I ninsɔndiyanin ka to kɔrɔya bɛɛ n’a ta

1-2. Jehova be mɔgɔkɔrɔba kantigiw jati cogo di? (Zaburuw 92:13-15; jaa lajɛ fana ).

DUNIƝA kɔnɔ, mɔgɔw tɛ kɔrɔya koo jati cogo kelen na. Misali la, yala i hakili b’a la siɲɛ fɔlɔ min na i ye kunsigigwɛ ye i kuun na wa? N’a sɔrɔ i tun b’a fɛ k’a bɔn walisa mɔgɔ si kana a ye. Nga i y’a faamu ko hali n’i y’a bɔn, caaman wɛrɛw bena bɔ. O misali b’a yira ko mɔgɔ caaman t’a fɛ ka kɔrɔ.

² Nga an sankolo la Faa b’a sagokɛla mɔgɔkɔrɔbaw jati cogo min na, o be dan na (Talenw 16:31). A b’u suma ni yiri cɛɲumaninw ye (Zaburuw 92:13-15 kalan). Mun na o bɛnnin lo? Yiri minw kɔrɔla kosɔbɛ, tuma caaman na u cɛ ka ɲi sabu u furaburuw ka ca wala filɛruw b’u kan. Misali la, yiri cɛɲumanba dɔw be Zapɔn ani u dɔw be se ka saan waa kelen ni kɔ yɛrɛ kɛ. I ko o yiri cɛɲumaninw, Ala sagokɛla kantigi minw kɔrɔla, u cɛ ka ɲi Ala ɲɛɛ kɔrɔ. Jehova t’u kunsigigwɛw lo filɛ, a b’u ka jogo ɲumanw lo kɔrɔsi. U koo ka di a ye u ka jogo ɲumanw kosɔn i n’a fɔ u ka muɲuli, u ka kantigiya ani u ye saan caaman minw kɛ a sago kɛli la.

3. Misali dɔ fɔ k’a yira cogo min na Jehova tɛmɛna mɔgɔkɔrɔbaw fɛ k’a sagonata dafa.

³ Nafa min be mɔgɔ la Jehova ɲɛɛ kɔrɔ, dɔ tɛ bɔ o la, hali n’a tigi kɔrɔla.a Tuma caaman na, Jehova be tɛmɛ mɔgɔkɔrɔbaw fɛ k’a sagonata dafa. Misali la, Sara tun kɔrɔla tuma min na Jehova y’a fɔ a ye ko a bena kɛ siya barikaman dɔ bamuso, ani Masiya bɛma ye (Zɛnɛzi 17:15-19). Musa tun kɔrɔla tuma min na Jehova ye cii di a ma ko a ka Israɛldenw ɲɛminɛ ka bɔ n’u ye Ezipiti (Ɛkiz. 7:6, 7). Ciden Zan fana tun kɔrɔla tuma min na Jehova y’a kɛ a ye Bibulu ka kitabu duuru sɛbɛ hakili senu barika la.

4. Ka kɛɲɛ ni Talenw 15:15 ye, mun lo be se ka mɔgɔkɔrɔbaw dɛmɛ k’u ka gwɛlɛyaw muɲu? (jaa lajɛ fana).

⁴ Kɔrɔya be na ni gwɛlɛya caaman ye. Balimamuso dɔ y’a fɔ tulon na ko: “Kɔrɔya tɛ fagobagatɔw ta ye.” Nga ni mɔgɔkɔrɔbaw ninsɔn ka di,b o be se k’u dɛmɛ k’u ka gwɛlɛyaw muɲu (Talenw 15:15 kalan). Barokun nin na, an bena a ye mɔgɔkɔrɔbaw be se ka koo tigitigi minw kɛ walisa u ninsɔndiyanin ka to. An bena a ye fana kafomɔgɔ tɔɔw be se ka min kɛ walisa ka balima mɔgɔkɔrɔbaw dɛmɛ. A fɔlɔ, an k’a filɛ fɛɛn min kama a be se ka gwɛlɛya mɔgɔkɔrɔbaw ma u ninsɔndiyanin ka to.

