Seereya kɛcogo bɛrɛbɛrɛ siradaw la

1. An be se ka Yesu ladegi koo juman na?

¹ Yesu ka cidenya baara tuma na dugukolo kan, a tun be mɔgɔ minw kunbɛn sira kan ani foroba yɔrɔw la, a tun tɛ sigasiga ka kuma u fɛ (Luka 9:57-61; Yuh. 4:7). A ka kibaro nafa tun ka bon ani a tun b’a fɛ k’o fɔ mɔgɔ caamanba ye. Ka seereya kɛ siradaw la, o ye fɛɛrɛ ɲuman ye min be mɔgɔw dɛmɛ u ka Ala ka hakilitigiya sɔrɔ bi (Ntal. 1:20). An bena sanga sɔrɔ bɛrɛbɛrɛ n’an b’a bɔ an yɛrɛ la ka gwɛrɛ mɔgɔw la ani n’an be koow kɛ ni hakili ye.

2. Seereya kɛtɔ siradaw la, mun na nafa b’a la an k’a bɔ an yɛrɛ la ka gwɛrɛ mɔgɔw la?

² An k’a bɔ an yɛrɛ la ka gwɛrɛ mɔgɔw la: Tuma caaman na, a ka fisa an ka gwɛrɛ mɔgɔw la sanni ka lɔ wala ka sigi yɔrɔ kelen na ani ka tɛmɛbagaw makɔnɔ ko olu ka gwɛrɛ an na. An ka yɛlɛmisɛn dɔ kɛ, an ka mɔgɔw filɛ u ɲɛdaw la, ani an ka gwɛrɛ u la teriya la ni dususuman ye. N’an be seereya kɛra ni weleweledala wɛrɛw ye, tuma caaman na a ka fisa an ka gwɛrɛ mɔgɔw la an dan na dan na. Ni mɔgɔ dɔ y’a mako don, an ka cogoya ɲini k’a tigi dɛmɛ siɲɛ wɛrɛ. Baro banni kɔ, n’a be se ka kɛ, an k’an dusu diya k’a tigi ɲininga cogo min na an bena se k’a sɔrɔ siɲɛ wɛrɛ. Weleweledala dɔw be to ka seereya kɛ yɔrɔ kelen na sirada dɔ la. O la, u tun kɔnna ka mɔgɔ minw kunbɛn, u be cogoya sɔrɔ ka kuma u fɛ tugun ani k’u dɛmɛ.

3. Seereya kɛtɔ sirada la, an be se ka koow kɛ ni hakilitigiya ye cogo di?

³ An ka hakili sɔrɔ: An bena lɔ yɔrɔ min na sirada la ani ka gwɛrɛ mɔgɔ minw na, an ka hakili sɔrɔ o koo la. Waajibi tɛ an k’a ɲini ka seereya kɛ tɛmɛbagaw bɛɛ ye. An ka kɔrɔsili kɛ. Ni mɔgɔ dɔ kɔrɔtɔnin lo, a ka fisa an k’a to a ka tɛmɛ. N’an be seereya kɛra magazɛn dɔ daa la, an k’an janto an kana patɔrɔn kɔnɔ gwan gwansan. Sanni an k’a ɲini ka seereya kɛ mɔgɔw ye u dontɔ magazɛn kɔnɔ, a ka fisa an ka gwɛrɛ u la u bɔtɔ. An ka gwɛrɛ u la cogo dɔ la min tɛna u lasiran wala k’u jaa tigɛ. An fana ka hakili sɔrɔ n’an be gafew kofɔra u ye. Ni mɔgɔ dɔ m’a mako don koɲuman, an ka sɛbɛnin dɔ di a ma zurunaliw nɔɔ na.

4. Ka seereya kɛ sirada la, mun na o ye waajuli faan diiman dɔ ye nafa be min na?

⁴ Ka seereya kɛ sirada la, o b’a to an be tiɲɛn kisɛ caaman seri wagati kunkurunin kɔnɔ (Waaj. 11:6). An be mɔgɔ minw kunbɛn o sen fɛ, n’a sɔrɔ an yɛrɛ tun tɛna se k’u dɔw sɔrɔ waajuli kɛtɔ soo ni soo. Mun na i tɛ labɛn kɛ k’i seen don waajuli la siradaw la? O ye waajuli faan diiman dɔ ye nafa be min na.