Baara kɛcogo ni fɛɛn lamɛntaw ye
1. Ka fara an ka gafew kan, an be ni fɛɛn nafaman jumanw lo ye?
1 A ka di mɔgɔ caaman ye ka kuma diimanw ani tiɲɛn kumaw kalan jw.org kan (Waaj. 12:10). Nka, i ye baara kɛ ni fɛɛn lamɛntaw ye wa? O b’a to i be se ka fɛɛn caaman lamɛn an ka site web kan. Fɛɛn lamɛntaw be se k’an nafa cogo di?
2. An be se ka baara juman kɛ ni fɛɛn lamɛntaw ye kelenna kalan wala gwakalan na?
2 Kelenna kalan ani gwakalan kama: N’an be tagara voyazi la wala n’an be loon o loon baaraw kɛra, an be se ka Bibulu, zurunaliw, wala gafe dɔ kalangwɛ lamɛn. O la, an ka wagati bena an nafa (Efɛz. 5:15, 16). An be se ka dɔ fara gwa kɔnɔ batoli diya kan n’an be gafew kalan lamɛn ani ka tugu o kalan kɔ an ka gafe kɔnɔ. Gafew kalan lamɛnni be se k’an nafa fana kelenna kalan na. O nafa yɛrɛ ka bon kosɔbɛ n’an b’a fɛ ka kalangwɛ kɛcogo fisaya wala n’an be kaan dɔ degira.
3. Fɛɛn lamɛntaw be se ka jɔn lo nafa an ka kiinw kɔnɔ?
3 Waajuli la: Dɔw be ban k’an ka gafew kalan sabu olu fɛ, u bolo degunnin lo kojugu. O ɲɔgɔnna mɔgɔw be se ka sɔn k’an ka gafew kalan lamɛn. An be se fana ka mɔgɔ dɔw kunbɛn min be kaan wɛrɛ fɔ. Olu ka teli k’an lamɛn n’u ye Masaya kibaro mɛn “u yɛrɛ ka kaan na.” (Kɛw. 2:6-8). Siya dɔw fɛ, mɔgɔw b’u ka lɔnniya fanba sɔrɔ u kɛtɔ ka lamɛnni kɛ. Ɲɛyirali fɛ, Julaw b’u ka koo tɛmɛninw wala u ka jamana ka koow lakali bɔnsɔn nataw ye. U ye min mɛn, u tɛ ɲinɛ o kɔ hali dɔɔni. Farafinna, siya caaman be tɛmɛ maana lakalili fɛ ka mɔgɔw kalan.
4. Walisa ka kiinmɔgɔw dɛmɛ, an be se k’an yɛrɛ ɲininga mun ni mun lo la?
4 Aw ka kiinw kɔnɔ, yala nafa b’a la k’a to mɔgɔw k’an ka gafew kalan lamɛn dɔɔni u yɛrɛ siyakan na wa? N’an ye fɛɛn lamɛnta ci mɔgɔ dɔ ma e-mail fɛ, yala a bena a tigi nafa wa? Yala an be se ka gafe dɔ kalan telesarse CD kan ani k’o gafe yɛrɛ fara a kan k’a di makodon mɔgɔ dɔ ma wa? N’an ye gafe, kitabunin, sɛbɛnin wala zurunali kuturu telesarse k’a di mɔgɔ dɔ ma waajuli la, an be se k’o jati an ka rapɔɔri kɔnɔ. Fɛɛn lamɛntaw labɛnna an ye. An be se k’u lamɛn kelenna kalan tuma na ani u be se k’an dɛmɛ ka Masaya tiɲɛn kisɛw dan.—1 Kor. 3:6.