N’AN KƆRƆLA, MUN NA A BE SE KA GWƐLƐYA AN MA AN NINSƆNDIYANIN KA TO?

5. Mun lo be se ka mɔgɔkɔrɔba dɔw fari faga?

⁵ N’i kɔrɔla, mun lo be se k’i fari faga? N’a sɔrɔ i dusu tiɲɛnin lo sabu i tun be to ka min kɛ fɔlɔ la, i tɛ sera k’o kɛ tugun. Tuma min na i tun ye kanbele wala sunguru ye ani i tun be kɛnɛya la, n’a sɔrɔ i be to ka miiri o la (Waaj. 7:10). Balimamuso dɔ tɔgɔ ko Ruby ani a ko: “N’ fari be n’ dimi ani n’ tɛ se k’a lamaga ka ɲɛ minkɛ, a ka gwɛlɛ n’ ma ka fani don. Hali ka koo dennin dɔw kɛ i n’a fɔ ka n’ seen kɔrɔta ka sosɛti don, o bɛɛ ka gwɛlɛ n’ ma. N’ bolow be n’ dimi kolokundimi kosɔn. O kama, a ka gwɛlɛ n’ ma ka baara denninw yɛrɛ kɛ.” Harold tun be baara kɛ Betɛli la ani a ko: “Tuma dɔw la, n’ be dimi n’ yɛrɛ kɔrɔ sabu n’ tun be se ka min kɛ fɔlɔ la, n’ tɛ sera k’o kɛ tugun. N’ kanbele tuma, fanga tun be n’ na kosɔbɛ. Baseball tun ka di n’ ye yɛrɛ le! Tɔɔw tun be to k’a fɔ ko: ‘A’ ye balɔn di Harold ma, a bena bii don.’ Nga sisan, n’ yɛrɛ tɛ se ka balɔn fili.”

6. a) Koo wɛrɛ jumanw lo be se k’a to mɔgɔkɔrɔba dɔw fari be faga? b) Mun lo be se ka mɔgɔkɔrɔbaw dɛmɛ u k’a lɔn wagati min na u ka ɲi ka motoboli wala mobiliboli dabila? (Barokun nin lajɛ: “Yala n’ ka ɲi ka motoboli wala mobiliboli dabila wa?” A be sɔrɔ Kɔrɔsili Sangaso nin kɔnɔ).

⁶ I fari be se ka faga fana sabu i tɛ se ka koo dɔw kɛ i yɛrɛ ma. O be se ka kɛ sanko n’i mako be mɔgɔ dɔ la walisa a k’i ladon wala n’i ka ɲi ka yɛlɛma i deen dɔ fɛ. N’a sɔrɔ i ka kɛnɛyako kosɔn wala komi i tɛ yeri kɛ ka ɲɛ, i tɛ se ka taga yɔrɔ dɔw la i kelen wala ka mobili boli. O koow be mɔgɔ dusu tiɲɛ yɛrɛ le! Nga a to i hakili ko n’i be se ka to i kelen, ka i janto i yɛrɛ la ani ka mobili boli, o lo t’a to nafa b’i la Jehova ni tɔɔw ɲɛɛ na. Ani an be se ka la a la ko Jehova b’an dusukunnakow faamu. An ye mɔgɔ sifa min ye tigitigi, o lo kɔrɔtanin lo a fɛ. A b’a lɔn ko an b’ale n’an balimaw kanu kosɔbɛ.—1 Sam. 16:7.

