Dɛmɛ min lasera kasaratɔw ma saan 2021 kɔnɔ: An ma ɲinɛ an balimaw kɔ

Saan 2021 ka waajuli baara tuma na,a COVID-19 fɔɲɔbana tora ka gwɛlɛyaw lase mɔgɔw ma duniɲa kuru bɛɛ kɔnɔ. An ka barokun dɔ la (Dɛmɛ min lasera balimaw ma duniɲa kuru bɛɛ kɔnɔ fɔɲɔbana tuma na), a tun fɔra ko an ye dolarib miliyɔn caaman lo kɛ ka mɔgɔw dɛmɛ ani ko an ye balawoko ɲɛnabɔbagaw ka kɔmite 950 ni kɔ lo sigi sen kan.

Hali k’a sɔrɔ fɔɲɔbana nin tun be juguyara ka taga, balawoko wɛrɛw kɛra duniɲa kuru bɛɛ kɔnɔ ani o fana ye tɔɔrɔ lase balimaw ma. O balawoko 200 ni kɔ ɲɔgɔn minw kɛra, Koow Ɲɛnabɔla Jɛnkulu ka kɔrdinatɛriw ka kɔmite ye sira di ko dolari miliyɔn 8 ka bɔ ka dɛmɛ lase balimaw ma. Ka kɔn o ɲɛ, sira tun dira ko wari ka bɔ COVID-19 fɔɲɔbana kosɔn. An k’a filɛ baara minw lo kɛra n’aw ka niliw ye walisa ka balimaw dɛmɛ balawo fila dɔw koo la, minw kɛra a man mɛɛn.

Nyiragongo kulu ye tasuma fɔɔnɔ

Kɔngo Kinsasa jamana na, kulu dɔ be yen min be weele ko Nyiragongo kulu. Saan 2021 mɛkalo tile 22, o kulu y’a daminɛ ka tasuma fɔɔnɔ. O tasumaji woyora ka luuw, lakɔlisow ani jibondo dɔ halaki. Nka o tasumaji dɔrɔn lo tun tɛ farati ye. Tile caaman o kɔ, bugurigwɛ min be mɔgɔ bana, o caaman wulila Goma dugu la. Dugukoloyɛrɛyɛrɛ dennin caaman fana kɛra. O kama, dugumɔgɔw fanba ye dugu bila. Mɔgɔ caamanba bolila ka taga Ruwanda jamana na.

Mɔgɔ minw ye dugu bila, Jehova Seere 5000 ɲɔgɔn lo tun b’u cɛma. Balima dɔw ka boon halakira o balawoko kosɔn ani soonw ye dɔ wɛrɛw ka boon kɔnɔfɛnw bɛɛ sonya. Balawoko ɲɛnabɔbagaw ka kɔmite min be Ruwanda ani Kɔngo Kinsasa jamana na, olu ye baara kɛ ɲɔgɔn fɛ. Kɔngo Kinsasa ka tɔnbolo y’a fɔ balawoko ɲɛnabɔbagaw ka kɔmite dɔ koo la ko: “Tuma min na dugu ɲagamininba tun lo ani yɛrɛ, sanni u k’a fɔ mɔgɔw ye ko u ka boli, kɔmite tun y’a daminɛ ka dumuni, jii, dilanw ani faniw di mɔgɔw ma.” An balima 2000 ni kɔ boli ka taga dugu dɔ la. O yɔrɔ la, balawoko ɲɛnabɔbagaw ka kɔmite dɔ ye fanibuguw lɔ u ye, ka maskiw tilan tilan u ye ani k’a ɲɛfɔ u ye u be se ka min kɛ walisa COVID-19 bana ani kolera kana u minɛ.

Kalo saba dɔrɔn kɔnɔ, balimaw ye malo tɔni 6 ni kɔ, kabamugu tɔni 6 ni kɔ, tobilikɛtulu tɔni 3 ni kɔ ani jii litiri 3000 ni kɔ di kasaratɔw ma. Tɔnbolo y’a ye ko ka dumuni san jamana wɛrɛ la ani k’a bila ka na, o sɔngɔ bena gwɛlɛya kosɔbɛ. O kama, balimaw be yɔrɔ min na, u y’a latigɛ ka dumuni san caaman o yɔrɔ yɛrɛ la walisa ka se ka wari dɔ mara.

