Yezu ye cɛɛ minw sigi kafo kun na, i ka waleɲumanlɔn yira u la

1. Yezu ye fɛɛn minw di an ma, u dɔw kofɔ.

ADAMADEN si tɛgɛ labilanin tɛ ka se Yezu ma. A ye kabako caaman kɛ dugukolo kan ka tɔɔw dɛmɛ (Luka 9:12-17). A ye fɛɛn min di an ma min nafa ka bon ka tɛmɛ nilifɛn tɔɔw bɛɛ kan, o ye a niin ye (Zan 15:13). Kabi a suu kununa, a bele tora k’a yira ko a tɛgɛ labilanin lo. I ko a tun y’a daa di cogo min na, a ye Jehova deli ko a ka hakili senu di an ma walisa a k’an kalan ani k’an dusu saalo (Zan 14:16, 17; 16:13). Kafo ka lajɛnw fana sababu fɛ Yezu bele b’an dɛmɛna walisa an ka mɔgɔw kɛ a ka kalandenw ye dugukolo kuru bɛɛ kan.—Mat. 28:18-20.

2. ‘Boɲafɛn’ minw kofɔra Efɛzikaw 4:7, 8 kɔnɔ, olu ye jɔnw lo ye?

² An k’a filɛ Yezu ye fɛɛn wɛrɛ min di an ma. Ciden Pol ko Yezu yɛlɛnin kɔ sankolo la, a ye cɛɛ dɔw di an ma k’u kɛ “boɲafɛnw” ye (Efɛzikaw 4:7, 8 kalan). Pol y’a ɲɛfɔ ko Yezu ye o boɲafɛnw di an ma walisa ka kafodenw dɛmɛ cogo caaman na (Efɛz. 1:22, 23; 4:11-13). Bi bi nin na, o ‘boɲafɛn’ dɔw ye kɔrɔsigi cidenw, kafo ka diinan mɔgɔkɔrɔw ani kafokulu kɔrɔsibagaw ye.a Komi o cɛɛw ye mɔgɔ dafabaliw ye, u be fili tuma dɔw la (Zaki 3:2). Nka, an Matigi Yezu Krista be tɛmɛ o cɛɛw fɛ k’an dɛmɛ. Boɲafɛnw lo, a ye minw di an ma.

3. A ɲɛfɔ cogo min na an bɛɛ be se k’o cɛɛw dɛmɛ u ka baara la.

³ Yezu ye cɛɛ minw di an ma k’u kɛ “boɲafɛnw” ye, a y’u sigi kafo kun na walisa u ka kafodenw barika bonya (Efɛz. 4:12). Nka, an kelen kelen bɛɛ be se k’u dɛmɛ k’o kunkanbaaraba dafa. Misali la, Masaya Boon lɔli baara la, dɔw be lɔli kɛ, dɔ wɛrɛw be baarakɛlaw dɛmɛ, u kɛtɔ ka tobili kɛ u ye wala k’u dɛmɛ cogo wɛrɛw la. O cogo kelen na, an kelen kelen bɛɛ be se ka kɔrɔsigi cidenw, diinan mɔgɔkɔrɔw ani kafokulu kɔrɔsibagaw dɛmɛ an ka kumaw n’an ka kɛwalew fɛ. An k’a filɛ cogo min na u ka baaraba b’an nafa. An k’a filɛ fana cogo min na an be se k’o cɛɛw waleɲuman lɔn ani k’an ka waleɲumanlɔn yira Yezu fana na, ale min ye o cɛɛw di an ma k’u kɛ “boɲafɛnw” ye.

