Mɔgɔw kalan ni kitabunin nin ye: Kibaro diiman min bɔra Ala yɔrɔ
1. Kitabunin Kibaro diiman labɛnna cogo di?
1 Zuwekalo la, an y’a ye An ka Masaya Cidenyabaara kɔnɔ ko an ka baarakɛminan jɔnjɔn dɔ ye kitabunin nin ye: Kibaro diiman min bɔra Ala yɔrɔ. Vɛrise minw kofɔra a kɔnɔ, u kɔnɔkow ma sɛbɛ. O la, a bena diya an lamɛnbagaw ye ka lɔnniya sɔrɔ Ala ka Kuma yɛrɛ kɔnɔ. An ka gafe minw dilanna bibulukalan kama, u caaman sɛbɛra cogo dɔ la walisa u kalanbagaw ka se k’u faamu u yɛrɛ ma. Nka, nin kitabunin labɛnna walisa kalanfa dɔ k’a kalanbaga dɛmɛ k’a faamu. O kama, n’an y’a di mɔgɔ dɔ ma, a ka ɲi an ka bibulukalan kɛcogo yira a tigi la. O la, a tigi bena a ye ko ninsɔndiya b’a la ka kibaro diiman kalan Bibulu yɛrɛ kɔnɔ.—Mat. 13:44.
2. An be se ka baara kɛ ni kitabunin Kibaro diiman ye cogo di ɲɔgɔnyeko fɔlɔ la?
2 Ɲɔgɔnyeko fɔlɔ la: I be se k’a fɔ ko: “Mɔgɔ caaman b’u yɛrɛ ɲininga ko duniɲa nin be tagara min le. E ka miiri la, duniɲa ka koow bena fisaya wa? [Mɛnni kɛ a tigi fɛ.] Kibaro diiman be sɔrɔ Bibulu kɔnɔ ani o kibaro be se ka jigiya di an ma. Ɲiningali dɔw filɛ yan. U jaabili be sɔrɔ Bibulu kɔnɔ.” Kitabunin di a tigi ma. A ɲini a fɛ a ka ɲiningali dɔ sugandi ɲɛɛ laban na. A tigi ye kalansen min sugandi, o dakun fɔlɔ lajɛ n’a ye ka kalan kɛcogo yira a la. Ele yɛrɛ fana be se ka kalansen dɔ sugandi ani k’o kalansen ka ɲiningali dɔ kɛ walisa ka kalan nege don i lamɛnbaga la. O kɔ, a yira a tigi la cogo min na kitabunin be se k’a dɛmɛ ka jaabili sɔrɔ Bibulu kɔnɔ. Ni jw.org ka videwo dɔ ɲɛsinna o kalansen ma, weleweledala dɔw b’o yira u lamɛnbaga la.
3. A ɲɛfɔ bibulukalan be kɛ cogo min na ni kitabunin nin ye: Kibaro diiman.
3 Kalan kɛcogo: 1) Ɲiningali min sɛbɛra ka fin, a daminɛ k’o kalan walisa ka lamɛnnikɛla dɛmɛ a ka miiriya jɔnjɔn faranfasi. 2) Dakun nɔfɛta kalan. 3) Vɛrise minw sɛbɛra ka jɛngɛ, i k’olu kalan. O kɔ, ɲiningali dɔw kɛ nɛmɛnɛmɛ walisa ɲiningali min sɛbɛra ka fin, i lamɛnbaga k’o jaabili sɔrɔ vɛrisew kɔnɔ. 4) Ni dakun wɛrɛ be yen ɲiningali jukɔrɔ, i ka tugu ladili 2nan ni 3nan kɔ k’o dakun lajɛ. Ni videwo dɔ ɲɛsinna o ɲiningali ma ani i m’o yira a tigi la fɔlɔ, i k’o kɛ wagati dɔ la baro kɛtɔ. 5) A laban, i tun kɔnna ka ɲiningali min kalan a daminɛ na, a ɲini a tigi fɛ a k’o jaabi walisa i k’a filɛ n’a y’o faamu.
4. Mun lo bena an dɛmɛ ka se baara kɛcogo la koɲuman n’o kitabunin nafaman ye?
4 A ɲini k’o kitabunin nafaman lɔn ka ɲɛ. Baara kɛ n’a ye sababuw bɛɛ la. Miiri kalanden koo la fɔlɔ ka sɔrɔ ka taga kalan kɛ n’a ye. A filɛ cogo min na i be se ka baara kɛ ni kalansen ka vɛrisew ye walisa ka hakilijagabɔ kɛ n’a tigi ye koɲuman (Talenw 15:28; Kɛw. 17:2, 3). N’i be sera baara kɛcogo la koɲuman n’o kitabunin ye, i bena a ye ko baarakɛminan ɲuman lo min be i dɛmɛ ka mɔgɔw kalan tiɲɛn koo la!