Kanbelew, yala aw be nɛɛma baara ɲinina wa?
1. Tuma juman lo kanbele ka kan k’a daminɛ ka 1 Timote 3:1 ka ladili sira tagama?
1 “Ni mɔgɔ dɔ bɛ egilisi kɔlɔsibaaya ɲini, o tigi bɛ baara ɲuman fɛ.” (1 Tim. 3:1, ABM ). O kuma senumanw be balimacɛw jija u k’a ɲini ka saratiw dafa walisa ka nɛɛma baara sɔrɔ kafo kɔnɔ. Yala i ka kan ka kɛ baliku ye fɔlɔ ka sɔrɔ k’o kɛ wa? Tiɲɛn na, a ka fisa i k’a daminɛ ka saratiw dafa kabi i kanbele tuma na. O cogo la, i bena fɔrɔmasɔn sɔrɔ ani k’a yira kɔfɛ ko i ka koow dafara ka kɛ kɔrɔsigi ciden ye (1 Tim. 3:10). N’i ye kanbele batisenin ye, i be se k’a yira cogo di ko i be nɛɛma baara ɲinina?
2. I be se ka yɛrɛsaraka hakili degi ani k’a yira cogo di?
2 Yɛrɛsaraka hakili: A to i hakili la ko i be baara ɲuman lo ɲinina, tɔgɔba koo tɛ. O kama, i k’a ɲini k’i balimaw dɛmɛ. O kɛcogo dɔ ye ka miiri Yezu ka ɲɛyira ɲuman koo la (Mat. 20:28; Zan 4:6, 7; 13:4, 5). Jehova deli a k’i dɛmɛ i k’i mako don mɔgɔw la (1 Kor. 10:24). Mɔgɔkɔrɔbaw wala farikolo dɛsɛbagatɔ minw be kafo kɔnɔ, i be se k’u dɛmɛ cogo nafaman na wa? Yala i b’i yɛrɛ labila ka kafo ka zaradɛn ladon, ka ɲɛgɛnw ko wala ka Masaya Boon saniya wa? Yala i be sɔn ka kalan kɛ lakɔliden wɛrɛ nɔɔ na Ala ka Mara cidenyabaara lakɔli la wa? N’i b’i yɛrɛ di ka mɔgɔw mako ɲɛ, i bena a ye k’o b’i ninsɔndiya.—Kɛw. 20:35.
3. Mun na a kɔrɔtanin lo ka kɛ ni kerecɛn jogow ye ani i be se k’u degi cogo di?
3 I ka Alakow: Kafo kɔnɔ, kerecɛn jogo ɲumanw nafa ka bon ka tɛmɛ hakilidiya ni setigiya kan fɔɔ ka taga ka na. Mɔgɔ min ka Alako barika ka bon, o tigi b’a jija ka koow filɛ i ko Jehova ni Yezu b’a kɛ cogo min na (1 Kor. 2:15, 16). A b’a yira fana ko a be ni “Ni Senu den” ye (Gal. 5:22, 23). A be waajuli kɛ ni kisɛya ye ani a be Masayakow kɛ a ɲɛnako fɔlɔ ye (Mat. 6:33). I be se ka kerecɛn jogow degi n’i be tugu porogramu ɲuman kɔ ka kelenna kalan kɛ, i n’a fɔ: ka Bibulu kalan loon o loon, ka La Tour de Garde ni Réveillez-vous ! kelen kelen bɛɛ kalan, k’i yɛrɛ labɛn kafo ka lajɛnw kama ani ka taga u la (Zab. 1:1, 2; Eburuw 10:24, 25). Tuma min na Pol tun be Timote jijara ko a ka taga ɲɛ Alako la, a y’a sɛbɛ ko: “I ka mɔgɔ kalancogo kɔlɔsi.” (1 Tim. 4:15, 16). O kama, kalan mana di i ma Ala ka Mara cidenyabaara lakɔli la, i k’i yɛrɛ labɛn koɲuman. I k’i yɛrɛ labɛn waajuli kama ani k’a kɛ tuma bɛɛ. I ka laɲinita dɔw latigɛ Alako ta fan fɛ ani i jija k’u dafa, i n’a fɔ piyɔniye ni Betɛli baara, wala Cɛgwanaw ka Bibuluko lakɔli. I ka Alakow bena i dɛmɛ i be “boli kamalenya negew ɲɛ.”—2 Tim. 2:22, ABM.