KƆRƆSIGI CIDENW B’AN DƐMƐ COGO NAFAMANW NA

4. Saan kɛmɛkulu fɔlɔ la, kɔrɔsigi cidenw ye tɔɔw dɛmɛ cogo nafaman jumanw lo la?

⁴ Saan kɛmɛkulu fɔlɔ la, balimacɛ dɔw tun ye kɔrɔsigi cidenw ye (1 Tim. 3:8). A be komi Pol tun kaan be olu lo ma tuma min na a ko dɔw ka baara tun ye “mɔgɔ dɛmɛli” ye, o kɔrɔ u tun be baara nafamanw kɛ kafodenw ye (1 Kor. 12:28). Diinan mɔgɔkɔrɔw tun be kafodenw kalan ani k’u dɛmɛ Alako ta fan fɛ. Walisa u ka se k’u kuun bɛɛ don o baara la, kɔrɔsigi cidenw tun be baara kɔrɔtanin wɛrɛw kɛ kafo kɔnɔ. Misali la, n’a sɔrɔ kɔrɔsigi cidenw tun be dɛmɛ don ka Ala ka Kuma kopiw kɛ. N’a sɔrɔ u tun be taga minanw san fana kopikɛbagaw ye.

5. Bi bi nin na, kɔrɔsigi cidenw be baara nafaman jumanw lo kɛ?

⁵ An ka kuma kɔrɔsigi cidenw ka baara nafaman dɔw koo la (1 Piyɛri 4:10). Tuma caaman na, u be kafo ka wariko ani waajulikɛ kiinw koo ɲɛnabɔ, u be gafew komandiw kɛ ani k’u labila kafodenw ye. U be sono ni videwo koo ɲɛnabɔ, ka mɔgɔ kunbɛn lajɛnw na ani ka dɛmɛ don ka Masaya Boon ladon fana. O baaraw bɛɛ kɔrɔtanin lo walisa koow bɛɛ ka kɛ ka ɲɛ kafo kɔnɔ (1 Kor. 14:40). Ani kɔrɔsigi ciden dɔw be kalanw kɛ Kerecɛnw ka ɲɛnamaya n’u ka waajuli baara lajɛn na ani ka forobakalanw kɛ. Kɔrɔsigi ciden be se ka kɛ waajuli jɛnkulu kɔrɔsibaga dɛmɛbaga ye fana. Tuma dɔw la, kɔrɔsigi ciden kolɔnbagaw be diinan mɔgɔkɔrɔw bila sira ka taga bɔ balimaw ye walisa k’u jija.

6. Kɔrɔsigi cidenw be baaraba min kɛ, mun na an b’u waleɲuman lɔn o kosɔn?

⁶ Kɔrɔsigi cidenw ka baaraw be balimaw nafa cogo di? Balimamuso Beberlyb be Bolivi jamana na. A ko: “An ka kɔrɔsigi cidenw sababu la, n’ be se ka lajɛnw diyabɔ bɛrɛbɛrɛ. N’ be se ka dɔnkili la, ka lakalitaw kɛ, ka kalanw lamɛn ani ka kalan sɔrɔ ka bɔ videwow ani jaaw la. U b’u janto an latangali koo la ani u ka dɛmɛ barika la, dɔw be se ka lajɛnw kɛ vidéoconférence sababu fɛ. Lajɛn bannin kɔ, u be dɛmɛ don ka yɔrɔ saniya, ka kafo ka wariko ɲɛnabɔ ani an mako be gafe minw na, u b’u janto an k’o sɔrɔ. N’ b’u waleɲuman lɔn o kosɔn!” Leslie be Kolɔnbi jamana na ani a cɛɛ ye diinan mɔgɔkɔrɔ ye. A ko: “N’ cɛɛ mako be kɔrɔsigi cidenw ka dɛmɛ na walisa k’a ka kunkanbaaraw dafa. Ni kɔrɔsigi cidenw ka dɛmɛ tun tɛ, a bolo degunnin tun bena kɛ kojugu. N’ b’u waleɲuman lɔn sabu u kisɛyanin lo ani u labilanin lo ka tɔɔw dɛmɛ.” Siga t’a la, i fana be ni o miiriya lo ye!—1 Tim. 3:13.

