Baara kɛ ni JW.ORG daminɛyɔrɔ ye waajuli la

Barokunw ani videwo minw be an ka site web daminɛyɔrɔ la, u labɛnna walisa u ka diya mɔgɔ kɔnɔgwɛw ye minw tɛ Jehova Seerew ye (Kɛw. 13:48). Tuma caaman na, barokun dɔw be sɔrɔ yen mɔgɔw ka teli ka kuma minw koo la wala ka miiri minw na.

I be se ka baara kɛ ni jw.org daminɛyɔrɔ ye cogo di waajuli la?

• An ka site jw.org lajɛ tuma bɛɛ. Barokun minw bɔra kura ye, u lajɛ. Minw b’u mako don an ka waajuli baara la, miiri k’a filɛ i be se ka baara kɛ n’o barokunw ye cogo min na walisa k’u dɛmɛ. (N’i b’a fɛ k’a lɔn barokun wɛrɛ minw bɔra jw.org daminɛyɔrɔ la a ma mɛɛn, yɔrɔ nin digi faransɛkan na: “Voir plus.”) N’i be to ka fɛɛn kuraw lajɛ an ka site web kan, o bena i dɛmɛ ka miiriya kuraw sɔrɔ waajuli baara kama.

• Basigi an ka site web daminɛyɔrɔ ka barokunw ni videwow kan ka baro dadon. U be se k’i dɛmɛ ka miiriya ɲumanw sɔrɔ minw bena diya kiinmɔgɔw ye.

• An ka site jw.org daminɛyɔrɔ yira mɔgɔw la. Barokun tigitigi dɔw bɔ kɛnɛ kan ani a yira a tigi la a be se ka kunnafoniw ɲini an ka site kan cogo min na.

• An ka site web lien ci mɔgɔw ma. Mɔgɔ dɔw t’a fɛ ka baro kɛ n’an ye, nka u be sɔn k’an ka site web lajɛ. Kana sigasiga k’an ka site web daminɛyɔrɔ lien ci mɔgɔw ma. Barokunw ni videwo minw be sɔrɔ yen, kana sigasiga k’u fana lien ci mɔgɔw ma.