An ka sin ka mɔgɔw weele
1. An bena kanpaɲi daminɛ tuma juman walisa ka mɔgɔw weele ka na tile saba lajɛnba la?
1 Fɛti dumuni tobiliko tɛ ɲɛ baaraba ni musaka caaman kɔ. N’i y’o ɲɔgɔnna dumuni labɛn, siga t’a la a bena diya i ye k’i somɔgɔw wala i teriw weele. O cogo kelen na, baaraba kɛra walisa ka tile saba lajɛnba nata labɛn. O bena kɛ fɛtiba ye an fɛ Alako ta fan fɛ. Jehova ye nɛɛma di an ma ko an ka mɔgɔw weele ka na o fɛti la. An bena o baara daminɛ lɔgɔkun saba ka kɔn an ka lajɛnba ɲɛ. Mun lo bena an dɛmɛ ka welelisɛbɛw di mɔgɔw ma ni dusudiya ye?
2. Mun lo bena an lasun an k’an seen don bɛrɛbɛrɛ kanpaɲi na?
2 Jehova be kalan nafamanba di an ma an ka lajɛnbaw la. N’an be wagati ta ka miiri k’a filɛ o b’an nafa cogo min na, o lo bena an lasun an k’an seen don bɛrɛbɛrɛ kanpaɲi na (Ezayi 65:13, 14). An kana ɲinɛ fana ko an be kanpaɲi min kɛ saan o saan, nafa be sɔrɔ o la. (Koorilen nin lajɛ: “Nafa min sɔrɔla a la.”) An be mɔgɔ minw weele, u dɔw bena sɔn ka na lajɛnba la, nka dɔw tɛna sɔn ka na. U caaman nana wo, u caaman ma na wo, an be jijaliba min kɛ kanpaɲi tuma na, o be kɛ sababu ye ka Jehova tando ani k’a ka ɲumanya yira.—Zab. 145:3, 7; Yir. 22:17.
3. An bena welelisɛbɛw tilan tilan cogo di?
3 Welelisɛbɛw ka kan ka jɛnsɛn cogo di kafo ka kiinw bɛɛ kɔnɔ? Mɔgɔ minw tɛ u ka soo, yala an ka ɲi ka dɔ to u ye wa? Yala an ka ɲi ka welelisɛbɛw tilan tilan forobayɔrɔw la wa? Diinan mɔgɔkɔrɔw jɛnkulu lo bena o koow latigɛ. Wikɛniw na, n’a bɛnnin lo, an ka zurunaliw fara welelisɛbɛw kan k’u di mɔgɔw ma. Kanpaɲi bannin kɔ, a bena diya an ye kosɔbɛ k’a ye ko an y’an seen don bɛrɛbɛrɛ a la. An dusu bena diya fana k’a ye ko Jehova ye fɛtiba min labɛn an ye, mɔgɔ caamanba nana fara an kan o fɛti la!