7. An be se k’a yira kɔrɔsigi cidenw na cogo di ko an b’u waleɲuman lɔn? (jaa lajɛ fana).

⁷ Tiɲɛn lo ko an dusukun fanin lo waleɲumanlɔn na kɔrɔsigi cidenw koo la. Nka Bibulu b’an jija ko an k’a yira ko an ye “ɲumanlɔnbagaw ye.” (Kɔlɔs. 3:15). Christophe ye diinan mɔgɔkɔrɔ ye Fɛnlandi jamana na. A y’a fɔ ale b’a ka waleɲumanlɔn yira cogo min na. A ko: “N’ be lɛtɛrɛ wala mesazi dɔ ci kɔrɔsigi ciden dɔ ma, o min na n’ be vɛrise dɔ kofɔ. N’ b’a fɔ cogo tigitigi min na a ye n’ jija ani fɛɛn min kama a ka baara ka di n’ ye.” Pascal ni Jael be Nuvɛli Kaledoni jamana na. Tuma caaman na, olu be to ka delili kɛ kɔrɔsigi cidenw ye. Pascal ko: “A wagati damanin ye nin ye, an be to ka Jehova deli kosɔbɛ kɔrɔsigi cidenw ye ani k’a fo u kosɔn. An b’a deli fana a ka to k’u dɛmɛ.” Jehova be o ɲɔgɔnna deliliw lamɛn ani o be kafo bɛɛ nafa.—2 Kor. 1:11.

DIINAN MƆGƆKƆRƆW BE BAARABA KƐ

8. Mun na ciden Pol y’a fɔ saan kɛmɛkulu fɔlɔ diinan mɔgɔkɔrɔw koo la ko u be baaraba kɛ? (1 Tesalonikaw 5:12, 13).

⁸ Saan kɛmɛkulu fɔlɔ la, diinan mɔgɔkɔrɔw tun be baaraba kɛ kafo kɔnɔ (1 Tesalonikaw 5:12, 13 kalan; 1 Tim. 5:17). Olu lo tun ye kafo ɲɛminɛbagaw ye, sabu u tun be lajɛnw ɲɛminɛ ani ka desizɔnw ta. U tun be balimaw “ladi,” o kɔrɔ, u tun be ladili tigitigi dɔw di u ma ni kanuya ye walisa ka kafo latanga (1 Tes. 2:11, 12; 2 Tim. 4:2). O cɛɛw tun be baaraba kɛ k’u ka denbayamɔgɔw mako wasa ani u tun b’u jija fana walisa u ka limaniya sabatinin ka to.—1 Tim. 3:2, 4; Titi 1:6-9.

9. Bi, diinan mɔgɔkɔrɔw ka kunkanbaara dɔw ye jumanw ye?

⁹ Bi, diinan mɔgɔkɔrɔw bolo degunnin lo. U ye waajulikɛlaw ye (2 Tim. 4:5). U ye ɲɛyirali ɲumanw ye sabu u kisɛyanin lo waajuli la ani u be labɛnw kɛ walisa waajuli ka kɛ kafo ka kiinw kɔnɔ. U be fɔrɔmasɔn di an ma fana walisa an ka se ka waajuli ni bibulukalanw kɛ koɲuman. N’u ka ɲi ka kiti tigɛ, u be makari ani u tɛ mɔgɔ bɔ mɔgɔ la. Ni kerecɛn dɔ ye jurumuba kɛ, diinan mɔgɔkɔrɔw b’u jija k’a dɛmɛ walisa a ka jɛnɲɔgɔnya ɲuman kɛ ni Jehova ye kokura. O wagati kelen na, u b’u janto kafo saniyanin ka to Alako ta fan fɛ (1 Kor. 5:12, 13; Gal. 6:1). Diinan mɔgɔkɔrɔw ka baara fɔlɔ ye k’u janto Ala ka sagakulu la (1 Piyɛri 5:1-3). U be kalanw kɛ minw basigira Bibulu kan ani u b’u yɛrɛ labɛn koɲuman o kama. U b’u jija ka kafoden kelen kelen bɛɛ lɔn ka ɲɛ ani u be taga bɔ u ye walisa k’u jija. Diinan mɔgɔkɔrɔ dɔw be ni kunkanbaara wɛrɛw ye fana. Misali la, dɔw be dɛmɛ don Masaya Boonw lɔli n’u ladonko la, dɔw be dɛmɛ don tile saba lajɛnba labɛnko la ani dɔw ye CLH balimaw ye wala u be taga bɔ balima banabagatɔw ye. Diinan mɔgɔkɔrɔw be baaraba kɛ yɛrɛ le an kosɔn!