Tasumaji ye balimamuso dɔ ka soo kura tiɲɛ. A y’a fɔ ko: “An fari faganinba tun lo ani an dusu tun kasinin lo kosɔbɛ.” Nka, a ye dɛmɛ sɔrɔ bololafɛnw ta fan fɛ ani Alako ta fan fɛ. A y’a fara a kan ko: “An mako be min na, an bele b’o sɔrɔla Jehova ka dɛmɛ barika la. An y’a ye ko Jehova ye an ka doniw ɲun an ye cogoya dɔ la wala a y’a fɛgɛnya an kuun na.”

Wariko gwɛlɛya min kɛra Venezuwela

Wariko gwɛlɛyaba be Venezuwela jamana na a saan caaman ye nin ye. An balima minw be yen, olu ka ɲɛnamaya kɛcogo gwɛlɛyara kosɔbɛ, dumuniko gwɛlɛyaba b’u kan ani benkannikow cayara kojugu o yɔrɔ la. Nka, Jehova ka ɔriganisasiyɔn m’u to yen.

Saan 2021 ka waajuli baaraw la, an ye dolari miliyɔn kelen ni tilan lo bɔ walisa ka dumuni ni safinɛw san ani k’u di denbayaw ma minw tun mako be o fɛɛnw na (o be bɛn miliyari kelen ma sefa wari la). Venezuwela tɔnbolo mɔgɔw y’a fɔ ko: “A man nɔgɔ ka dumuni tɔni 130 lase jamana yɔrɔ bɛɛ la kalo o kalo ani k’a lɔn ni o dumuniw donna balimaw bolo, minw mako be dɛmɛ na tiɲɛn na.” Walisa k’u janto k’o dumuni kana tiɲɛ, dumuni minw tɛ tiɲɛ joona, balimaw be o le san k’u ci. Tɔnbolo mɔgɔw y’a fara a kan ko: “Ni dumuni minw tuma lo, an b’u san caaman sabu u sɔngɔ ka nɔgɔ o tuma na. O kɔ, an be fɛɛrɛ nɔgɔman dɔ ɲini ka se k’u ci balimaw ma.”

Leonel ye balawoko ɲɛnabɔbagaw ka kɔmite mɔgɔ dɔ ye Venezuwela, ani a ka baara ka di a ye. A ko: “Ka se ka mɔgɔw dɛmɛ, o ye baara kɛrɛnkɛrɛnninba ye. N’ muso sanin kɔ COVID-19 bana na, o baara ye fanga di n’ ma kosɔbɛ. N’ bolo degunnin tora ani n’ y’a ye ko n’ be dɔ ɲɛ n’ balimaw ye minw dɛsɛnin lo. Jehova ye layidu ta ko a tɛna a sagokɛlaw to yen abada. Ne yɛrɛ ɲaa y’a ye a y’o layidu dafa cogo min na.”

Dɛmɛ lasera balimacɛ dɔ ma ani a yɛrɛ ye baara kɛ balawoko ɲɛnabɔbagaw ka kɔmite dɔ la ka ye. A ko: “Sisan, ne lo mako be dɛmɛ na. U ye fɛɛnw di an ma, nka u ma dan o dɔrɔn ma. Balimaw ye ne ni n’ muso dɛmɛ fana an hakili siginin ka to. U ye u janto an na, k’an dusu saalo ani k’an jija.”

Kasara dɔw be cun mɔgɔw kan. Nka ni o kɛra, an balimaw makoɲɛfɛn jɔnjɔnw ye min ye, tuma caaman na, Jehova ka ɔriganisasiyɔn be o fɛɛnw ɲini ani k’u lase joona joona balimaw ma. An b’aw fo sabu an be sera k’o kɛ aw ka niliw lo barika la. Niliw kɛcogo dɔw ɲɛfɔra donate.jw.org kan. Aw b’aw tɛgɛ labila ka nili minw kɛ, an b’aw fo kosɔbɛ o kosɔn.