleweledala fila lo ka kan ka to ale gɛrɛfɛ. Minw be to wotoro wala tabali kɔrɔ, olu ka kan k’u jija ka mɔgɔw bisimila dusudiya ni teriya la. Ni mɔgɔ dɔ be jaaw filɛra wotoro wala tabali kan, balima kelen be se ka baro daminɛ n’a ye. A be se k’o tigi ɲininga ko: “I delila k’i yɛrɛ ɲininga Bibulu be min fɔ barokun nin koo la wa?” Balima wɛrɛ (mɔgɔ kelen wala fila) be se ka to wotoro gɛrɛfɛ ani ka sababu ɲini ka seereya kɛ.
2. Wale dɔ lakali min b’a yira ko nafa b’a la ka seereya kɛ ni wotoro wala tabali ye jamayɔrɔw la.
2 O waajuli kɛcogo sababu fɛ, bibulukalan daminɛna ni mɔgɔ caaman ye. Inivɛrisite kalanden dɔ y’a latigɛ ka barokun dɔ sɛbɛ Jehova Seerew koo la. Nka, a ma se ka Masaya Boon yɔrɔ lɔn. Lɔgɔkun nɔfɛta la, a ye Jehova Seere dɔw ye inivɛrisite la, u siginin be tabali dɔ gɛrɛfɛ ka waajuli kɛ. Balimaw ye bibulukalan daminɛ n’a ye. Sisan a batisera ani ale yɛrɛ be waajuli kɛ o cogo kelen na.
3. Balima dɔw be mun lo miiri waajuli kɛcogo kura nin koo la?
3 O waajuli kɛcogo diyara balimamuso dɔ ye. A y’a fɔ ko: “Mɔgɔw be lɔ k’an ka zurunali kuraw ta. Dɔw yɛrɛ tun ma Jehova Seerew koo mɛn ka ye. Ne y’a ye ko mɔgɔ caaman be se ka kibaro diiman mɛn o sababu fɛ.” Balimamuso wɛrɛ ko: “Nin ye waajuli kɛcogo kura ye min ka di kosɔbɛ, sabu mɔgɔw lo be na i yɔrɔ ani u b’a fɛ k’a lɔn i be min kɛra.”
4. Mun na nafa b’a la an ka wotoro wala tabali bila yɔrɔ kelen na ani wagati kelen na, loon tigitigi dɔw la lɔgɔkun o lɔgɔkun?
4 Nafa b’a la an ka wotoro wala tabali bila yɔrɔ kelen na ani wagati kelen na, loon tigitigi dɔw la lɔgɔkun o lɔgɔkun. O la, mɔgɔw bena deli k’an ye ani u tɛna sigasiga ka gwɛrɛ an na ka ɲiningaliw kɛ wala ka sɛbɛ kalantaw minɛ. Yala i ka kafo ye labɛnw kɛ walisa ka seereya kɛ jamayɔrɔw la wa? N’o lo, i be se k’i seen don o waajuli kɛcogo nin na walisa ka “Ala ka masaya koo fɔ.” O waajuli kɛcogo nin ka di ani nafa b’a la.—Luka 9:60.