Dɛmɛ min lasera balimaw ma duniɲa kuru bɛɛ kɔnɔ fɔɲɔbana tuma na

Saan 2020 marisikalo la, jɛnkulu min be kɛnɛyako kun na duniɲa kuru bɛɛ kɔnɔ (OMS), a ko COVID-19 ye fɔɲɔbana lo ye. O wagati la, mɔgɔ caaman tun t’a miiri ko o bana bele tun bena kɛ duniɲa kuru bɛɛ kɔnɔ saan kelen o kɔ. Jehova Seerew ani mɔgɔ miliyɔn caaman wɛrɛw tɔɔrɔla o fɔɲɔbana kosɔn farisogo, dusukunnakow ani wariko ta fan fɛ. Jehova Seerew ye dɛmɛ jumanw lo lase mɔgɔw ma o wagati la?

Dɛmɛ, wagati bɛnnin na

Walisa ka dɛmɛ lase mɔgɔw ma COVID-19 tuma na, balawoko ɲɛnabɔbagaw ka kɔmite 950 ni kɔ lo sigira sen kan duniɲa kuru bɛɛ kɔnɔ. Koow Ɲɛnabɔla Jɛnkulu ka Kɔrdinatɛriw ka kɔmite lo be o kɔmitew kun na. Balima dɔw ye dɛmɛ sɔrɔ ka bɔ kɔmitew yɔrɔ minw sigira sen kan u ka jamanaw na ani dɔ wɛrɛw ye dɛmɛ sɔrɔ faamanw fɛ. Balawoko ɲɛnabɔbagaw ka kɔmitew ye labɛnw kɛ walisa ka dɛmɛba lase balimaw ma duniɲa kuru bɛɛ kɔnɔ.

Misali la, an k’a filɛ min kɛra Paraguwe jamana na. Zurunali dɔ y’a fɔ ko fɔɲɔbana kosɔn, wariko gwɛlɛya be mɔgɔ caaman kan. O kama, “Paraguwekaw fanba tɛ dumuni sɔrɔ ka dumu.” Balawoko ɲɛnabɔbagaw ka kɔmite minw sigira sen kan Paraguwe, olu tun y’a daminɛ ka fɛɛn dɔw di balimaw ma, i n’a fɔ dumunifɛnw, safinɛ n’a ɲɔgɔnnaw walisa k’u dɛmɛ. Denbaya kelen kelen bɛɛ kɔnɔ, o fɛɛnw tun be se ka mɔgɔ naani mako ɲɛ lɔgɔkun fila kɔnɔ. Dɛmɛ min lasera denbaya kelen kelen bɛɛ ma, o tun be 18000 ɲɔgɔn bɔ, CFA wari la.

Balima minw be dɛmɛ lase mɔgɔw ma, olu be mun lo kɛ walisa k’u yɛrɛ ani tɔɔw tanga COVID-19 fɔɲɔbana ma? U be masiki don ani ka furancɛ to u ni tɔɔw cɛ. U be dumunifɛnw san mɔgɔ minw fɛ, u b’u janto ko u ka yɔrɔw saniyanin lo ani ko u be koo tigitigi dɔw kɛ walisa o bana kana jɛnsɛn. Misali la, balima minw be o fɛɛnw tilan tilan, a ɲinina olu fɛ u ka masiki n’a ɲɔgɔnnaw don, k’u ka mobiliw saniya ani u be o fɛɛnw bila yɔrɔ minw na, olu saniyanin ka kɛ. A laban, minw be o fɛɛnw tilan tilan balimaw ye, u be furancɛ to olu ni o balimaw cɛ.

U be baara ɲuman kɛ ni balimaw ka niliw ye

Gwɛlɛya be balima minw kan COVID-19 fɔɲɔbana kosɔn, saan 2021 zanwiyekalo la, Kɔrdinatɛriw ka kɔmite ye sira di walisa miliyari 15 ni kɔ (CFA wari la) ka kɛ k’o balimaw dɛmɛ. Tɔnbolow ani balawoko ɲɛnabɔbagaw ka kɔmitew be baara ɲuman kɛ n’o wari ye ani u be fɛɛn minw san balimaw ye, u be jijalibaw kɛ walisa k’o sɔrɔ sɔngɔ nɔgɔman na. Misali la, Sili jamana na, minw be balimaw dɛmɛko labɛn, olu tun b’a fɛ ka sɔsɔ sifa dɔ kilo 750 san. Kalo kelen dɔrɔn kɔnɔ, dɔ farala o sɔsɔ sɔngɔ kan. A kɛra a sɔngɔ sigiyɔrɔma fila ye! Balimaw sɔnna ko u bena o sɔsɔ san. Lɛri fila o kɔ, feerelikɛla y’a fɔ u ye ko a ka kiliyan dɔ tun ye sɔsɔ min san, a y’o kɔsegi. Kiliyan kɔsegira ni sɔsɔ min ye, sanni feerelikɛla k’o di balimaw ma sɔngɔ gwɛlɛ na, a y’o di u ma kalo tɛmɛnin ka sɔngɔ la!