7. Minw dusu tiɲɛnin lo sabu u b’a miiri ko n’a sɔrɔ Jehova ka loon tɛna u sɔrɔ sii la, mun lo be se k’u dɛmɛ?

⁷ A be se ka kɛ ko i dusu tiɲɛnin lo sabu i b’a miiri ko n’a sɔrɔ Jehova ka loon tɛna i sɔrɔ sii la. N’o lo, mun lo be se k’i dɛmɛ? A to i hakili la ko Jehova be kɔnɔni kɛra walisa ka daan sigi duniɲa juguman nin na (Ezayi 30:18). Nga, mun na Jehova be muɲuli kɛra? A b’o kɛra walisa ka sababu di mɔgɔ miliyɔn caaman ma ani ka wagati to u ye u k’ale lɔn ani k’a sago kɛ (2 Piyɛri 3:9). O la n’i fari faganin lo, miiri k’a filɛ mɔgɔ miliyɔn caaman minw bena nafa sɔrɔ Jehova ka muɲuli la yanni duniɲa nin laban ka se. Yala i somɔgɔ dɔw bena kɛ u cɛma wa?

8. Bana wala dimi be se ka nɔɔ jumanw lo to mɔgɔkɔrɔbaw kan?

⁸ An kɔrɔla wo, an ma kɔrɔ wo, n’an dusu man di, an ka teli ka kuma dɔw fɔ wala ka koo dɔw kɛ an bena nimisa minw na kɔfɛ (Waaj. 7:7; Zaki 3:2). Misali la, tuma min na cɛɛ kantigi Zɔbu tun be tɔɔrɔla, a ye “kuma ɲagaminin” fɔ (Zɔbu 6:1-3). Ka fara o kan, bana dɔ wala fura dɔw be se k’a to mɔgɔkɔrɔbaw be koo dɔw kɛ wala ka kuma dɔw fɔ u tɛ deli ka minw kɛ wala ka minw fɔ. Tiɲɛn na, an si man ɲi k’a miiri ko komi an kɔrɔla, joo b’an fɛ ka kuma gwɛlɛw fɔ tɔɔw ma wala ka ja kelen kan ko u ka koo dɔw kɛ an ye. N’an bɔra a kala ma ko an ye kuma jugu fɔ mɔgɔ dɔ ma, an man ɲi ka sigasiga ka yafa deli.—Mat. 5:23, 24.

I NINSƆNDIYANIN BE SE KA TO COGO DI?

9. Mun na i ka ɲi ka sɔn tɔɔw k’i dɛmɛ? (jaaw lajɛ fana).

⁹ Sɔn tɔɔw k’i dɛmɛ (Gal. 6:2). N’a sɔrɔ a daminɛ na, o be se ka gwɛlɛya i ma. Balimamuso dɔ tɔgɔ ko Gretl. A ko: “Tuma dɔw la, a ka gwɛlɛ n’ ma ka sɔn tɔɔw ka dɛmɛ na sabu a be n’ ɲɛɛ na ko n’ bena kɛ doni ye u ma. Ka se ka n’ ka miiriya yɛlɛma ani ka n’ majigi ka sɔn ko n’ mako be dɛmɛ na, o mɛɛnna.” Ninsɔndiya min be sɔrɔ sɔnni na, i bena tɔɔw dɛmɛ k’o sɔrɔ n’i sɔnna u ka dɛmɛ ma (Kɛw. 20:35). Siga t’a la, a bena diya i ye k’a ye ko tɔɔw b’i kanu ani k’u b’u janto i la.

10. Mun na i ka ɲi ka to ka tɔɔw waleɲuman lɔn? (jaaw lajɛ fana).

¹⁰ Tɔɔw waleɲuman lɔn (Kɔlɔs. 3:15; 1 Tes. 5:18). Ni tɔɔw ye koo ɲuman kɛ an ye, an b’a fɛ k’u waleɲuman lɔn. Nga, n’a sɔrɔ tuma dɔw la, an be ɲinɛ k’o kɛ. N’an yɛlɛmisɛn kɛ ani k’a fɔ u ye k’u ni ce, an bena a yira an teriw la ko nafa b’u la ani k’u koo ka di an ye. Leah, b’a janto balima mɔgɔkɔrɔbaw la Betɛli la. A y’a fɔ ko: “Balimamuso dɔ be to ka karti dennin dɔ sɛbɛ n’ ma ka n’ fo. Mesazi janw tɛ, nga a ka di n’ ye k’u kalan. K’a lɔn ko n’ be min kɛra a ye, o ka di a ye, o be n’ ninsɔndiya.”