10. Mun na an ka ɲi ka diinan mɔgɔkɔrɔw waleɲuman lɔn u ka baaraba kosɔn?

¹⁰ Jehova tun kɔnna k’a fɔ ko diinan mɔgɔkɔrɔw bena an ladon ka ɲɛ ani ko o kama ‘siranya tena an minɛ tugu, an tena yɛrɛyɛrɛ.’ (Zer. 23:4). Balimamuso Johanna be Fɛnlandi jamana na ani a y’o kumaw tiɲɛntigiya ye tuma min na a bamuso banana ka juguya. A ko: “A tun ka gwɛlɛ n’ ma ka n’ dusukunnakow fɔ tɔɔw ye. Nka, diinan mɔgɔkɔrɔ dɔ muɲuna n’ kɔrɔ, k’a sɔrɔ n’ yɛrɛ tun t’a lɔn ka ɲɛ. A ye delili kɛ ni n’ ye ani ka n’ hakili sigi ko Jehova be n’ kanu. N’ hakili t’a la a ye min fɔ tigitigi. Nka n’ hakili b’a la ko n’ hakili sigira. N’ lanin b’a la ko Jehova lo y’a ci n’ fɛ wagati bɛnnin na walisa a ka n’ dɛmɛ.” I ka kafo diinan mɔgɔkɔrɔw delila k’i dɛmɛ cogo di?

11. An be se k’a yira cogo di ko an be diinan mɔgɔkɔrɔw waleɲuman lɔn? (jaa lajɛ fana).

¹¹ Jehova Ala b’a fɛ an k’an ka waleɲumanlɔn yira kosɔbɛ diinan mɔgɔkɔrɔw la “u ka baara kosɔn.” (1 Tes. 5:12, 13). Henrietta fana be Fɛnlandi ani a ko: “A ka di diinan mɔgɔkɔrɔw ye ka tɔɔw dɛmɛ. Nka, o kɔrɔ tɛ ko wagati b’u fɛ ani fanga b’u la ka tɛmɛ balima tɔɔw kan wala ko gwɛlɛya foyi t’u kan. N’ b’a fɔ u ye tuma dɔw la ko: ‘I b’a lɔn wa? I ye diinan mɔgɔkɔrɔ ɲuman ye yɛrɛ le!’” Balimamuso dɔ tɔgɔ ko Sera ani a be Tirki jamana na. A y’a fɔ ko: “Diinan mɔgɔkɔrɔw mako be jijali la walisa ka taga ɲɛ u ka baara la. O la an be se ka lɛtɛrɛ sɛbɛ k’a ci u ma, k’u weele ka na dumuni kɛ wala ka waajuli kɛ n’u ye.” Yala diinan mɔgɔkɔrɔ dɔ ka baara ka di i ye kosɔbɛ wa? N’o lo, sababuw ɲini walisa k’i ka waleɲumanlɔn yira a la.—1 Kor. 16:18.

KAFOKULU KƆRƆSIBAGAW BE KAFOW SABATI

12. Saan kɛmɛkulu fɔlɔ la, labɛn juman lo y’a to kafow sabatira? (1 Tesalonikaw 2:7, 8).

¹² Yezu Krista ye cɛɛ dɔw sigi fana walisa u ka kafodenw dɛmɛ cogo wɛrɛ la. A tɛmɛna Zeruzalɛmu cɛkɔrɔbaw fɛ ka Pol, Barnabasi ani mɔgɔ wɛrɛw ci kafokulu kɔrɔsili baara la (Kɛw. 11:22). Mun na do? Walisa u ka kafow sabati. O kuun kelen nin lo kama a ye kɔrɔsigi cidenw ani diinan mɔgɔkɔrɔw sigi kafo kɔnɔ (Kɛw. 15:40, 41). O cɛɛw be fɛɛn caaman saraka ka se k’u ka baara kɛ. Tuma dɔw la yɛrɛ, u b’u niin bila farati la walisa ka se ka balimaw kalan ani k’u jija.—1 Tesalonikaw 2:7, 8 kalan.

