Bibulu b’an kalan mun lo la?—Baara kɛcogo n’o gafe ye

Gafe fila nunu bɔnin be ɲɔgɔn ma: Bibulu b’an kalan mun lo la? ani Kalan tigitigi juman be Bibulu kɔnɔ? U fila bɛɛ ye an ka baarakɛminanw ye. U fila ka kalan ye kelen ye ani u ka sapitiriw be tugu tugu ɲɔgɔn kɔ cogo kelen na. Nka, gafe kura faamu ka nɔgɔ ani a ka kumaw tilennin lo. Gafe kɔrɔman faamu ka gwɛlɛ mɔgɔ minw ma, kuraman labɛnna olu lo kama. Kunnafoni wɛrɛw be sɔrɔ fana kuraman kɔnɔ. U be kumaden dɔw kɔrɔ ɲɛfɔ cogo nɔgɔman na. Ɲiningali minw be sapitiriw dadon ani koorilen minw kɛra segikanni kama, olu tɛ sɔrɔ a kɔnɔ. Nka sapitiri kelen kelen bɛɛ laban na, kalan ka hakilinata jɔnjɔnw lo be sɔrɔ. I ko an tun b’a kɛ ni gafe kɔrɔ ye cogo min na, an be se ka kuraman di mɔgɔw ma tuma bɛɛ hali n’an tɛ ale lo yirala mɔgɔw la kalo kɔnɔ. An be se ka baara kɛ n’o gafe kura kɔnɔko dɔw ye cogo di n’an be bibulukalan kɛra ni mɔgɔ ye?

HAKILINATA JƆNJƆN: An tun be to ka bibulukalan kɛ gafe Bibulu ka kalan kɔnɔ nin cogo la: dakunw be kalan ani ɲiningali be kɛ. An bele be se k’o kɛ ni gafe kura ye. Aw be kalan kɛra kaan min na, ni kalanden t’o mɛn ka ɲɛ wala n’a tɛ se kalan na koɲuman, a’ ye kalan kɛ gafe kura kɔnɔ. O la, i be se ka kalan basigi sapitiri ka hakilinata jɔnjɔnw kan. Kalanden jija a ka dakunw kalan kɔfɛ a yɛrɛ ma. Hakilinata jɔnjɔn minw be sapitiriw laban na, an be se k’u lajɛ miniti 15 ɲɔgɔn kɔnɔ. Komi o hakilinata jɔnjɔnw tɛ sapitiri ka miiriyaw walawala, kalanfa ka kan k’a yɛrɛ labɛn koɲuman. A ka ɲi k’a hakili to kalanden makow la fana. N’an y’a latigɛ ka sapitiri ka dakunw kalan, o la an ka hakilinata jɔnjɔnw to segikanni kama.

KUNNAFONI WƐRƐW: Kumaden minw ɲɛfɔra kunnafoni wɛrɛw kɔnɔ, u be tugu ɲɔgɔn kɔ i n’a fɔ an b’u sɔrɔ cogo min na dakunw kɔnɔ. Kalan kɛtɔ, kalanfa be se k’a latigɛ ka baro kɛ o kunnafoni wɛrɛw kan.