11. I be se ka tɔɔw dɛmɛ cogo di? (jaaw lajɛ fana).

¹¹ Banba ka tɔɔw dɛmɛ. N’i b’i hakili to tɔɔw la ani k’i seko bɛɛ kɛ k’u dɛmɛ, o bena a to i tɛna miiri i yɛrɛ ka kunkow la kojugu. Afiriki, talen dɔ b’a fɔ ko mɔgɔkɔrɔbaw be i n’a fɔ biblotɛki dɔ min fara ni hakilitigiya gafew ye. Nga gafe min datugunin bilanin be etazɛri kan, ale tɛ se ka mɔgɔ kalan wala ka maanaw lakali. O cogo kelen na, aw be koo minw lɔn, n’aw t’o fɔ kanbelew ni sunguruw ye, u tɛna se ka kalan sɔrɔ aw fɛ. To ka ɲiningaliw kɛ u ye ani u lamɛn. A yira u la mun na ka tugu Jehova ka sariyakolow kɔ o lo ka ɲi ka tɛmɛ ani o lo bena u ninsɔndiya. N’i b’i teriw jija ani k’u barika bonya, siga t’a la ko i bena ninsɔndiya sɔrɔ.—Zab. 71:18.

12. Ka kɛɲɛ ni Ezayi 46:4 ye, Jehova ye layidu ta ko a bena mun lo kɛ mɔgɔkɔrɔbaw ye? (jaaw lajɛ fana).

¹² Jehova deli a k’i barika bonya. Hali n’i sɛgɛnninba lo wala i fari faganin lo, a to i hakili la ko Jehova “te dɛsɛ, a te sɛgɛn.” (Ezayi 40:28). Jehova fanga tɛ ban ka ye. A be baara kɛ n’o ye cogo di? A b’o kɛ cogo minw na, u dɔ ye ka barika don mɔgɔkɔrɔba kantigiw la (Ezayi 40:29-31). A ye layidu ta ko a bena u dɛmɛ (Ezayi 46:4 kalan). Ani Jehova b’a ka layiduw dafa tuma bɛɛ (Zozuwe 23:14; Ezayi 55:10, 11). N’i mako be dɛmɛ na ani i ye Jehova deli, a bena i dɛmɛ. O la, i bena a ye ko a b’i kanu kosɔbɛ ani o bena i ninsɔndiya kosɔbɛ.

13. Ka kɛɲɛ ni 2 Korɛntikaw 4:16-18 ye, an ka ɲi ka mun lo to an hakili la? (jaaw lajɛ fana).

¹³ A to i hakili la ko i ka koow bena yɛlɛma. N’an b’a to an hakili la ko an ka gwɛlɛyaw ye banta ye, a bena nɔgɔya an ma k’u muɲu. Ka fara o kan, Bibulu b’an hakili sigi ko kɔrɔya ni bana bena ban (Zɔbu 33:25; Ezayi 33:24). O la, i be se ka ninsɔndiya sabu i b’a lɔn ko sini ma i bena kɛnɛya, ka barika sɔrɔ ani ka cɛɲumanya ka tɛmɛ sanga ni wagati bɛɛ kan (2 Korɛntikaw 4:16-18 kalan). Nga tɔɔw be se ka mun lo kɛ k’i dɛmɛ?

TƆƆW BE SE KA MƆGƆKƆRƆBAW DƐMƐ COGO DI?

