An k’a ɲini ka mɔgɔw kɛ Krista ka kalandenw ye

1. Walisa mɔgɔw ka kisi, fɔɔ an ka mun lo kɛ?

¹ Saan 2014 ka rapɔɔri b’a yira ko Ala sagokɛlaw cɛsirinin lo ka Masaya kibaro diiman waaju ni kisɛya ye (Mat. 24:14). An be waajuli kɛ soo ni soo ani an be kanpaɲi kɛrɛnkɛrɛnninw kɛ walisa ka sɛbɛninw ani welelisɛbɛw tilan tilan mɔgɔw ye. An be seereya kɛ fana jama yɔrɔw la. O fɛɛrɛw sababu fɛ, an be Bibulu ka kibaro lasera mɔgɔ caaman ma sisan ka tɛmɛ fɔlɔ kan. Nka, walisa mɔgɔw ka kisi, fɔɔ an ka bibulukalan kɛ n’u ye k’u dɛmɛ u ka kɛ Krista ka kalandenw ye.—1 Tim. 2:4.

2. N’an b’a fɛ an labɛnnin ka to ka bibulukalan kofɔ mɔgɔw ye, an ka ɲi k’an yɛrɛ ɲininga mun ni mun lo la?

² An labɛnnin ka to ka bibulukalan kofɔ mɔgɔw ye: Ni mɔgɔ dɔ y’a mako don, yala i b’a ɲini k’a tigi ka ladɛrɛsi ni telefɔni nimɔrɔ sɔrɔ wa? Yala i be segi ka taga bɔ a tigi ye joona joona walisa ka bibulukalan daminɛ n’a ye wa? Yala i mɛɛnna ka bibulukalan kɛcogo ɲɛyira mɔgɔ dɔ la ɲɔgɔnyeko fɔlɔ la wa? I be deli ka zurunaliw di mɔgɔ minw ma, yala i mɛɛnna ka bibulukalan kofɔ u ye wa? An be to ka videwo nunu yira mɔgɔw la: Mun na i ka ɲi ka bibulukalan kɛ? ani An be bibulukalan kɛ ni mɔgɔw ye cogo di? Yala i ye u yira i ka baarakɛɲɔgɔnw, lakɔli filankuruw, i sigiɲɔgɔnw, i somɔgɔw ani i lɔnbaga wɛrɛw la wa? An be tɛmɛ gafe dɔw fɛ ka bibulukalan kɛ ni mɔgɔw ye. N’i be waajuli kɛra ni tabali wala wotoro ye, ni mɔgɔ ye o gafe dɔ ta, yala i b’a fɔ a tigi ye ko an be bibulukalan kɛ ni mɔgɔw ye gwansan o gafe kɔnɔ wa?

3. An ka ɲi ka mun lo kɛ walisa ka mɔgɔw kalan bɛrɛbɛrɛ tiɲɛn koo la?

³ Jehova ni Yezu ka dɛmɛ: Yezu ye cikan di ko an ka mɔgɔw kɛ ale ka kalandenw ye. O cikan daminɛ na, a ko “aw ye taga,” o kɔrɔ ko an ka ɲi ka jijali kɛ ani k’a bɔ an yɛrɛ la ka koow kɛ. Nka, Yezu m’an to an kelen na. A ko a bena to n’an ye (Mat. 28:19, 20). Ka fara o kan, an mako be fɛɛn minw na walisa ka mɔgɔw kalan tiɲɛn koo la, Jehova b’o di an ma: hakili senu, baarakɛminanw ani fɔrɔmasɔn (Zak. 4:6; 2 Kor. 4:7). Ka bibulukalan kɛ ni mɔgɔw ye, o ye baara ye min kɔrɔtanin lo. An be se ka Jehova deli a k’o “kɛli nigɛ don” an na ani “k’a kɛ see di” an ma.—Filip. 2:13.

4. Mun na an ka ɲi k’a ɲini ka mɔgɔw kɛ Krista ka kalandenw ye?

⁴ Ka kibaro diiman fɔ mɔgɔw ye, o b’an ninsɔndiya kosɔbɛ. Dɔ yɛrɛ be fara an ka ninsɔndiya kan, n’an sera ka mɔgɔ dɔ kalan tiɲɛn koo la ani k’a dɛmɛ a nana fara an kan ɲɛnamaya sira kan (Mat. 7:14, ABM; 1 Tes. 2:19, 20). Min yɛrɛ kɔrɔtanin lo kosɔbɛ, o ye ko n’an b’a ɲini ka mɔgɔw kɛ Krista ka kalandenw ye, an koo be diya Jehova ye, ale min “t’a fɛ mɔgɔ si ka halaki, a b’a fɛ bɛɛ ka se ka nimisa ka faran a ka kojuguw la.”—2 Piyɛri 3:9.