Nka tuma min na balimaw nana ko u b’u ka sɔsɔ minɛ, feerelikɛla tun b’a fɛ ka ban k’a di u ma. A ko n’u be dɛmɛ lasera mɔgɔw ma, u be wolomani kɛ i ko ɔriganisasiyɔn tɔɔw. Balima dɔ ye delili surun kɛ a kɔnɔ. O kɔ, a y’a ɲɛfɔ feerelikɛla ye ko kafo kelen kelen bɛɛ kɔnɔ, sɛgɛsɛgɛri kɛra k’a filɛ balima minw mako gwɛlɛ be dɛmɛ na. Balimaw y’a ɲɛfɔ fana ko minw be dɛmɛ sɔrɔ u bɔyɔrɔ tɛ kelen ye minkɛ, fɛɛn minw be di u ma, an b’u labɛn ka kɛɲɛ n’u kelen kelen bɛɛ makoya ye. A laban, u ye feerelikɛla hakili sigi ko Jehova Seerew be wari min di ani ka dɛmɛ min lase u balimaw ma, olu yɛrɛ lo b’a bɔ u yɛrɛ la k’o kɛ, u t’o kɛ diyagoya la. Feerelikɛla kabakoyara. A sɔnna ka dɔ bɔ sɔsɔ sɔngɔ la. Nka o dɔrɔn tɛ, siɲɛ wɛrɛ min na balimaw nana sɔsɔ san a fɛ, a ye sɔsɔ kilo 400 di lɛnga ye.

“U be ɲɔgɔn kanu sɔbɛ la”

Balima musokɔrɔba dɔ tɔgɔ ko Lusu, firiyamuso lo ani a be Liberiya n’a somɔgɔ duuru ye. Loon dɔ sɔgɔma, u tun be daraka kɛra ani ka tilera kalan lajɛ. Lusu mamaden min be ni saan wolonfila ye, ale y’a kɔrɔsi ko dumuni foyi tɛ soo tugun ani a ye ɲiningali kɛ ko: “An bena mun lo dumu do?” Lusu y’a hakili sigi ko ale ye delili kɛ o koo la ka ban ani ko a lanin b’a la ko Jehova bena u dɛmɛ. O loon tilefɛ bɛɛ, Lusu ka kafo diinan mɔgɔkɔrɔw y’a weele ko a ka na dumunifɛn dɔw ta. A ko: “N’ mamaden ko sisan, ale b’a lɔn ko Jehova be deliliw lamɛn ani k’u jaabi sabu a ye ne ta jaabi.”

Muso dɔ be Kɔngo Kinsasa jamana na ani a ka soo be denbaya dɔ gɛrɛfɛ min ye Jehova Seere ye. Tuma min na a y’a ye ko balimaw nana dumunifɛnw di o denbaya ma, a ko: “Fɔɲɔbana tɛmɛnin kɔ, an bena kɛ Jehova Seerew ye sabu u y’u janto u balimaw na wagati gwɛlɛ nin na.” A cɛɛ y’a ɲininga ko: “I b’a fɛ ka kɛ Jehova Seere ye malobɔrɔ kelen dɔrɔn kama wa?” A y’a jaabi ko: “O tɛ dɛ, nka o malobɔrɔ b’a yira ko u be ɲɔgɔn kanu sɛbɛ la.”

Fɔɲɔbana tuma na, Jehova Seerew sera ka dɛmɛ lase u balimaw ma joona joona sabu aw b’aw tɛgɛ labila ka niliw kɛ. Nili kɛcogo minw kofɔra donate.jw.org kan, aw tɛmɛna u fɛ ka niliw kɛ. An b’aw fo kosɔbɛ o kosɔn.