14. Mun na a kɔrɔtanin lo an ka taga bɔ mɔgɔkɔrɔbaw ye, ani ka to k’u weele?

¹⁴ To ka taga bɔ balima mɔgɔkɔrɔbaw ye, ani to k’u weele (Eburuw 13:16). Mɔgɔkɔrɔbaw be se k’a miiri ko u b’u kelen na. Balimacɛ dɔ tɔgɔ ko Camille ani a be n’o miiriya ɲɔgɔn ye. A ko: “N’ tɛ se ka bɔ n’ ka soo tile kuru bɛɛ la. O la, koo bɛɛ nege be to ka bɔ n’ na. Tuma dɔw la, a be n’ ɲɛɛ na ko n’ be i ko jara kɔrɔ dɔ u ye min datugu. O be n’ hakili ɲagami ani k’a to n’ be dimi.” N’an be taga bɔ mɔgɔkɔrɔbaw ye, an b’u hakili sigi ko u koo ka gwɛlɛ an ma ani ko an b’u kanu. N’a sɔrɔ loon dɔ, a tun b’an kɔnɔ ka an ka kafo balima mɔgɔkɔrɔba dɔ weele wala ka taga bɔ a ye, nga an ma se k’o kɛ. An bɛɛ bolo degunnin lo. O la, “fɛɛn minw kɔrɔtanin lo kosɔbɛ,” i n’a fɔ ka taga bɔ an balima mɔgɔkɔrɔbaw ye, mun lo be se k’an dɛmɛ k’o kɛ? (Filip. 1:10, NW). I be se k’i ka kafo balima mɔgɔkɔrɔbaw tɔgɔ sɛbɛ yɔrɔ dɔ la walisa k’i hakili jigi ko i ka ɲi ka taga bɔ u ye wala k’u weele. I be se ka loon bɔ fana walisa ka taga bɔ u ye. Kana a fɔ ko n’i nana wagati sɔrɔ tuma min na.

15. Kanbelew, sunguruw ani mɔgɔkɔrɔbaw be se ka koo jumanw lo kɛ ɲɔgɔn fɛ?

¹⁵ N’i ye kanbele wala sunguru ye, n’a sɔrɔ i b’i yɛrɛ ɲiningara i be se ka baro wala koo minw kɛ ni mɔgɔkɔrɔbaw ye. Nga, kana hami o la. Ele ka kɛ teri sɔbɛ ye dɔrɔn (Talenw 17:17). A ɲini ka baro kɛ n’u ye ka kɔn lajɛn daminɛ ɲɛ ani lajɛn bannin kɔ. N’a sɔrɔ i be se k’u ɲininga k’a filɛ vɛrise min ka di u ye. Wala i be se k’a ɲini u fɛ u ka koo dɔ lakali i ye, u ye min kɛ u denmisɛn tuma ani a be yɛlɛko bila mɔgɔ la. I be se k’a ɲini u fɛ fana u ka na fara i kan aw be JW Telewisɔn filɛ ɲɔgɔn fɛ. I be se ka mɔgɔkɔrɔbaw dɛmɛ cogo tigitigi wɛrɛw la fana. Misali la, i be se k’u dɛmɛ walisa u ka telefɔni wala tablɛti ka baara kɛ ka ɲɛ ani fana ka an ka sɛbɛ kuraw telesarse u ye. Balimamuso dɔ tɔgɔ ko Carol. A ko: “Koo minw ka di i ye, a ɲini k’u kɛ ni mɔgɔkɔrɔbaw ye. Hali k’a sɔrɔ n’ kɔrɔla, n’ bele b’a fɛ ka ɲɛnamaya diyabɔ. A ka di n’ ye ka taga sanni kɛ, ka dumuni kɛ ni n’ teriw ye ani ka taga yɔrɔ cɛɲumaninw filɛ.” Balimamuso dɔ tɔgɔ ko Maira. Ale y’a fɔ ko: “N’ teri dɔ be ni saan 90 ye. Saan 57 lo b’an ni ɲɔgɔn cɛ. Nga tuma caaman na, n’ be ɲinɛ o kɔ sabu an be yɛlɛko ɲɔgɔn fɛ ani ka filimuw filɛ ɲɔgɔn fɛ. Ka fara o kan, ni gwɛlɛyaw be an dɔ kan, a be ladili ɲini tɔɔ kelen fɛ.”

