KALANSEN 8

Ɲɛyirali nafamanw

Matiyo 13:34, 35

MIIRIYA JƆNJƆN: I ka kalan kɛcogo fisaya ni ɲɛyiraliw ye minw faamuyali ka nɔgɔ, minw b’a to i lamɛnbagaw b’u mako don i ka kumaw na ani ka miiriya jɔnjɔnw faamu.

A KƐCOGO:

Baara kɛ ni ɲɛyiraliw ye minw faamuyali ka nɔgɔ: I ko Yezu, tɛmɛ fɛɛn denninw fɛ ka mɔgɔw kalan fɛɛnbaw la ani tɛmɛ fɛɛn nɔgɔmanw fɛ ka mɔgɔw kalan koo dɔw la minw faamuyali ka gwɛlɛ. Kana hakilinata misɛnmanw fara a kan gwansan, n’o tɛ a faamuyali bena gwɛlɛya. I janto ko i ka ɲɛyirali be bɛn tigitigi n’i ka kalan ye, n’o tɛ o hakilinata misɛnmanw bena i lamɛnbagaw hakili ɲagami.

Kɔrɔsili kɛ. Filɛri kɛ i gɛrɛfɛyɔrɔw la, an ka kalankɛ gafew lajɛ ani kalankɛla ŋanaw lamɛn n’u be kalan dira. N’i b’o kɛra, a kɔrɔsi ɲɛyirali minw be se k’i dɛmɛ k’i ka kalan kɛcogo fisaya ani o ɲɛyiraliw sɛbɛ ka bila.
Miiri k’a filɛ ɲɛyirali minw bena i lamɛnbagaw nafa: U be baara min kɛ wala fɛɛn min ka di u ye, ɲɛyirali dɔw ta ka kɛɲɛ n’o ye. Kan’a to i ka ɲɛyiraliw be mɔgɔ kɔnɔ gwan, wala u be mɔgɔ lamaloya.
Hakilinata jɔnjɔnw to i hakili la: Kana ɲɛyiraliw ta ka hakilinata misɛnmanw ɲɛfɔ, nka ɲɛyiraliw ta walisa ka hakilinata jɔnjɔnw lo ɲɛfɔ. I janto ko i lamɛnbagaw tɛna u hakili to i ka ɲɛyirali dɔrɔn lo la, nka ko u ye min faamu o ɲɛyirali sen fɛ, u bena u hakili to o fana la.