KERECƐNW KA ƝƐNAMAYA
Jehova ka sariyakolow labato tagamacogo ta fan fɛ
Jehova ye sariyakolow sigi adamadenw kan tagamacogo ta fan fɛ. Ɲɛyirali fɛ, a y’a latigɛ ko cɛɛ ni muso ka furu ka ɲi ka kɛ furututuko ye (Mat. 19:4-6, 9). A be jatɔya sugu bɛɛ haramuya (1 Kor. 6:9, 10). A yɛrɛ ye sariyakolow di an ma fanidoncogo ni sawura ta fan fɛ. O lo b’a to a ka mɔgɔw be dan na tɔɔw la.—Deter. 22:5; 1 Tim. 2:9, 10.
Bi tilew la, mɔgɔ caaman tɛ Jehova ka sariyakolow jati (Ɔrɔm. 1:18-32). U b’a to mɔgɔw ka kɛcogo be nɔɔ to u ka fanidoncogo, u sawura ani u tagamacogo kan. Mɔgɔ caaman t’u ka kojugu dogo ani minw ka kɛcogo be dan na, u b’olu kɔrɔfɔ.—1 Piyɛri 4:3, 4.
An minw ye Jehova Seerew ye, an ka ɲi k’an jaa gwɛlɛya ka Ala ka sariyakolow labato (Ɔrɔm. 12:9). Cogo di do? Min ka di Jehova ye, an ka mɔgɔw dɛmɛ nɛmɛnɛmɛ u k’o lɔn. Nka, an yɛrɛ ka ɲi ka kɛ ni tagamacogo ɲuman ye. Ɲɛyirali fɛ, n’an b’a fɛ ka fani don wala k’an kuun masiri cogo dɔ la, an k’an yɛrɛ ɲininga ko: ‘Ne ye min sugandi, yala o bɛnnin be Jehova ka miiriya ma wala duniɲa ta ma wa? Ne ka fanidoncogo ni n’ sawura b’a yira ko ne be bonyaba la Ala kan wa?’ Wala n’an b’a fɛ ka fɛɛn dɔ filɛ telewisɔn na, an be se k’an yɛrɛ ɲininga ko: ‘Yala o ka di Jehova ye wa? A be mɔgɔw jija u ka tugu jɔn lo ka miiriya kɔ? Ne ye ɲɛnagwɛko min sugandi, yala o b’a to n’ dusukun tɛ n’ lasɔmi tugun wa? (Zab. 101:3). A be se ka kɛ sentalonfɛn ye n’ somɔgɔw wala tɔɔw fɛ wa?’—1 Kor. 10:31-33.
Mun na a kɔrɔtanin lo an ka Jehova ka sariyakolow labato tagamacogo ta fan fɛ? Yanni dɔɔni, Yezu Krista bena duniɲa nin halaki ani ka juguya bɛɛ ban (Ezek. 9:4-7). Minw be Ala sago kɛ, olu dɔrɔn lo bena kisi (1 Zan 2:15-17). An ka to ka Jehova ka sariyakolow labato tagamacogo ta fan fɛ walisa minw b’an ka tagamacogo ɲuman kɔrɔsi, olu ka se ka nɔɔrɔ la Ala kan.—1 Piyɛri 2:11, 12.
Ne ka fanidoncogo ni n’ ka sawura be mun lo yira n’ tagamacogo koo la?
VIDEWO NIN FILƐ: I KA KƐ JEHOVA TERI YE: CƐƐ KELEN, MUSO KELEN. O KƆ, ƝININGALI NUNU JAABI:
Mun na hakilitigiyako lo ka Jehova ka sariyaw labato?
Mun na bangebagaw ka ɲi k’a daminɛ k’u deenw kalan Jehova ka sariyakolow la kabi u denmisɛnman?
Cogo juman na kanbelew wala sunguruw ani mɔgɔkɔrɔbaw be se ka mɔgɔw dɛmɛ u ka nafa sɔrɔ Jehova ka ɲumanya la?