4. Sɔbɛya ni kantigiya nafa ye mun ye?
4 Sɔbɛya ni kantigiya: Saan kɛmɛ kulu fɔlɔ la, dumuni tilanko kalifara balima minw ma, olu “tɔgɔ ɲuman” tun be fɔ sabu bɛɛ tun b’a lɔn ko mɔgɔ sɔbɛw ni kantigiw lo. O lo kama cidenw tun tɛ jɔrɔ u ka baara kɛcogo koo la. O y’a to cidenw sera k’u hakili sigi ka baara wɛrɛw kɛ minw kɔrɔtanin lo fana (Kɛw. 6:1-4, ABM ). O la do, ni baara kalifara i ma kafo kɔnɔ, i k’i seko bɛɛ kɛ k’a dafa. I ka Nuhun ladegi. Ala ye cikan minw di a ma kurun dilanni koo la, a y’o bɛɛ labato (Zɛnɛsi 6:22). Kantigiya ye kooba ye Jehova ɲɛɛ kɔrɔ ani a b’a yira ko i ye kerecɛn kɔgɔnin ye.—1 Kor. 4:2; koorilen nin fana lajɛ: “Nafa min be fɔrɔmasɔn na.”
5. Mun na kanbelew ka kan ka nɛɛma baara ɲini kafo kɔnɔ?
5 Ka kɛɲɛ ni kiraya kuma ye, baara min be kɛra ka mɔgɔw lajɛn kafo kɔnɔ, Jehova b’o baara teliyara (Ezayi 60:22). Saan o saan, mɔgɔ waa bi looru ɲɔgɔn be batise. Komi mɔgɔ kura caaman be farala an kan kafo kɔnɔ, an mako be cɛɛ setigiw la Alako ta fan fɛ walisa ka kunkanbaaraw dafa. Sisan, ka tɛmɛ sanga ni wagati bɛɛ kan, baara kɛta ka ca Jehova ka baara la (1 Kor. 15:58). Kanbelew, yala aw be nɛɛma baara ɲinina wa? N’o lo, aw be baara ɲumanba lo ɲinina!
[Koorilen ɲɛɛ 2 kan]
Komi mɔgɔ kura caaman be farala an kan kafo kɔnɔ, an mako be cɛɛ setigiw la Alako ta fan fɛ walisa ka kunkanbaaraw dafa
[Koorilen ɲɛɛ 3 kan]
Nafa min be fɔrɔmasɔn na
Ni diinan mɔgɔkɔrɔw be baara kalifa kanbele setigiw ma ani ka fɔrɔmasɔn di u ma, o b’u nafa. Lajɛn bannin kɔ, kafokulu kɔrɔsibaga tun siginin lo tintin kan a be balima dɔ jijara. A y’a kɔrɔsi ko kanbelenin dɔ be kɔnɔni kɛra a gɛrɛfɛ. A y’a ɲininga n’a b’a fɛ ka kuma ale fɛ. Kanbelenin y’a jaabi ko ale ka baara ye ka tintin jɔsi lajɛn bannin kɔ. A bangebagaw tun b’a fɛ ka taga, nka ale tun b’a fɛ k’a ka kunkanbaara dafa fɔlɔ. Kafokulu kɔrɔsibaga ninsɔndiyara ka yɔrɔ to a ye. A ko: “O kafo kɔnɔ, diinan mɔgɔkɔrɔw tun ka teli ka baara dɔw kalifa kanbele setigiw ma walisa ka fɔrɔmasɔn di u ma. O kama, ne tun mana bɔ u ka kafo ye, u tun tɛ sigasiga ka kanbele dɔ tɔgɔ di walisa a ka kɛ kɔrɔsigi ciden ye.”