13. Kafokulu kɔrɔsibagaw ka kunkanbaara dɔw ye jumanw ye?

¹³ Kafokulu kɔrɔsibagaw be voyazi kɛ tuma o tuma. Tuma dɔw la, u be kilomɛtɛrɛ caamanba lo kɛ ka taga bɔ kafow ye. Lɔgɔkun o lɔgɔkun, kafokulu kɔrɔsibaga be kalan caaman kɛ ani a be taga bɔ balimaw ye walisa k’u jija. A be piyɔniyew ka lajɛn, diinan mɔgɔkɔrɔw ka lajɛn ani waajuli baara lajɛnw kɛ. A be kalanw labɛn ani ka kafokulu ka lajɛnbaw ni tile saba lajɛnbaw labɛn fana. Ka fara o kan, a be fɔrɔmasɔn di piyɔniyew ka lakɔli la ani ka lajɛn kɛrɛnkɛrɛnnin dɔ labɛn kafokulu ka piyɔniyew ye. Tuma dɔw la fana, Betɛli b’a ɲini a fɛ a ka koo kɔrɔtanin dɔw ɲɛnabɔ teliya la.

14. Mun na an ka ɲi ka kafokulu kɔrɔsibagaw waleɲuman lɔn u ka baaraba kosɔn?

¹⁴ Kafokulu kɔrɔsibagaw be baaraba min kɛ, o be kafow nafa cogo di? Balimacɛ dɔ be Tirki. Kafokulu kɔrɔsibaga minw nana bɔ a ka kafo ye, a y’a fɔ olu koo la ko: “U tɛmɛko kelen kelen bɛɛ la, u ye n’ jija ko n’ ka to ka wagati caaman ta ka n’ balimaw dɛmɛ. N’ ye kafokulu kɔrɔsibaga caaman lɔn. Nka, u si m’a to n’ k’a miiri ko u bolo degunnin lo kojugu wala ko u t’a fɛ ka baro kɛ ni n’ ye.” An kumana Johanna min koo la, ale ye waajuli kɛ ni kafokulu kɔrɔsibaga dɔ ye loon dɔ ani u ma mɔgɔ si sɔrɔ soo. O bɛɛ n’a ta, a ko: “N’ tɛna ɲinɛ o loon kɔ abada! Kafokulu kɔrɔsibaga ye n’ jija sabu n’ kɔrɔmuso fila tun yɛlɛmana yɔrɔ wɛrɛ la a ma mɛɛn ani u ɲɛnafin tun be n’ na kosɔbɛ. A ye n’ dɛmɛ k’a faamu ko n’an be baara kɛra Jehova ye, tuma bɛɛ tɛ an bena to an somɔgɔw n’an teriw gɛrɛfɛ. Nka duniɲa kura kɔnɔ, an bena sababu caaman sɔrɔ ka kɛ n’u ye.” An caaman hakili b’a la an ka kafokulu kɔrɔsibaga dɔ y’an dɛmɛ cogo minw na.—Kɛw. 20:37–21:1.

15. a) An be se k’a yira cogo di ko an be kafokulu kɔrɔsibagaw waleɲuman lɔn? (3 Zan 5-8; jaa lajɛ fana). b) U ye balimacɛ minw sigi kafo kɔnɔ, mun na an ka ɲi ka bonya la u musow kan ani an be se k’o kɛ cogo di? (koorilen nin lajɛ: “A’ ye aw janto u musow la”).

