An bena kitabunin kura min yira mɔgɔw la

1. An bena gafe juman yira mɔgɔw la novanburu la, ani a dilankun ye mun ye?

¹ Saan 2009, an ka tile saba lajɛnba “A’ ye to ɲɛɛ na” la, an ye kitabunin kura dɔ sɔrɔ min kuun ko: La Bible — Quel est son message ? Novanburukalo la, kafow bena a daminɛ k’a yira mɔgɔw la duniɲa kuru bɛɛ kɔnɔ. O kitabunin bena an ka kiinmɔgɔw nafa cogo di? Mɔgɔw fanba, sanko minw tɛ kerecɛn diinanw kɔnɔ, u tɛ bɛrɛ lɔn Bibulu koo la. O kama a ɲɛfɔra kitabunin ɲɛɛ 3nan na ko a dilankun ye ka Bibulu kɔnɔkow lakali ka surunya.

2. An be se ka kitabunin yira cogo di?

² A yiracogo: An be se k’a fɔ ko: “An b’a fɛ k’i ka miiriya lɔn nin kan. [2 Timote 3:16 kalan.] An ye baro kɛ ni mɔgɔ minw ye, u caaman sɔnna kuma nunu ma. Dɔ wɛrɛw b’a jati ko Bibulu tɛ foyi ye kitabu ɲuman kɔ. E be mun miiri Bibulu koo la? [Mɛnni kɛ a tigi fɛ.] An ka diinan mana kɛ min o min ye, kuun b’a la an yɛrɛ ka Bibulu sɛgɛsɛgɛ ka filɛ. [Dadon kuma minw be kitabunin ɲɛɛ 3nan na, i k’u kalan.] Kitabu nin be Bibulu kɔnɔkow lakali cogo diiman na ka surunya. I kɛtɔ k’a kalan, i bena bɔ koo diiman dɔ kala ma: Barokun kelen lo be sɔrɔ Bibulu kuru bɛɛ kɔnɔ.”

3. Yɔrɔ minw na mɔgɔ caaman tɛ kerecɛn diinanw kɔnɔ, an be se ka kitabunin yira cogo di?

³ Yiracogo dɔ wɛrɛ filɛ nin ye. Yɔrɔ minw na mɔgɔ caaman tɛ kerecɛn diinanw kɔnɔ, n’an be waajuli kɛra yen, an be se k’a fɔ ko: “Min fɔra yan Bibulu (wala kitabu senuman nin) kɔnɔ, an b’a fɛ k’i ka miiriya lɔn o kan. [Zaburuw 37:11 kalan.] E ka miiriya la, dugukolo bena kɛ cogo di n’o kiraya kuma nana dafa? [Mɛnni kɛ a tigi fɛ.] Nin ye jigiya ni dususalo kumaw ye minw be sɔrɔ Bibulu kɔnɔ ka ɲɛsin mɔgɔ sifaw bɛɛ ma, u bɔyɔrɔ wala u ka diinan mana kɛ min o min ye.” Dakun min be ɲɛɛ 3nan sanfɛla la, i k’o kalan.

4. An be se ka baara kɛ ni kitabunin ye cogo di walisa ka bibulukalan daminɛ?

⁴ An ka bibulukalan daminɛ: An tun ye baro kɛ ka tɛmɛ koo min kan n’a tigi ye, n’an segira ka taga bɔ a fɛ, an be se k’a hakili jigi o la ani k’o tilanyɔrɔ ka dakun kelen wala fila lajɛ n’a ye an kɛtɔ ka baara kɛ n’o tilanyɔrɔ ka ɲiningaliw ye. Wala, n’an b’a fɛ ka sin ka baara kɛ ni gafe Bibulu ka kalan ye, an be se ka kitabunin kɔɔ kalan. O kɔ, an ka gafe Bibulu ka kalan di a ma, an k’a ɲininga sapitiri min ka di a ye. Ani, an k’o sapitiri ka dakun kelen wala fila lajɛ ɲɔgɔn fɛ. An bɛɛ k’an seko bɛɛ kɛ k’o kitabunin kofɔ mɔgɔw ye novanburu la!