An ka waajuli kɛ bɛrɛbɛrɛ foroba yɔrɔw la
1 I ko Yesu ka kalanden fɔlɔw y’a kɛ cogo min na, bi kerecɛnw b’a ɲini ka kibaro duman lase mɔgɔw ma yɔrɔ o yɔrɔ (Kew. 16:13; 17:17; 20:20, 21). U b’u jijara ka waajuli kɛ foroba yɔrɔw la. O y’u dɛmɛ ka makodon mɔgɔ dɔw sɔrɔ, mɔgɔ minw tun tɛ se ka sɔrɔ cogoya wɛrɛ la soo ni soo waajuli sen fɛ.
2 An ka kan ka hakili sɔrɔ n’an be waajuli kɛra foroba yɔrɔw la. Tuma caaman na, a ka fisa an ka baara kɛ nɛmɛnɛmɛ. Ɲɛyirali fɛ, ni weleweledala caamanba be seereya dira yɔrɔ kelen na, wala n’u bɛɛ donna magazɛn kelen kɔnɔ, mɔgɔ dɔw be se k’a jate ko an b’u degunna. O be se k’an tɔgɔ tiɲɛ ani k’an ka baara nagasi. An be se ka mun lo kɛ walisa o kana kɛ? Foroba waajulikɛyɔrɔw ka ca kafo dɔw kɔnɔ. U y’a ye ko nafa b’a la k’o yɔrɔw tigɛtigɛ ka kɛ waajulikɛyɔrɔw ye dan na dan na (1 Kɔr. 14:40). Ka fara o kan, koo ferekelenw tɛna kɛ n’an be dan an ka kafo ka kiinw dɔrɔn ma ka waajuli kɛ yen, fɔɔ ni n’an ka kafo waajuliko ɲɛnabɔbagaw jɛnkulu ye labɛn tigitigi dɔ kɛ walisa an ka kafo wɛrɛ dɛmɛ.—A filɛ km 11/98 ɲɛɛ 6nan, dakun 18-19nan kɔnɔ.
3 Kuma lasecogo mɔgɔw ma: Tuma min na Yesu kumana ni muso dɔ ye kɔlɔnda la, a ye baro daminɛ ni kuma damaninw dɔrɔn ye. Muso kɛtɔ k’a mako don baro la, Yesu y’a ka baro lataga ɲɛ dɔɔni dɔɔni (Yuh. 4:7-26). O kɛcogo be sanga sɔrɔ yɔrɔ dɔw la bi fana. Weleweledala dɔw y’a ye ko n’u b’a fɛ ka waajuli kɛ bɛrɛbɛrɛ foroba yɔrɔw la, nafa b’a la ka wagati damanin ta ka mɔgɔw fo, k’an janto u la ka sɔrɔ ka Masaya cira fɔ u ye. U be kuma kiin kɔnɔ koo dɔ kan. Tuma caaman na, o be kɛ sababu ye ka baro dabɔ. Mɔgɔw mana se k’u ka fɛtaw ɲɛfɔ, u be sɔn ka lamɛnni kɛ koɲuman. Ani, sanni u ka bɔ a kala ma, o y’a sɔrɔ weleweledalaw b’u dusu saalola ni Ala ka Kuma ye.—Rom. 15:4.
4 Makodon mɔgɔw dɛmɛcogo: An mana baro diiman kɛ ni mɔgɔ dɔ ye, an ka kan k’a ɲini ka labɛn kɛ ka segi ka na a tigi dɛmɛ. An be se k’o kɛ cogo juman na? Ni baro be sera a daan na, an be se k’an ka karinɛ bɔ sakɔsi la ani k’a fɔ ko: “Baro nin diyara ne ye. Yala an be se ka taga ɲɛ n’a ye siɲɛ wɛrɛ wa?” Wala, an k’a fɔ ko: “Ne b’a fɛ i ka barokun dɔ kalan. Ne lanen b’a la ko a bena diya i ye. Yala ne be se ka na n’a ye i ka soo wala i ka baarakɛyɔrɔ la wa?” Weleweledala dɔw b’a fɔ dɔrɔn: “Yala ne be se k’i ka telefɔni nimɔrɔ sɔrɔ ani k’i weele wa?” Tuma caaman na, o be mɔgɔw lasun k’an jaabi koɲuman.
5 An siɲɛ fɔlɔ ye mɔgɔ minw kunbɛn foroba yɔrɔw la, u caaman sɔnna ka bibulukalan kɛ. O kalan be se ka kɛ a tigi ka soo, a ka baarakɛyɔrɔ la, foroba yɔrɔ bɛnnen na, wala telefɔni fɛ. Waajuli kɛtɔ bɛrɛbɛrɛ foroba yɔrɔw la, an k’a ɲini ka bibulukalanw daminɛ ni mɔgɔw ye.
[Study Questions]
1. I ko kerecɛn fɔlɔw tun y’a kɛ cogo min na, cogo juman na bi kerecɛnw be seereya dira mɔgɔw ma foroba yɔrɔw la? Tɔnɔ juman be sɔrɔla u ka jijali kɛli la?
2. Mun na an ka kan ka hakili sɔrɔ n’an be waajuli kɛra foroba yɔrɔw la? Ani, an be se ka mun lo kɛ walisa koow ka kɛ cogo tilennen na?
3. Weleweledala dɔw y’a kɔrɔsi ko waajuli kɛcogo juman be sanga sɔrɔ foroba yɔrɔw la?
4. An be makodon mɔgɔ minw kunbɛn, cogo juman na an be se k’u dɛmɛ?
5. Waajuli kɛtɔ foroba yɔrɔw la, an ka laɲinita ka kan ka kɛ juman ye?