¹⁵ Balimacɛ minw be taga bɔ kafow ye, ciden Zan ye Gayusi jija ko a k’u ladon koɲuman. A ko a ka taga ɲɛ n’a ka dɛmɛ ye “o ka kɛ Ala sago la, waasa u ka se k’u ka taama kɛ.” (3 Zan 5-8 kalan). An be se k’o kɛ cogo minw na, u la dɔ ye ka kafokulu kɔrɔsibaga weele dumuni na an ka soo. Cogo wɛrɛ ye k’an seen don bɛrɛbɛrɛ waajuli baara la dan na lɔgɔkun tuma na. An kumana Leslie min koo la, ale b’a ka waleɲumanlɔn yira cogo wɛrɛw la. A ko: “N’ be Jehova deli a k’u makoɲɛfɛnw di u ma. Ne ni n’ cɛɛ be lɛtɛrɛ sɛbɛ fana k’a di u ma. O lɛtɛrɛ kɔnɔ, an b’a fɔ u ye ko u nana bɔ an ye minkɛ, o y’an jija yɛrɛ le!” A to i hakili la ko i ko anw, gwɛlɛyaw be kafokulu kɔrɔsibagaw kan ani u be sɛgɛn tuma dɔw la fana. U be bana, u be hami ani u fari be faga tuma dɔw la yɛrɛ. Jɔn b’a lɔn n’i ka jijali kumaw wala i ka kado dennin dɔ tɛna kɛ u dɔ ka deliliw jaabili ye!—Talenw 12:25.

AN MAKO B’O “BOƝAFƐNW” NA

16. Ka kɛɲɛ ni Talenw 3:27 ye, balimacɛw be se k’u yɛrɛ ɲininga mun ni mun lo la?

¹⁶ Duniɲa faan bɛɛ la, an mako be balimacɛ caaman na minw ye “boɲafɛnw” ye. N’i ye balimacɛ ye, i yɛrɛ ɲininga ko: “N’ be se ka tɔɔw dɛmɛ wa? (Talenw 3:27 kalan). N’ b’a fɛ ka saratiw dafa ka kɛ kɔrɔsigi ciden ye wa? Ni n’ ye kɔrɔsigi ciden ye ka ban, yala n’ b’a fɛ ka saratiw dafa ka kɛ diinan mɔgɔkɔrɔ ye walisa ka balimaw dɛmɛ bɛrɛbɛrɛ wa?c N’ be se ka yɛlɛmaniw kɛ n’ ka ɲɛnamaya kɔnɔ walisa ka Masaya waajulikɛlaw ka lakɔli kɛ wa?” I bena fɔrɔmasɔn min sɔrɔ o lakɔli la, o bena i dɛmɛ ka baara kɛ bɛrɛbɛrɛ Yezu ye. N’a b’i ɲɛɛ na ko i tɛ se k’o laɲinita dafa, Jehova deli. A deli a ka hakili senu di i ma walisa baara o baara mana kalifa i ma, i ka se k’o kɛ koɲuman.—Luka 11:13; Kɛw. 20:28.

17. An ka Masacɛ Yezu Krista ye cɛɛ dɔw sugandi k’u kɛ “boɲafɛnw” ye minkɛ, o be mun lo yira an na?

¹⁷ Yezu ye balimacɛ dɔw sugandi k’u kɛ “boɲafɛnw” ye minkɛ, o b’a yira ko ale lo b’an ɲɛminɛna laban loon nunu na (Mat. 28:20). An dusu ka di kosɔbɛ ka kɛ n’o Masacɛ ɲɔgɔn ye. A b’an kanu, a tɛgɛ labilanin lo, a b’a lɔn an mako be min na ani a ye balimacɛw sigi kafo kɔnɔ walisa k’an dɛmɛ. O la, sababuw ɲini k’a yira ko i b’o cɛɛw waleɲuman lɔn u ka baaraba kosɔn. An kana ɲinɛ abada ka Jehova waleɲuman lɔn sabu “an be fɛnɲuman minw bɛɛ sɔrɔ n’o dafanin lo,” ale lo b’o di an ma.—Zaki 1:17.