16. Mun na nafa b’a la ka mɔgɔkɔrɔbaw bila sira ka taga dɔgɔtɔrɔso?

¹⁶ U bila sira ka taga dɔgɔtɔrɔso. I be se k’u ta ka taga n’u ye dɔgɔtɔrɔso. Nga o dɔrɔn tɛ, i be se fana k’i janto ko dɔgɔtɔrɔw b’u minɛ ka ɲɛ ani ko u b’u janto u la (Ezayi 1:17). I be se ka mɔgɔkɔrɔbaw dɛmɛ cogo wɛrɛ min na, o ye ka lamɛnni kɛ koɲuman ni dɔgɔtɔrɔ be kumana u fɛ. Balima musokɔrɔba dɔ tɔgɔ ko Ruth. A ko: “Tuma caaman na ni n’ tagara dɔgɔtɔrɔso la n’ kelen, dɔgɔtɔrɔw tɛ n’ ka koo ta sɔbɛ la. U be se ka kuma nunu ɲɔgɔn fɔ n’ ye: ‘A b’i kuun na le dɔrɔn, bana foyi t’i la.’ Nga ni mɔgɔ dɔ lo ye n’ bila sira, dɔgɔtɔrɔw be n’ filɛ koɲuman. N’ be n’ balimaw fo sabu u b’u ka wagati ta ka n’ bila sira.”

17. I be se ka waajuli baara faan jumanw lo kɛ ni mɔgɔkɔrɔbaw ye?

¹⁷ Waajuli kɛ n’u ye. Fanga tɛ mɔgɔkɔrɔba dɔw la ka waajuli kɛ soo ni soo. Nga i be se k’a ɲini u dɔ fɛ a ka na fara i kan aw be waajuli kɛ ni wotoro ye. I yɛrɛ be se ka na ni sigilan ye walisa a ka sigi wotoro gɛrɛfɛ. I be se fana ka balima mɔgɔkɔrɔba dɔ ta aw be taga dɔ ka bibulukalan kɛ ɲɔgɔn fɛ. Wala aw yɛrɛ be se ka taga o bibulukalan kɛ o balima mɔgɔkɔrɔba ka soo. Diinan mɔgɔkɔrɔw be se ka labɛnw kɛ walisa ka waajuli baara lajɛn kɛ balima mɔgɔkɔrɔba dɔ ka soo. O la, a bena se k’a seen don waajuli la cogo nɔgɔman na. N’an b’an seko bɛɛ kɛ k’a yira mɔgɔkɔrɔbaw la ko an b’u kanu ani ko an be bonya la u kan, o ka di Jehova ye.—Talenw 3:27; Ɔrɔm. 12:10.

18. An bena ɲiningali juman lo jaabi barokun kalanta nata la?

¹⁸ Barokun nin y’an hakili jigi ko Jehova be mɔgɔkɔrɔbaw kanu ani ko u koo ka gwɛlɛ a ma. Kafomɔgɔ tɔɔw fana b’u jati o cogo kelen na. Kɔrɔya man nɔgɔ. Nga an balima mɔgɔkɔrɔbaw, aw k’a lɔn ko Jehova ka dɛmɛ barika la, aw ninsɔndiyanin be se ka to (Zab. 37:25). K’a lɔn ko loon ɲumanw t’an kɔ, nga u b’an ɲɛɛ le, o b’an jija yɛrɛ le! An balima dɔw b’u jantora u somɔgɔ mɔgɔkɔrɔba dɔ la, u deen wala u teri dɔ la min man kɛnɛ. Olu ninsɔndiyanin be se ka to cogo di? An bena o ɲiningali jaabi barokun kalanta nata la.