Hakilijigi lajɛn welelisɛbɛw jɛnsɛnni bena daminɛ awirili tile 2nan na
1. Tuma juman na an bena welelisɛbɛw jɛnsɛn ɲina, ani nafa juman be o kanpaɲi na min be kɛ saan o saan?
1 K’a ta awirili tile 2nan ma ka taga se a tile 17nan ma, an bena welelisɛbɛw jɛnsɛn ka mɔgɔw weele ka na saan kɔnɔ kooba la min ye Krista ka saya Hakilijigi ye. Kanpaɲi minw kɛra saan tɛmɛnenw na, makodon mɔgɔ caaman sɔnna weeleli ma. Ɲɛyirali fɛ, Hakilijigi lajɛn loon na, muso dɔ ye telefɔni ci betɛli ma k’a fɔ ko: “Ne dontɔ lo n ka soo, ani n ye welelisɛbɛ dɔ ye daa jukɔrɔ. Ne b’a fɛ ka taga, nka ne t’a lɛri lɔn.” Balimacɛ y’a fɔ a ye yɔrɔ min na a be se k’o kunnafoni sɔrɔ welelisɛbɛ yɛrɛ kan. Muso ye baro dacɛ ko: “Ne bena taga aw ka lajɛn na suu nin na!”
2. An be se ka mun lo fɔ welelisɛbɛ yiratɔ mɔgɔw la?
2 O sɛbɛ dicogo: Komi an ka kan k’a jɛnsɛn kiinw bɛɛ kɔnɔ ani wagati man ca, a ka ɲi an kana kuma caya. An be se k’a fɔ ko: “Aw ni sɔgɔma! An b’a fɛ ka aw ka somɔgɔw weele ka na kooba dɔ la min be kɛ saan o saan. Ɲinan, a bena kɛ dimansilon, awirili tile 17nan na duniɲa kuru bɛɛ kɔnɔ. [Welelisɛbɛ di a tigi ma.] O loon ye Yesu ka saya sanyɛlɛmalon ye. Kalan dɔ bena di ka bɔ Bibulu kɔnɔ k’a yira cogo min na an be se ka nafa sɔrɔ Krista ka kunmabɔsara la. Wariko t’a la. O lajɛn bena kɛ yɔrɔ min na ani lɛri min na an sigida la, o bɛɛ sɛbɛra sɛbɛ nin kan.”
3. An be se ka mɔgɔ caamanba weele cogo di u ka na Hakilijigi lajɛn na?
3 Ni kafo ka kiinw ka ca, luu minw kɔnɔ mɔgɔw tɛ yen, diinan mɔgɔkɔrɔw be se k’a latigɛ ko an ka welelisɛbɛw to u ye ni tɛmɛbagaw ɲɛɛ tɛna kɛ a la. An k’an janto ka welelisɛbɛ dɔ di an ka vizitiw ma, somɔgɔw, baarakɛɲɔgɔnw, lakɔli filankuruw, ani an lɔnbaga wɛrɛw ma. Wikɛniw na, n’a bɛnnen lo, an ka zurunaliw fara welelisɛbɛ kan k’u di mɔgɔw ma. Yala i be se ka kɛ piyɔniye kɔrɔsigi ye awirilikalo la walisa ka se ka dɔ fara i ka baara kan o kanpaɲi diiman na wa?
4. Mun na an b’a fɛ makodon mɔgɔw ka na Hakilijigi lajɛn na?
4 Makodon mɔgɔ minw bena na Hakilijigi lajɛn na, a bena kɛ seereya barikaman ye u fɛ dɛ! Jehova ye kanuyaba min yira a kɛtɔ ka kunmabɔsara di, u bena o koo mɛn (Yuh. 3:16). U bena a faamu cogo min na Ala ka Masaya bena hadamadenw nafa (Es. 65:21-23). A bena fɔ u ye fana ko u ka ɲɛsin mɔgɔ kunbɛnbagaw ma ka bibulukalan ɲini walisa ka dɔ fara u ka lɔnniya kan. An be Jehova deli a k’a to mɔgɔ kɔnɔgwɛ caaman ka sɔn an ka weeleli ma ani ka jɛn n’an ye Hakilijigi lajɛn na!